- Advertisement -

Hazrat Maulana Jalal ud din Muhammad Rumi rahmatullahi alaihi

Aap ki wilaadat 6 Rabi ul Awwal 604 Hijri (30 September 1207 A.D.) ko Vakhsh (maujooda Tajikistan) me hui.
Aapke waalid ka naam Hazrat Sultaan-ul-Ulama Baha-ud-deen Walad Muhammad bin Husain al-Balkhi rahmatullahi alaihi aur waalida ka naam Mo’mina Khaatoon hai.
Aapke waalid aalim aur sufi shaikh the.
612 Hijri (1216 A.D.) me aapke waalid apne pariwaar ke saath Khorasan se Baghdad aaye, phir ek saal baad Damishq (Damascus) aur Halab (Aleppo) aaye.
Phir Hajj ke liye Makka Sharif gaye.
Phir 613 Hijri (1218 A.D.) me Aqshahr (Anatolia) aaye aur 4 saal tak Madrasa me taalim dete rahe.
Phir 619 Hijri (1222 A.D.) me Laranda (Rum) aaye.
Laranda me aapki waalida ka inteqal hua.
621 Hijri (1224 A.D.) me aapka nikah Gauhar Khaatoon se hua.
Phir 626 Hijri (1229 A.D.) me aapke waalid Seljuq Sultaan Ala-ud-deen Kayqubad ki daawat par Konya tashreef laaye aur 2 saal tak Madrasa me taaleem dete rahe.
628 Hijri (1231 A.D.) me aapke waalid ka inteqal hua.
629 Hijri (1232 A.D.) me Hazrat Burhaan-ud-deen Muhaqqiq al-Tirmizi rahmatullahi alaihi Konya tashreef laaye. Aur Maulana Rumi ko ta’aleem dena shuru kiya.
Phir unho ne aapko majeed ta’aleem ke liye Shaam bheja.
Aap ne Halab (Aleppo) Madrassa Halawiyya me aur phir Damishq (Damascus) me ta’aleem haasil ki.
Aap Ilm e Nahaw, Hadees, Fiqh, Tafseer, Falsfa aur Kalaam ke maahir hue.
7 saal baad aap Shaam se Caesarea (Kayseri) aaye.
Yaha Hazrat Burhaan-ud-deen Muhaqqiq al-Tirmizi ne aapko tasawwuf ki taalim dena shuru kiya aur aapko mujahida karne ke liye farmaya.
Aapne 3 martaba lagaatar 40 din tak roze rakhe.
Aapne apne waalid Hazrat Baha-ud-deen Walad ki aur Hazrat Burhaan-ud-deen ki kitaabo ko padhkar bhi ilm haasil karna jaari rakha.
Jab aapki ta’aleem mukammal hui, to Hazrat Burhaan-ud-deen ne aapko Konya jaakar khidmat e deen karne ke liye farmaya.
Aap Konya me apne waalid ke madrasa me wapas aaye aur ta’aleem wa tadreees deen aur Isha’at e Islam karna shuru kiya.
34 saal ki umr tak Aap ek aala darje ke aalim ke taur par mash’hoor ho gaye. Aap ne Fatawa dena bhi shuru kar diya.
638 Hijri (1241 A.D.) me Caesarea (Kayseri) me Hazrat Burhaan-ud-deen Muhaqqiq ka wisaal hua.



Konya wapas aane ke kuch arse ke baad 640 Hijri (1242 A.D.) Aap ki biwi Gauhar Khaatoon ka inteqaal hua.
Iske baad aapne apne beto ko Sharf-ud-deen Samarqandi ki nigraani me ta’aleem ke liye Damishq bhej diya.
642 Hijri (November 1244 A.D.) me Shams Tabrizi rahmatullahi alaihi Konya tashreef laaye.
Ek baar Maulana Jalal ud din Rumi rahmatullahi alaihi bahot saari kitaabein saath rakhkar padh rahe the.
Itne me Hazrat Shams Tabrizi rahmatullahi alaihi waha se guzre.
Unho ne puchha ‘Kya kar rahe ho?’
Unka saada libaas dekhkar Aapne kaha ‘Aap nahi samajh sakenge.’
Unho ne un kitaabo ko lekar qareeb me ek jhil ke andar phenk diya.
Maulana Jalal ud din Rumi rahmatullahi alaihi jab un kitaabo ko paani se baahar nikale, to wo sab bilkul sookhi thi.
Maulana Jalal ud din Rumi rahmatullahi alaihi: ‘Hazrat, ye kaise hua?’
Hazrat Shams Tabrizi rahmatullahi alaihi ne farmaya ‘Ye tum nahi samajh sakoge.’
Ye dekhkar aap samajh gaye ke Hazrat Shams Tabrizi rahmatullahi alaihi ek wali e kaamil hain.
Aap ne din wa raat saara waqt unki sohbat me guzarna shuru kar diya.
Aap apni Mudarris ki aur apne pariwar ki zimmedari bhi bhul gaye.
Jab Hazrat Shams Tabrizi rahmatullahi alaihi ko pata chala ke Maulana Jalal ud din Rumi rahmatullahi alaihi ke shaagird is baat ki wajah se naraaz ho gaye hain, tab Shawwaal 643 Hijri (March 1246 A.D.) me bagair kisi ko bataaye Konya se rawaana ho gaye.
Unke achaanak chale jaane se kuchh waqt tak Maulana Jalal ud din Rumi rahmatullahi alaihi ghamzada ho gaye.
Unho ne Hazrat Shams Tabrizi rahmatullahi alaihi ko waapas aane ke liye bahot saare paighaam bheje.
Aakhir me jab aapke saahbzade Sultaan Walad ko bheje, tab wo Konya waapas aaye.
Unke wapas aane se Maulana Jalal ud din Rumi rahmatullahi alaihi bahot khush hue aur unki sohbat me rehkar faiz haasil karne lage.
Kuch arsa Maulana Jalal ud din Rumi rahmatullahi alaihi ke saath Konya me guzarne ke baad Shams Tabrizi rahmatullahi alaihi phir se Khoy chale gaye. Aap ne unhe bahot talaash kiya magar wo nahi mile.



Phir aapki mulaaaqat Hazrat Salaah-ud-deen Zarkub se hui, jo Sunaar the aur Hazrat Burhaan-ud-deen Muhaqqiq al-Tirmizi ke mureed the.
Aap pehli baar jab unke kaarkhaane ke paas se guzre, to unke auzaar ki aawaaz sunkar aap wajd me kho gaye.
Phir aap unki sohbat me rehne lage Aur unke saath logo ko taalim wa dars karte rahe.
Kuchh waqt baad aap ne apne bete Sultaan Walad ka nikah Salaah-ud-deen Zarkub ki saahabzadi Faatima se karaya.
656 Hijri (December 1258 A.D.) me Salaah-ud-deen Zarkub ka wisaal hua tab aap phir se aalam e wajd me aa gaye.
660 Hijri (September 1262 A.D.) me Aapke saahabzaade Ala-ud-deen ka inteqal hua.
Aap ke mureed aur khalifa Husaam-ud-deen Chelebi ki guzarish par Aapne ek ghazal likhna shuru kiya.
18 asha’ar likhne ke baad aapne unse farmaya ‘Ab aage main bolta jaaunga aur tum use likhte jaana.’
Is tarah 660 Hijri (November 1262 A.D.) se 671 Hijri (1273 A.D.) tak, Husaam-ud-deen Chelebi likhte rahe.
Ye kitaab ‘Maṡnawi-e-Ma’anawi’ naam se mash’hoor hai.
Is dauran Aapne ta’aleem wa dars bhi jaari rakha.
Ek martaba Maulana Jalal ud din Rumi rahmatullahi alaihi ek dukaan par khade the. Ek aurat sauda lene aai. Dukandaar ne sauda dekar usse paise talab na kiye.
Jab wo aurat chali gayi, to Aapne wajah puchhi. Us shakhs ne jawaab diya ‘Mujhe usse mohabbat hai aur mohabbat me hisaab kitab kaisa.’
Yeh sunkar Aap behosh ho gaye. Jab hosh aaya to farmaya ‘Ek teri mohabbat hai jisme hisab kitab nahi aur ek main hu ke ALLAH ke ishq me uski tasbeeh bhi gin gin ke karta hu.’
Tasannif:
Hazrat Maulana Jalal ud din Muhammad Rumi rahmatullahi alaihi ki mash’hoor kitaabein:
(1) Maṡnawi-e-Ma’anawi
(2) Deewaan-e-Shams-e-Tabrizi
(3) Fihi Ma Fihi
(4) Makaatib
(5) Majaalis-e-Sab’ah.
Aqwaal:
Hazrat Maulana Jalal ud din Muhammad Rumi rahmatullahi alaihi farmate hain:
(1) Khwaahisho ke saanp ko shuruat se hi khatm kardo, warna baad me tum dekhoge ke wo bada azdaha ban gaya.
(2) Jab tum khud-garz matlabi nafs ko jeet loge, to tumhare tamaam andhere roshni me tabdeel ho jayenge.
(3) Jab dil ka aa’ina paak o saaf ho jaayega, tum is paani aur mitti ki dunya ke us paar ki taswirein dekh sakoge.
(4) Jab kisi se ikhtilaaf hota hai, ya koi tanqeed karta hai, to tumhare dil me nafrat aur adaavat ka ek chhota kida paida ho jaata hai. Agar tum usi waqt use kuchal nahi dete, to wo bada saanp, ya azdaha ban sakta hai.
(5) Insan ye talaash karta rehta hai ke dusre ke andar khazaana hai, ya kide aur saanp ka bil (burrow) hai. Phir pata chalta hai ke is talaash me usne apna waqt zaaya kar diya aur apni daanish-mandi kho di.
(6) Jo bhi milta hai uske shukr guzaar bano, kyun ki har koi tumhare liye raahnumaai ya hidaayat ke liye bheja jaata hai.
(7) Ye mat socho ke khitaab se hi hiqmat milti hai. Bolne se zyada sunna behtar hai.
(8) Agar tera ilm tujhe makhlooq se mohabbat karna nahi sikhaata to koi jaahil tujh se hazaar darja behtar hai.



Pariwaar:
Hazrat Maulana Jalal ud din Muhammad Rumi rahmatullahi alaihi ki 2 biwiya, 3 saahabzaade aur 1 saahabzaadi hain.
(1) Gauhar Khaatoon bint e Sharf-ud-deen Samarqandi (Nikah 621 Hijri [1224 A.D.]) se
2 saahabzaade : Ala-ud-deen aur Baha-ud-deen Muhammad Sultaan Walad [Wilaadat 623 Hijri (1226 A.D.)].
(2) Kerra Khaatoon se
1 saahabzaade : Muzaffar-ud-deen Ameer Alim Chelebi,
1 saahabzaadi : Malika Khaatoon.
Aap Hazrat Burhaan-ud-deen Muhaqqiq al-Tirmizi rahmatullahi alaihi ke mureed aur khalifa hain.
Aapse ‘Maulawi (Mevlevi)’ silsila jaari hai.
Aapke khalifa Hazrat Zia-ul-Haq Husaam-ud-deen Chelebi rahmatullahi alaihi hain.
672 Hijri (1273 A.D.) me aap beemaar hue. Sultaan apne wazeer aur afsaro ke saath aapki ayaadat ke liye aaya aur 2 tabeebo aapka ilaaj ke liye rakha gaya, magar aap theek na hue.
Aap ka wisaal 6 Jamaadi us Saani 672 Hijri (17 December 1273 A.D.) ko ghuroob e aftaab ke waqt hua 66 saal ki umr me hua.
Aap ka mazaar Konya (Turkey) me hai.
ALLAH ta’ala uske Habeeb sallallahu alaihi wassallam ke sadqe me aur Hazrat Maulana Jalal-ud-deen Muhammad Rumi rahmatullahi alaihi aur tamaam Auliya Allah ke waseele se sabko mukammal ishq e Rasool ata farmaye aur sabke Imaan ki hifaazat farmaye aur sabko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmaye aur Sabki nek jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy