Hazrat Shaikh Sayyed Ahmad Kabeer Rifai rahmatullāhi alaihi

Alqaab :
‾‾‾‾‾‾‾‾
Qutb-ul-aqtaab, Sultaan-ul-aarifeen, Sartaaj-e-Auliya, Shaikh-e-Kabeer, Abul Alamain (Father of Two Banners).

Hazrat Shaikh Sayyed Ahmad Kabeer Rifai rahmatullāhi alaihi ki wilaadat 15 Rajab 512 Hijri (1119 A.D.) mein Jum’eraat ko Umme Ubaida, Basra (Iraq) mein hua.

Aap ke waalid ka naam Sayyed Ali bin Yahyā Nakib Bukhari aur waalida ka naam Faatima binte Yahyā al-Ansaari Nijjeri hai.

Aap Husaini saadaat hain.

Aap ki wilaadat se pehle Huzoor sallallāhu alaihi wa sallam ne Shaikh Mansoor Rabbaani rahmatullāhi alaihi ko khwaab mein aakar bashaarat di ke ‘Tumhari bahen ke yaha beta paida hone waala hai. Jo wali e kaamil hoga aur Rifai ke naam se mash’hoor hoga.’

Aap ki umr 7 saal ki hui tab Baghdad mein aap ke waalid ka inteqaal hua.

Is ke baad Aap ke maamu Shaikh Mansoor Rabbaani Aap ko Dikhla (Tigris) le gaye aur unho ne Aap ki parwarish ki.

Aap ne Abdus Sami al-Hurbuni se Qur’an ki ta’aleem haasil ki aur Haafiz e Qur’an hue.

Phir Shaikh Mansoor Rabbaanaai ne Aap ko Shaikh Ali al-Waasiti ke paas ta’aleem ke liye bheja.
Aap bahot zaheen the. Aur kam umr mein sab ta’aleem haasil ki.

Aap ne Shaafi mazhab ki fiq’h ki kitaab ‘Tanbih’ ki tafseer likhi.

20 saal ki umr mein Shaikh Abu Fazl Ali al-Waasiti ne Aap ko khilaafat ata farmayi.

Kuchh waqt Nehre Dikhla (Tigris) par rahe aur phir Umme Ubaida (Hasen) aakar apne waalid ke musafir-khaane (sara) mein qayaam kiya.

Hazrat Shaikh Mansoor Rabbaani rahmatullāhi alaihi ke wisaal ke kuchh waqt pehle un ki zauja mohtarma ne arz kiya ‘Khilaafat ke liye wasiyat farma den.’

Shaikh Mansoor Rabbaani ne apne bete aur bhaanje Ahmad Kabeer Rifai ko bulwaaya aur dono se farmaaya ‘Khajoor ke patte lekar aao.’

Beta bahot se patte kaat kar le aaya. Magar Hazrat Ahmad Kabeer Rifai koi patta na laaye. Wajah puchhi to arz kiya ke ‘Maine sab ko ALLĀH ki tasbeeh karte hue paaya, isi liye kisi patte ko nahi kaata.’

Hazrat Shaikh Mansoor Rabbaani rahmatullāhi alaihi muskuraye aur apni zauja ki taraf dekhkar farmaaya ‘Maine bhi kai martaba apne khalifa ke liye dua ki to har martaba yehi farmaaya gaya ke tumhara khalifa tumhara Bhaanja hai.’

28 saal ki umr mein Aap ke maamu Shaikh Mansoor Rabbaani ne apne wisaal ke kuchh arse pehle Aap ko khilaafat ata farmaai aur un ke madrasa ki zimmedaari di.

Aap ne tamaam zindagi logo ko Qur’an wa Shariat aur Hadeeṡ o Sunnat ki ta’aleem dena jaari rakha.

Kai baar aap ki masjlis mein hazaaro ki ta’adaad mein log jama hote the.

Log Aap se kitne bhi alag alag sawaal karein Aap baghair pareshaan hue un ko jawaab dete the.

Aap Aqtaab e araba (4 Major Qutubs) me se hain.
Aap ko Qutub e waqt (Qutub of the time, not just of a local area) ka martaba mila hai. Ya’ni Aap sirf kisi ilaaqe, ya mulk ke Qutub nahi the, apne daur mein tamaam dunya ke Qutub the.

555 Hijri mein Hazrat Ahmad Kabeer Rifai rahmatullāhi alaihi Hajj ke liye gaye aur Makka mein Hajj ke arkaan ada karne ke baad aap Madeena shareef pahunche.

Ek roz Asr ki namaaz ada karne ke baad aap Ghauṡe aazam Abdul Qaadir Jeelaani radiy-Allāhu ta’ala anhu aur deegar Auliya Allāh aur Ulama e kiraam ke saath Huzoor Sarkare Madeena sallallāhu alaihi wa sallam ke Roza e anwar par salaam pesh karne gaye.

Aap ne Huzoor Rasool-Allāh sallallāhu alaihi wa sallam ko is tarah salaam kiya ‘Assalaamu alaikum wa rahmatullāhi Ya Jadadi’.

Roza Mubarak ke andar se jawab aaya ‘Wa alaikum assalaam wa rahmatullāhi Ya Waladi’.

Ya’ni ‘Aur tum par bhi salaam aur ALLĀH ki rahmat ho, Aye mere bete’.

Aur saath mein sunaheri jaaliyo mein se noorani haath bahar aaye aur Hazrat Ahmad Kabeer Rafai rahmatullāhi alaihi ne aap sallallāhu alaihi wa sallam ke daste mubarak ko chuma aur phir wo haath Roza mubarak ke andar chala gaya.

Aap hamesha apna kaam khud karte the.
Aap hamesha mareezo, na-bina, ghareebo, mohtaajo, yateemo, jaeefo, buzurgo ki khidmat mein lage rehte.

Aap farmaate the ki ‘Makhlooq par raham karna ye ek aisi sifat hai ki jo bande ko ALLĀH ta’ala ke qareeb karti hai’

Aap masjid mein se baahar nikalte waqt andhe logo ko unke joote talaash karke pehanne mein madad karte aur unko unke ghar pahunchate, ya un ko raasta batate.

Aap buzurgo ki izzat karte aur logo ko bhi kehte ke ‘Huzoor Rasool-Allāh sallallāhu alaihi wa sallam ne farmaaya hai ki Jo buzurgo ki izzat karega ALLĀH ta’ala uski zaroorat ke waqt aise log ata farmaega jo us ki izzat karein.’

Aap juzaam (leprosy) ki beemaari walo ki khidmat karte, un ke saath waqt guzaarte aur un ke liye dua karte, un ke kapde dhote, un ko saaf karte, un ke liye khaana laate.

Thandi ke mausam mein aap yateemo, beemaaro, ghareebo aur mohtaajo ke ghar par jalaane ke liye lakdiya dene ke liye jaate.

Aap aalimo ki bahot ta’azeem karte the aur farmate ki ‘Aalim qaum ke raahnuma hote hai.’

Aap logo ko un logo ki sohbat se door rehne ke liye farmaate jo bad-tameez ho, takabbur wale ho aur jo logo se bin zaroori bahes karte ho.

Aap logo ko mubaah kaam mein bhi zyadati karne se bachne ke liye farmaate jaise zyada khaana aur zyada sona.

Aap raat ka aksar waqt Ibaadat o riyaazata aur Tilaawate Qur’an aur Zikre ilāhi mein guzaarte the.

Karaamat :
‾‾‾‾‾‾‾‾‾‾‾
(1) Haddadiya mein ek aurat ko mare hue bachche paida hote the. Us ne dua ki ke ‘Agar mujhe aulaad hogi to main use Ahmad Kabeer Rifai ki khidmat mein de dungi.’

Kuchh arse baad use ek ladki paida hui, magar wo kubaani aur langdi thi. Is wajah se gaanv ke ladke us ka mazzaaq udate the.

Ek baar Hazrat Ahmad Kabeer Rifai us gaanv mein aaye to sab log un ki ziyarat ke liye pahunche. Wo ladki Hazrat ke qadmo mein gir gayi aur rote hue kaha ‘Aap meri waalida ke peer hain. Mujhe is pareshaani se najaat dila dijiye.’

Aap ko raham aa gaya aur aap ne dua ki aur apna haath us ki pusht par aur sar par pher diya. Fauran ALLĀH ke fazl se us ladki ki peeth aur pair durust ho gaye.

(2) Ek baar Hazrat Ahmad Kabeer Rifai ke bhaanje Hazrat Abul Farah bin Ali rahmatullāhi alaihi aap ke paas malfoozaat (naseehat) sunne ki niyyat se baithe the.

Itne mein ek shakhs waha aaya. Hazrat ne use Marhaba kaha. Us ne kaha ‘Maine 20 roz se kuchh khaya peeya nahi hai. Main chahta hu ke mujhe khaane peene ke liye kuchh mil jaaye.’

Aap ne farmaya ‘Tumhari khwahish kya hai?’ Us ne aasman ki taraf nigaah uthai to dekha ke 5 Murgaabiya (ek parinda) udti hui ja rahi hain. Us ne Kaha ‘Kaash un mein se ek mujhe bhuni hui mil jaaye, jis ke saath gehu ki rotiya aur thande paani ka maskija bhi ho.’

Ye sunkar aap ne farmaaya ‘Ye murgaabiya tere liye hi hain.’ Phir aap ne udti hui murgaabiyo ki taraf dekhkar farmaaya ‘Is shakhs ki khwaahish jaldi puri kar do.’

Jaise hi aap ne ye kaha ke fauran un murgaabiyo mein se ek bhuni hui aap ke paas aakar giri. Phir aap ne apne pehlu mein pade hue 2 pattharo ko haath mein liye to wo behtareen qism ki gehu ki rotiya ban gaye.

Phir aap ne apna haath fiza mein buland kiya to surkh rang ka thande paani se bhara hua ek maskija aap ke haath mein aaya.

Jab wo shakhs kha pee kar chala gaya, to Hazrat ne Murgaabi ki haddiyo ko baayein haath mein lekar us par apna daahina haath phera aur farmaya ‘Aye haddiyo aur paththo khuda ke kukm se aapas mein jud jaao.’

Phir aap ne ‘Bismillāhir rahmānir raheem’ padhi to wo murgaabi zinda ho gayi aur hawa mein udti hui chali gayi.

(3) Ek baar Jum’aa ko Aap sokar uthe to dekha ki Aap ke kurte par billi so rahi hai. Aap ne apni biwi ko qainchi dene ke liye kaha aur kurte ka utna hissa kaat daala aur namaaz ke liye chale gaye.

Aap jab waapas aaye to wo billi waha se chali gai thi. Aap ne wo kurte ka tukda uthaya aur apni biwi ko use silkar kurte mein lagane ke liye kaha.

Jab aap ne apni biwi ki naraazgi dekhi to aap ne farmaya ‘Fikr mat karo. Jo hua hai achha hi hua hai aur mujhe is ki wajah se koi pareshaani nahi hui hai. Ye achha kaam tha.’

Ek martaba Aap jaa rahe the aur ek tiddi Aap ke kapdo par baith gayi to jab tak tiddi ud na gayi Aap usi jagah dhup mein thehre rahe aur phir farmaaya ‘Is ne hum se saaya haasil kiya.’

Ek baar Aap ne khaarish zada (khujli wale) ek kutte ke ilaaj mein 40 din guzaare. Logo ne jab puchha ki ‘Aap ne ek wehshi jaanwar ke liye itna waqt kyun guzaara?’

To aap ne farmaaya ‘Agar ye mar jaata to jab main apne khaaliq se milta aur wo puchhta ki tum ne meri makhlooq ki madad kyun nahi ki to main kya jawaab deta.’

Aqwaal :
¯¯¯¯¯¯
(1) Tareeqat aur Shariat alag alag nahi ho sakte magar saath saath hote hai. Agar Shariat sahi nahi to Tareeqat bhi sahi nahi hogi.

(2) Adab ALLĀH ta’ala ka ata kiya hua noorani taaj hai. Jo ise pehan leta hai wo buraai se mehfooz ho jaata hai. Taqwa jis darwaaze se aata hai wo Adab kehlaata hai.

Tasannif
‾‾‾‾‾‾‾‾‾‾‾‾
Aap ki likhi hui mash’hoor kitaabein:
(1) Al-Burhaan-ul-Moeed
(2) Al-Nzaam ul Khaas li Ahlil Ikhtisaas
(3) Al-Ahzaab ul Rafia
(4) Al-Hakam ul Rafia.

Aap ki nasl Sayyed Zia-ud-deen Mohammad Madyan se jaari hai.
(Aap ke dusre beto ka bachpan mein hi inteqaal ho gaya.)

Aap ki 2 betiya hain :
Sayyeda Faatima aur Sayyeda Zainab.

Aap Hazrat Shaikh Abul Fazl, Ali al-Waasiti rahmatullāhi alaihi ke mureed aur khalifa hain.

Hazrat Shaikh Mansoor Rabbaani rahmatullāhi alaihi ne bhi Aap ko khilaafat ata farmai hai.
Aap se Tareeqat ka ‘Rifaeeya’ silsila jaari hai.

Aap ke Khulfa :
(1) Hazrat Sayyed Zia-ud-deen Mohammad Madyan rahmatullāhi alaihi
(2) Hazrat Sayyed Izz-ud-deen Ahmad rahmatullāhi alaihi
(3) Hazrat Sayyed Ali Mirbaaz rahmatullāhi alaihi.

Aap ka wisaal 22 Jamaadi ul awwal 578 Hijri (1183 A.D.) ko Jum’eraat ke din hua.

Aap ka mazaar Wasit, Basra (Iraq) me hai.

ALLĀH ta’ala us ke Habeeb sallallāhu alaihi wa sallam ke sadqe mein
Aur Hazrat Sayyed Ahmad Kabeer Rifai rahmatullāhi alaihi aur Ahle bait ke aur Auliya Allāh ke waseele se
Sab ko mukammal ishq e Rasool ata farmaye aur Sab ke imaan ki hifaazat Farmaye aur Sab ko nek amal karne ki taufiq ata farmaye.

Aur Sab ko dunya wa aakhirat mein kaamyaabi ata farmaye aur Sab ki nek jaa’iz muraado ko puri Farmaye.
Aameen.

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy