- Advertisement -

Hazrat Makhdoom Zain-ud-deen Ali Mahimi rahmatullahi alaihi

Laqab: Qutb-e-Kokan.

Aap ki wiladat 10 Moharram 776 Hijri (1372 A.D.) mein Mahim, Mumbai hui.

Aap ke waalid ka naam Maulana Shaikh Ahmad bin Ibraheem rahmatullahi alaihi aur Walida Ka Naam Faatima binte Nakhuda Husain Ankolia hai.

Aap Quraish ke Nawait qabeele se ta’alluq rakhte hain.
Hazrat Makhdoom Zain-ud-deen Ali Mahimi rahmatullahi alaihi ke waalid wali ALLAH hain aur unka mazaar Kalyan (Mumbai) mein hai.

Aap ne apne waalid se ta’aleem haasil ki aur Quran, Hadees, Tafseer, Fiq’h, Kalaam, Falsafa, Tasawwuf, Ilm e Istadalaal aur dusre uloom ke maahir hue.

Aap ki umr 9 saal ki hui tab 785 Hijri mein aap ke waalid ka inteqaal hua.

Is ke kuchh arse baad Aap ilm e deen sikhne ke liye Hind ke baahar jaana chaahte the.
Magar apni waalida ko chhodkar jaana nahi chaahte the.

Aap ki waalida ko jab pata chala to unho ne aap ko khaas uloom ata karne ke liye ALLAH ta’ala se dua ki.

Aap roz namaz e fajr ke baad samundar ke kinaare jaate the.

Ek din aap ne dekha ki ek buzurgh shakhs samundar ke kinaare baithe hain.

Unhone ne Hazrat Makhdoom Zain-ud-deen Ali Mahimi rahmatullahi alaihi ko apne paas bulaaya aur farmaya
‘Tumhari maa bahot nek hain aur ALLAH ki wali hain. Us ki dua se Allah ta’ala tumhe ilm ata farmaega. Tum roz namaaz e fajr ke baad mere paas Ilm e deen sikhne ke liye aa jaana. Magar ye baat kisi ko bataana nahi.

Is tarah aap roz Namaz e fajr ke baad samundar kinaare us buzurgh ke paas ilm e deen sikhne ke liye jaate. Wo buzurg Hazrate Khizr alaihis salaam the.

Ek din aap ki waalida ne aap se puchha ‘Bete! Roz subah tum kaha jaate ho?’
Aap tashweesh mein pad gaye kyun ki aap ke ustaad ne aap ko ye raaz kisi ko bataane se mana kiya tha.

Magar aap ne apni waalida ko sach baat bata di.
Dusre din subah jab aap samundar ke kinaare gaye, to Hazrate Khizr alaihis salaam waha nahi the.

Aap ne waapas aakar apni waalida ko bataaya. Unho ne phir se ALLAH se dua ki.
Dusre din jab Makhdoom saahib samundar ke kinaare gaye to Hazrate Khizr alaihis salaam tashreef laaye aur bataaya ki ‘ALLAH ta’ala ne tumhari waalida ki dua qubool ki hai’
Aur phir unho ne aap ko koi cheez khaane ke liye di.

Jaise hi aap ne use khaaya ALLAH ta’ala ne aap ko zameen wa aasman ka tamaam ilm aap ko ata farma diya.

Ek baar namaz e isha ke baad aap ki waalida ne aap ko paani laane ke liye kaha.
Aap paani lekar aaye to dekka ki aap ki waalida so gayi thi. Aap paani ka gilaas lekar wahi khade rahe.

Aap ne socha ki jab ammi jaan ki aankh khulegi aur wo paani maangegi to main foran unhe paani de dunga.

Tahajjud ke waqt jab aap ki waalida ki aankh khuli to aap ne puchha ki ‘Tum ne mujhe jagaaya kyun nahi?’

To aap ne kaha ‘Main aap ki neend mein khalel pahunchaana nahi chahta tha.’
Aap ki waalida ne aap ke liye dua ki ‘Tum meri itni khidmat karte ho ek din tum bhi Makhdoom aur Faqeeh ke naam se mash’hoor honge.’

Hazrat Makhdoom Zain-ud-deen Ali Mahimi rahmatullahi alaihi apna zyada waqt Ibaadat, Riyaazat aur Muraaqaba mein guzaarte.

Aap bahot ameer the. Magar aap apne maal ko ghareebo aur mohtaajo ki madad mein aur mehmaano ki khidmat mein kharch karte.

Gujarat ke Sultaan Ahmad Shah ne aap ko Thane jila ke Qaazi banaaya tha.
Aur apni bahen se aap ka nikaah karaaya tha.

Karamat:
(1) Makhdoom saahib ke ghar mein ek bakari thi. Jo aap ko bahot pasand thi.
Ek baar aap ghar par aaye to us bakari ko na dekha. Aap ne apni waalida ko us ke baare mein puchha.

Aap ki waalida ne bataya ke wo bakari mar gai hai aur hamari khaadima ne use samundar mein phenk diya hai.

Aap foran us khaadima ke saath samundar ke kinaare gaye aur jis gajah par bakari ko phenka tha waha pahunchkar aap ne use ghar waapas jaane ke liye kaha. Wo khaadima waha se gayi aur thoda door jaakar waapas aai.

Jab wo waapas pahunchi to us ne dekha ki Makhdoom saahib us bakari se keh rahe the ‘Chalo utho. Hame ghar jaana hai. Waha ammi jaan intazaar kar rahi hain.’
Us ne dekha ki ye kehte hi ALLAH ke hukm se wo bakari zinda ho gayi aur aap ke saath chalne lagi. Us waqt aap ki umr 10 saal thi.

(2) Ek baar ek hindu vyapaari ka be-shumaar saamaan bhara hua jahaaz Mahim se rawaana hua.
Magar 7 saal tak waapas na aaya. Us ne jyotishi se puchha to us ne bataaya ki jahaaz samundar mein doob gaya hai.

Us ke ek muslim dost ko pata chala to wo use Makhdoom saahib ke paas lekar aaya.
Aap ne use niche baithkar apni aankhein band karne ke liye kaha. Us ke baad aap ne farmaaya ‘Tumhara jahaaz aaj sham ko waapas aa jaayega.

Jab sham ko wo shakhs samundar ke kinaare gaya to us ne dekha ki us ka wo jahaaz jo 7 saal pehle paani mein doob gaya tha wo sab saamaan ke saath kinaare par salaamat aa pahuncha hai. Ye karamat dekhkar us ka tamaam pariwar islaam mein daakhil ho gaya.

(3) Ek baar ek shakhs ko kahi door safar par jaana tha. Us ke paas qeemati heere jawaahirat the.
Us ne socha ki inhe apne saath le jaana theek nahi. Behtar hai ki kisi ke paas amaanat rakh du.

Us ne Hazrat Makhdoom saahib ke baare mein suna tha. Is liye wo aap ke paas aaya aur apne heere jawaahirat unhe diye aur kaha ‘Jab main safar se waapas aaunga to le jaaunga.’
Aap ek kuen ke paas khade the. Aap ne unhe kuen mein phenk diye. Wo kehne laga ‘Ab aap use waapas kaise laayenge?’
Aap ne farmaaya ‘Tum jab chaahoge main tumhe waapas de denga.’ Magar wo nahi maana.

Aap ne kuen mein haath daala aur apni mutthi mein jawaahirat lekar haath baahar nikala.
Ye dekhkar wo sharminda hua aur maafi maangi. Aap ne un mein se kuchh heere use waapas diye aur baaqi ko phir se kuen mein phenk diye.

(4) Ek shakhs Hazrat Makhdoom saahib ke ghar ke qareeb rehta tha. Us ki ek ladki ke saath mangni hui thi aur kuchh dino mein un ki shaadi hone wali thi. Is dauran ek arab taajir ne us ladki ko dekha aur use wo pasand aa gayi.

Wo us ladki ke baap ke paas aaya aur us ladki ke saath shaadi karne ka iraada zaahir kiya.
Us ladki ke baap ne saari baat batai to us arab ne kaha ki main mangni todne ke liye us ladke ko bahut saara maal dene ke liye tayyar hu.

Ye sunkar us ka baap raazi ho gaya. Mohalle mein ye baat fail gayi.
Jab Makhdoom sahib us ladki ke baap ko samjhaane ke liye gaye to us ne kaha
‘Ye ladka aur Arab taajir dono hajj ke liye jaaye aur dono me se jo pehle Mahim waapas aaye us se main apni beti ka nikaah karunga.’

Iske baad wo arab foran hajj ke liye nikal gaya. Magar wo ladka maayoos aur ghamgeen ho gaya.
Makhdoom sahib ne use masjid mein dekha to 2 rak’at nafl namaaz padhne ke liye farmaya.
Jab wo ladka namaz padhkar waapas aaya to aap ne farmaya
Apni aankhein band kar lo aur jab tak main na kahu aankh kholna nahi.’ Us ne aisa hi kiya.

Aap use lekar paani ke hauz ke andar daakhil ho gaye. Aur jab aap ne kaha to us ladke ne aankh kholi to us ne dekha ki wo Makka shareef mein pahunch gaya hai.

Aap ne us se farmaya ‘Jaakar us arab se mil lo magar use ye sab baatein na batana’
Us ne us arab se mulaqat ki. Aur Hajj ke tamaam arqan ada kiye. Phir wo Makhdoom saahib ke paas aaya. Aap ne use phir se Mahim pahuncha diya.

Dusre din jab wo arab waapas aaya to us ne kaha ki ‘Maine us ladke ko Makka mein dekha tha.’
Phir use pata chala ki wo ladka to ek din pehle Mahim pahunch gaya hai. Aur shart ke mutaabiq us ladki ka nikah us ladke ke saath hua.

(5) Ek baar ek majlis mein kuchh nek logo ke darmiyaan baat hui ki HazratMakhdoom saahib ke ghar mein hamesha mehmaan hote hain aur wo un ki bahot khidmat karte hain aur bahot badhiya khaana khilaate hain.

Ek shakhs kehne laga ‘Jo ALLAH ke wali hote hain wo dunya ki cheezo se mohabbat nahi rakhte.’
Bahot samjhaane ke baad bhi wo nahi maana. Unho ne use Mahim jaakar khud dekhne ke liye kaha.

Wo Mahim aakar Hazrat ke ghar par aaya. Aap ne use rehne ke liye ek karma diya.
Aur khaane ka waqt aap bhi us ke saath khaana khaane baithe aur use har cheez ko chakhne ke liye kaha.

Aap thoda pehle khaana khaakar uth gaye aur aap ne waha se machhli ki chand haddiya utha li. Aur haath dhone ke baad aap ne use paani ke bartan meim daal diya.
Jab wo shakhs khaana khaane ke baad haath dhone ke liye gaya to us ne dekha ki us bartan mein haddiyo ke bajay zinda machhliya tair rahi hain.

Ye dekhkar wo saari baat samajh gaya aur Hazrat ki maafi maangi.

Tasannif:
Aap ki likhi hui mash’hoor kitaabien:

(1) Tafseer-e-Rahmani (Tafseer e Quran
(2) Fataawa Makhdoomiya
(3) Fiqah Makhdoomi
(4) lna’am ul Malik-ul Ulam Jahkam Hukm-ul Ahkaam
(5) Awwalat-ut-Tawheed
(6) Ajallat-ut-Ta’id Fee Sharh-e-Adallatu-d-Tawheed
(7) An Noor-ul Athar Fee Kashf-e-Sirr-al Qaza wa Qadar
(8) Az Zawh-ul Azhar Fee Sharh al Noor-ul Azhar
(9) Khusus-un Na’am Fee Sharh-e-Fusus-ul-Hikam
(10) Mashra’al Khusus Fee Sharh-al Fusus-ul-Hikam
(11) Zawarif-ul lataif Fee Sharh-e-Awariful Ma’arif
(12) Azat-ud Daqaiq Sharh-e-Miraat-ul-Haqaa’iq
(13) Tarjuma wa Sharh-e-Lama’t –e-Iraqi
(14) Al Rutbat-ul Rafiatu Feel Jam’a wat Taufeeq bain al Asraar al Haqeeqat wa anwaar ush Shariah
(15) Imhaaz-ul Nashihaat
(16) lsjila’al basar fil radd ala istiqsa’an nazar
(17) Al wajud Fi Sharh-e-Isma’al Ma’bood
(18) Risaala-e-Ajeeba.

Aap Hazrat Shaikh Mohiy-ud-deen Muhammad ibne Arabi rahmatullāhi alaihi ke mureed aur khalifa hain. Aur ‘Maghribi Akbari’ silsila ke shaikh hain.

Aap ke Khalifa Hazrat Shaikh Sayyed Muhammad Kokani‎ rahmatullāhi alaihi hain.

Aap ka wisaal 8 Jamaadi us saani 835 Hijri (February 1431 A.D.) ko Shab e Jum’aa ko hua.

Aap ka mazaar Mahim (Mumbai, Maharashtra) me hai. Aap ka Urs 13 Shawwaal ko manaaya jaata hai.

ALLAH ta’ala us ke Habeeb Sallallahu alaihi wa sallam ke sadqe me
Aur Hazrat Makhdoom Ali Mahimi rahmatullāhi alaihi aur Auliya Allah waseele se
Sab ko mukammal ishq e Rasool ata farmaye aur Sab ke imaan ki hifaazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat mein kaamyaabi ata farmaye aur Sab ki nek jaayez muraado ko puri farmaye.
Aameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy