- Advertisement -

Hazrat Khwaja Sultan Abu Is'haq Ibraheem bin Ad'ham rahmatullahi alaihi

Aapki wiladat 100 Hijri (718 A.D) me Balkh (Afganistan) me hui.
Aapke waalid ka naam Ad’ham bin Mansoor al-Tameemi hai.
Aapke dada aur waalid Khurasan ke Sultaan the.
Hazrat Khwaja Sultan Abu Is’haq Ibraheem bin Ad’ham rahmatullahi alaihi bhi apne waalid ke baad Khurasan ke sultaan bane.
Ek raat ko Aap apne mahel me shaahi bistar par so rahe the.
Achanak chat par kisi ke chalne ki awaaz suni.
Hazrat Khwaja Sultan Abu Is’haq Ibraheem bin Ad’ham rahmatullahi alaihi ne puchha ‘Kaun hai?’
Us shakhs ne kaha ‘Ek dost.’
Hazrat Khwaja Sultan Abu Is’haq Ibraheem bin Ad’ham rahmatullahi alaihi ne puchha ‘Kya kar rahe ho?’
Usne kaha ‘Mera oont kho gaya hai. Use chat par talaash kar raha hu.’
Aapne kaha ‘Kaisi bewakoof jaisi baat kar rahe ho.
Usne kaha ‘Tab tum kaise mulaayam kapde pehankar sone ke bistar par sokar ALLAH ko talaash kar rahe ho?’
Ye sunkar Hazrat Khwaja Sultan Abu Is’haq Ibraheem bin Ad’ham rahmatullahi alaihi be-chain ho gaye aur puri raat so na sake.
Subah ko aap apne darbaar me baithe the, tab ek shakhs maile (ghande) kapde pehne hue waha aaya aur aapke takht ke paas aaya.
Aapne usse puchha ‘Kya chaahte ho?’
Us shakhs ne kaha ‘Main is sarai ko dekhne ke liye aaya hu.’
Aapne kaha ‘Kaisi be-wakoofi ki baat kar rahe ho. Ye mera mahel hai koi sara nahi hai.’
Usne kaha ‘Aap se pehle is mahel ka maalik kaun tha?’
Aapne kaha ‘Mere waalid.’
Usne kaha ‘Unse pehle?’
Aapne kaha ‘Mere daada.’
Usne kaha ‘Un se pehle?’
Aapne kaha ‘Mere pardaada.’
Usne kaha ‘Wo sab kaha gaye?’
Aapne kaha ‘Wo sab is dunya se inteqal kar gaye hain.’
Usne kaha ‘Is tarah ye ek sara hua, jisme ek insaan aata hai aur dusra jaata hai.’
Ye sunkar aapke dil ka aalam badal gaya aur aapne fauran baargaah e Ilahi me tauba ki aur apni tamaam milkiyat aur saltanat ko chhodkar jangal me chale gaye aur Ibadat e Ilahi me lag gaye.
Aap ne Nishapur ke qareeb ek ghaar me 9 saal guzaare.
Aap sirf jumerat ko baahar aate aur lakdiya jama karte aur jumma ke din use bechkar usme se jo raqam milti usme se aadha faqeero ko de dete aur aadhe me se pure hafte tak guzaara karte.
Uske baad aap Makka Shareef tashreef le gaye aur kuchh arse tak waha qayaam kiya.
Yaha aapne Hazrat Sufyan al-Sauri aur Hazrat Fuzail bin Ayaaz rahmatullahi alaihi se mulaaqaat karke faiz haasil kiya.
Aur phir safar karte hue Shaam (Syria) aaye aur wahi par baaqi zindagi guzaari.
Aap tanhai me Ibadat karna zyada pasand farmaate the.
Ek baar Aap Imam E Azam Abu Hanifa rahmatullahi alaihi se mulaqaat ke liye gaye, to unho ne Aapka istaqbaal karte hue ‘Sayyedina Ibraheem’ kehkar bulaya.
Waha maujood kuchh logo ne aitraaz kiya to Imam E azam ne farmaya ‘Hazrat e Ibraheem hamesha yaad e Ilahi me mashgool rehte hain aur hum dunya ke khayalo me masroof rehte hain.’
Ek baar Aap naher ke kinare khaima ke baahar kapde see rahe the, tab kuchh log Aapki baargaah me aaye aur Aapse mulaaqat karne ke baad unho ne Hazrat ko chand sone ki ashrafiya batore hadiya paish ki.
Aapne unhe lene se inkaar kar diya aur faramaya ‘Mujhe iski zaroorat nahi padti.’
Ye sunkar unme se ek shakhs ne farmaya ‘Ye kaise ho sakta hai jab ke aap ne apni tamaam milkiyat ko chhod diya hai?’
Ye sunkar Aapne apni sooi ko naher me daal di.
Phir aapne naher ki taraf ishara kiya to ek machhli apne munh me sone ki sooi lekar baahar aai aur Hazrat ko de di.
Magar aapne faramaya ‘Mujhe meri sooi hi chaahiye.’
Phir ek chhoti machhli munh me aapki sooi lekar aai.
Phir Aapne faramaya ‘Jab main Sultaan tha tab sirf insaano par hukoomat karta tha. Magar ab ALLAH ne apne fazl se uski makhlooq par bhi hukoomat ata farma di hai.’




Ek baar ek shakhs ke paas se guzre wo bahot ghamgeen lag raha tha.
Aap ne usse kaha ‘Main tumhe 3 sawaal puchhta hu tum uske jawaab dena.’
Usne kaha ‘Theek hai.’
Aapne puchha ‘Kya kaainaat me koi baat ALLAH ki marzi ke khilaaf ho sakti hai?’
Us shakhs ne kaha ‘Nahi.’
Phir Aapne puchha ‘ALLAH ta’ala ne tumhara rizq muqarrar kiya hai wo koi kam kar sakta hai?’
Usne kaha ‘Nahi.’
Phir aapne puchha ‘ALLAH ta’ala ne tumhari zindagi muqarrar ki hai usse ek lamhe bhi kam ho sakti hai?’
Usne kaha ‘Nahi.’
Aapne faramaya ‘Tab tumhe is tarah ghamgeen kyun baithna chahiye?’
Ek baar logo ne puchha ‘Hamari duaein qubool kyun nahi hoti hai?
Hazrat Khwaja Sultan Abu Is’haq Ibraheem bin Ad’ham rahmatullahi alaihi ne faramaya ‘Tumhare dil 10 cheezo ki wajah se murda ho gaye hain:
1) Tum ALLĀH ko jaante ho, magar uski sahi Ibadat ke zariye uske huqooq ada nahi karte.
2) Tum ALLAH ke Rasool Sallallahu alaihi wassallam ke ummati hone ka aur unse mohabbat ka daawa karte ho, magar unki Sunnat par amal nahi karte.
3) Tum ALLAH ki kitaab (Qur’an majeed) ko maanne ka daawa karte ho, magar uske ahkaam par amal nahi karte.
4) Tum ALLAH ta’ala ki ata ki hui ne’amatein khaate ho, magar uska shukr ada nahi karte.
5) Tum jaante ho ke shaitaan hamara dushman hai, magar uske makr o fareb se bachne ki koshish nahi karte.
6) Tum jaante ho ke maut barhaq hain, magar marne ke baad qabr ke liye koi tayyaari nahi karte.
7) Tum Jannat ko paane ki khwaahish rakhte ho, magar uske liye nek amal karke nahi karte.
8) Tum Jahannam se darte ho, magar us se bachne ke liye koi tayyari nahi karte.
9) Tum apne rishtedaaro aur dosto ko marne ke baad qabr me dafn karte ho, magar isse koi naseehat nahi lete.
10) Tum jaante ho ke tum me bhi aib hai, magar hamesha dusro ke aib talaash karte ho.
Ab socho tumhari dua kaise qubool hogi.




Ek shakhs ne kuchh nasihat ke liye kaha to Aap ne faramaya
“Jab tum gunaah karne ka irada karo to 6 baatein yaad rakhna : ALLAH ta’ala ka ata kiya hua rizq khaana chhod dena, uske mulk se baahar nikal jaana, ya aisi jagah chale jaana jaha Rab ta’ala tumhe na dekh raha ho, maut ke waqt malik-ul-maut ko tauba ke liye kuch lamho ki mohlat dene ke liye kehna, munkar nakir ko apni qabr me aane se mana farma dena, jab jahannam me daale jaao to usme jaane se inkaar kar dena.”
Wo shakhs ta’ajjub ke saath bola “Aisa to koi bhi nahi kar sakta.”
Aapne farmaya “Agar ye sab tumhare liye mumkin nahi, to gunaah karna chhod dena hi behtar hai.”
Yeh sunkar us shakhs ne fauran tauba karli. Aur wahi par uska inteqal ho gaya.
Hazrat Khwaja Sultan Abu Is’haq Ibraheem bin Ad’ham rahmatullahi alaihi faramaya karte the ke: Mere paas 4 sawaariya hai.
1) Jab koi Ne’amat milti hi to ‘Shukr’ ki sawaari par sawaar hokar khuda ke saamne jaata hu.
2) Jab Ibadat ka waqt aaye to ‘Khulus’ ki sawaari par sawaar ho jaata hu.
3) Jab koi Musibat ya Balaa aaye to ‘Sabr’ ki sawaari par sawaar ho jaata hu.
4) Jab koi Gunaah ho jaata hai to ‘Touba wa Istigfaar’ ki sawaari par sawaar hokar uske huzur pesh ho jaata hu.
Ek martaba Aap raaste se guzar rahe the.
Aapne ek sharaabi ko dekha jo sharaab ke nashe me raah me pada hua tha aur be-hoshi ke aalam me bahot bakwaas kar raha tha.
Aap uske paas thehar gaye aur farmaya ‘Yeh zabaan to zikr e haq ke liye thi. Ise kaun si aafat pahunchi ki yeh aise bakwaas kar raha hai?’
Phir Aapne paani mangwaaya aur uska munh aur zabaan dhone lage.
Aur phir aage tashreef le gaye.
Sharaabi hosh me aaya to logo ne use saara qissa sunaaya.
Sharaabi ko jab pata chala ke Hazrat Ibraheem bin Ad’ham mera munh aur zabaan dho gaye hain.
Wo rote hue kehne laga ‘Ilahi ! Tere maqbool bande ki sharm khaakar main sache dil se tauba karta hu. Tu apne maqbool bande ke tufail mujhe baksh de.’
Raat ko Hazrat Ibraheem bin Ad’ham ne khwaab me dekha ki koi kehne waala keh raha hai ‘Aye Ibraheem! Tune hamari khaatir us sharaabi ka munh dhoya. Hum ne tumhari khaatir uska dil dhoya.’




Aqwaal:
Hazrat Khwaja Sultan Abu Is’haq Ibraheem bin Ad’ham rahmatullahi alaihi farmate hai.
1) Agar koi ALLAH ke dost (wali) banna chaahta ho to use apne dil me se dunya aur aakhirat dono ki khwaahishaat nikal deni chaahiye aur sirf uski taraf tawajjoh rakhna chaahiye taake ALLAH uski taraf tawajjoh kare aur apne fazl se use wali bana de.
2) Apna batwah kholo (ya’ani apna maal nek kaam me kharch karo) aur apni zabaan band rakho (ya’ani fahash kalaami aur bad-zabaani se door raho).
Aap Hazrat Khwaja Fuzail bin Ayaaz rahmatullahi alaihi ke mureed aur khalifa hain.
Hazrat Imam Sayyed Mohammad al-Baaqir rahmatullahi alaihi ne bhi Aapko khilaafat ata farmai hai.
Aapka silsila ‘Ad’hamiya’ kehlaata hai.
Hazrat Khwaja Sultan Abu Is’haq Ibraheem bin Ad’ham rahmatullahi alaihi ke khulfa:
1) Hazrat Khwaja Sadeed-ud-deen Huzaifa Mir’ashi rahmatullahi alaihi.
2) Hazrat Khwaja Shafeeq al-Balkhi rahmatullahi alaihi.
Aapka wisaal 26 Jamaadi ul awwal 165 Hijri (782 A.D.) ko hua.
Aap ka mazaar Jableh (Syria) me hai.
ALLAH ta’ala uske Habeeb Sallallahu alaihi wassallam ke sadqe me
Aur Hazrat Khwaja Sultaan Ibraheem bin Ad’ham rahmatullahi alaihi aur tamaam Auliya Allah ke waseele se
Sab ko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sabko dunya wa aakhirat me kaamyaabi ata farmaye aur Sabki nek Jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy