Hazrat Mufti Jalaal-ud-deen Ahmad Amjadi rahmatullāhi alaihi

Laqab:
Faqeeh-e-Millat.

Aap ki wilaadat 1352 Hijri (1933 A.D.) mein Ojha-ganj (Basti) mein hui.
Aap ke waalid ka naam Hazrat Jaan Mohammad bin Abdur Raheem hai.

Aap ke pardaada Rajput the aur musalman hue the. Aur apna naam ‘Muraad Singh’ se ‘Muraad Ali’ rakha tha.

Aap ke waalid Masjid mein Imaam the aur baghair kisi tankhwaah ke khidmat karte the.

Aap ne 7 saal ki Maulana Haafiz Zakariya se Qur’an ki ta’aleem mukammal ki.

Aap 10 saal ki umr me Haafiz e Qur’an hue.

Phir Peerzaada Maulana Abdul Baari saahab aur Maulana Abdur Ra’oof saahab se Faarsi ki 12 kitaaben padhi aur Arabi ki ta’aleem bhi haasil ki.

1367 Hijri (1948 A.D.) mein Majeed ta’aleem ke liye Aap Nagpur gaye aur Madrasa Islaamiya mein Hazrat Allama Arshad-ul-Qaadri se Hadeeṡ aur Fiq’h ki ta’aleem haasil ki.

Ilm e deen sikhne ka itna shauq tha ke din ko kaam karte the taake apne waalid ko madad kar sakein aur maghrib baad der raat tak ta’aleem haasil karte.

24 Sha’abaan 1371 Hijri (19 May 1952 A.D.) ko Aap ko Sanad e Faraaghat ata ki gayi.

Is ke baad Aap Basti aakar Madrasa Qaadria Razawia mein Mudarris bane.

Phir Shoaib ul Auliya Hazrat Muhammad Yaar Ali ki daawat par 1 Zil Hijja 1375 Hijri (10 July 1956 A.D.) ko Baraoon mein Daar-ul-Uloom Faiz-ur-Rasool mein tashreef laaye.

24 saal ki umr mein Aap ne apna pehla Fatawa diya.

Kuch arse mein Aap ka ilm aur fataawa mash’hoor ho gaye.
Phir Aap ne Ojha-ganj mein ‘Daar-ul-Uloom Amjadia Arshad-ul-Uloom’ ki shuruat ki.

In 2 idaaro mein bahot saare talba ne Aap se ta’aleem haasil ki aur Aalim aur Mufti bankar khidmat e deen ka kaam karte rahe.
Aap ne ta’aleem e deen ke zariye islaam aur Ahle sunnat wal jama’at ki azeem khidmat ki.

Tasannif :

Aap ki likhi hui mash’hoor kitaaben :

(1) Fataawa Faiz-ur-Rasool (2 Jild)
(2) Fataawa Faqeeh-e-Millat (2 Jild)
(3) Anwaar-ul-Hadeeṡ
(4) Anwaar-e-Shariat
(5) Aja’ib-ul-Fiq’h
(6) Fiq’hi pehilya
(7) Khutbaat-e-Muharram
(8) Khulfa e Raashideen
(9) Buzurgon ke Aqeede
(10) Nooraani ta’aleem
(11) Islaami ta’aleem
(12) Hajj wa Ziyarat.
(13) Guldasta e Maṡnawi.

Aap ke 3 saahabzaade hain :

(1) Maulana Anwaar Ahmad
(2) Maulana Abraar Ahmad
(3) Maulana Izhaar Ahmad.

29 Jamaadi ul awwal 1378 Hijri (December 1958 A.D.) ko Aap Hazrat Sadr-ush-Shariah Mufti Amjad Ali Aazmi rahmatullāhi alaihi ke mureed hue.
Hazrat Ahsan-ul-Ulama Sayyed Shaah Mustafa Haidar Hasan Barkaati Marehrawi rahmatullāhi alaihi ne Aap ko khilaafat ata farmayi hai.

Aap ka wisaal 4 Jamaadi uṡ Ṡaani 1422 Hijri (23 August 2001 A.D.) ko Shab e Jum’aa 12 : 55 ko hua.

Aap ka mazaar Ojha-ganj (Basti, Uttar Pradesh) mein hai.

ALLĀH ta’ala us ke Habeeb sallallāhu alaihi wa sallam ke sadqe mein
Aur Hazrat Faqeeh-e-Millat Mufti Jalaal-ud-deen Ahmad Amjadi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmaye aur Sab ke imaan ki hifaazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmaye aur Sab ki nek jaa’iz muraado ko puri farmaye.
Aameen.

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy