- Advertisement -

Hazrat Shaikh Shams-ud-deen Mohammad Tabrizi rahmatullahi alaihi

Laqab: Shams-e-Tabriz.

Hazrat Shaikh Shams-ud-deen Mohammad Tabrizi Rahmatullahi Alihi Ki Willaadat 580 Hijri (1185 A.D.) meim Tabriz (Iran) me hui.

Hazrat Shaikh Shams-ud-deen Mohammad Tabrizi Rahmatullahi Alahi ke waalid ka naam Ali bin Malik-e-Daad hai.

Aap ne bachpan mein Hazrat Shaikh Abu Bakr Sallebaf rahmatullahi alaihi se ta’aleem haasil ki.
Is ke baad Aap ne Shaafi mazhab ki Fiq’h Hazrat Abu Is’haq al-Shirazi rahmatullāhi alaihi ki kitaab ‘al-Tanbih fil fiqh al-Shafi’i’ ki taaleem haasil ki.

Aap ne Fiq’h, Kalaam, Ilm e Istadalaal (Mantiq), Falsafa, aur Tasawwuf ki ta’aleem haasil ki.
Aap Baghdad, Damishq (Damascus), Halab (Aleppo), Kayseri, Aksaray, Sivas, Erzurum aur Erzincan ka safar karte rahe.

Aap apne saath sirf ek chattai rakhte. Aap jab kisi jagah wuqoof karte to kisi khaanqaah mein theharne ke bajaye saraay mein theharte aur khud ko ek musaafir batate.

Aur tokriya banakar, ya kamar-band banakar use bechkar apna guzraan kar lete. Aur aksar waqt sufiya e kiraam aur ulama ki mehfilo mein guzaarte aur tanhai mein ibaadat aur riyaazat mein guzaarte.

642 Hijri (November 1244 A.D.) mein Aap Konya pahunche.

Ek baar Maulana Jalaal-ud-deen Rumi rahmatullāhi alaihi bahot saari kitaaben saath rakhkar padh rahe the.

Itne mein Hazrat Shams Tabrizi waha se guzre. Aap ne puchha ‘Kya kar rahe ho?’
Aap ka saada libaas dekhkar Maulana Rumi ne kaha ‘Aap nahi samajh sakenge.’

Aap ne un kitaabo ko lekar qareeb me ek jhil ke andar phenk diya.
Maulana Rumi ne jab un kitaabo ko paani se baahar nikala to wo sab bilkul sookhi thi.
Unho ne puchha ‘Hazrat, ye kaise hua?’

Aap ne farmaya ‘Ye tum nahi samajh sakoge.’

Ye dekhkar Maulana Rumi samajh gaye ke Hazrat Shams Tabrizi ek wali e kaamil hain.

Unho ne din wa raat saara waqt un ki sohbat me guzaarna shuru kar diya.
Aur apni Mudarris ki aur apne pariwar ki zimmedaari bhi bhul gaye.

Jab aap ko pata chala ke Maulana Rumi ke shaagird is baat ki wajah se naraaz ho gaye hain tab Shawwaal 643 Hijri (March 1246 A.D.) mein baghair kisi ko bataaye Konya se rawaana ho gaye.

Aap ke achaanak chale jaane se kuchh waqt tak Maulana Rumi ghamzada ho gaye.
Unho ne Hazrat Shams Tabrizi ko waapas aane ke liye bahot saare paighaam bheje.

Aakhir mein jab apne saahbzade Sultaan Walad ko bheja tab Aap Konya waapas aaye.
Aap ke waapas aane se Maulana Rumi bahot khush hue aur un ki sohbat me rehkar faiz haasil karne lage.

Kuch arsa Maulana Rumi ke saath Konya mein guzaarne ke baad Aap waha se Khoy aa gaye.

Tasannif :
Hazrat Shams Tabrizi ne ‘Maqaalat’ (Discourses) naam ki ek kitaab likhi hai.

Aqwaal :
Aap irshaad farmaate hain :

(1) Khush-mijaazi us saaf paani ki tarah hai jis se paid-paudhe khilte hai aur sabz wa taaza rehte hai aur Gham-geeni us kichad ki tarah hai jis se khile hue paid-paudhe murza jaate hain.

(2) Achcha insaan fariyaad karne mein aur dusro ke aib dekhne me waqt zaaya nahi karta.

(3) Jaisa tum kahoge achha ya bura, waisa hi tumhare saamne aayega.
Is liye agar koi tumhare baare me bura sochta hai aur agar tum bhi us ke baare me bura kahoge to is se sirf baat bigdegi aur tum us daayre me phanse hue rahoge.

Aap Hazrat Baaba Kamaal-ud-deen Jundi rahmatullāhi alaihi ke mureed hain Aur ‘Suharwardi Kubrawiya’ silsila ke shaikh hain.

Aap ke Khalifa Hazrat Maulana Jalaal-ud-deen Rumi rahmatullāhi alaihi hain.

Hazrat Shams Tabrizi ka wisaal 8 Rajab 646 Hijri (1248 A.D.) ko hua. Aap ka mazaar Khoy (Iran) mein hai.

ALLAH ta’ala us ke Habeeb sallallāhu alaihi wa sallam ke sadqe mein
Aur Hazrat Shams Tabrizi rahmatullāhi alaihi aur tamaam Auliya Allah ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmaye.
Aameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy