- Advertisement -

Hazrat Khwaja Sayyed Siraaj-ud-deen Chishti rahmatullahi alaihi

Alqaab: Siraaj-ul-Auliya, Makhdoom-ul-Millat.
Aapki wiladat Dehli me hui.
Aapke waalid ka naam Hazrat Khwaja Sayyed Kamaal-ud-deen Allama Chishti rahmatullahi alaihi hai.
Hazrat Khwaja Sayyed Siraaj-ud-deen Chishti rahmatullahi alaihi Hussaini saadaat hain.
Aapne apne waalid se Quran majeed ki aur dusre uloom ki taaleem haasil ki.
Aapne Hazrat Allama Ahmad Thanesari aur Maulana Aalam Panipati rahmatullahi alaihi se bhi taaleem haasil ki.
Aap bachpan se hi Ibadat o Riyaazat aur Muraqaba wa Mujahida me waqt guzarna pasanad farmate.
Aap ‘Aalim al Dahr (Scholar of the continent)’ ke naam se mash’hoor hain.
Hazrat Khwaja Naasir-ud-deen Chiraag e Delhi rahmatullahi alaihi ke wisaal ke baad ek martaba Delhi me ulama ki mehfil Hazrat Makhdoom Jahaaniyan Jahaangasht rahmatullahi alaihi se Aap ki mulaaqaat hui.
Hazrat ne aapko bahot mushkil sawalat kiye.
Aapne har sawal ka bakhubi jawab diya, jisse Hazrat Makhdoom Jahaaniyan Jahaangasht rahmatullahi alaihi mutmaeen ho gaye.
Mehfil khatm hone ke baad Hazrat Makhdoom Jahaaniyan Jahaangasht ko pata chala ke Aap Hazrat Khwaja Sayyed Kamaal-ud-deen Allaama rahmatullahi alaihi ke farzand hain.
Uske baad Hazrat Makhdoom Jahaaniyan Jahaangasht Aap se mile aur kaha ke ‘Hum aap ke waalide buzurghwaar ke shaagird hain aur Hazrat Khwaja Naasir-ud-deen Chiraag e Delhi rahmatullahi alaihi ne jo Khilafat naama mujh ko ata farmaya hai wo bhi aapke waalid saahab hi ke qalam se likha hua hai.’
Ek martaba Delhi ke sultaan Firoz Shaah ne 7000 Rupaye bataure nazrana zaade raah ke liye bheje aur aapko Deccan tashreef le jaakar waha taaleem wa isha’at e deen karne ke liye guzarish ki.
Aapne nazrana lene se inkaar kar diya aur raqam waapas bhej di.
Hazrat Khwaja Sayyed Siraaj-ud-deen Chishti ne Patan (Gujarat) me taaleem e deen aur khidmat e khalq me zindagi guzaari.



Aap Hazrat Khwaja Sayyed Kamaal-ud-deen Allama Chishti rahmatullahi alaihi ke mureed aur khalifa hain.
Hazrat Khwaja Naasir-ud-deen Chiraag e Delhi rahmatullahi alaihi ne bhi Aapko 4 saal ki umr me khilafat ata farmayi hai.
Aap ‘Chishti Naasiri’ silsila ke shaikh hain.
Hazrat Khwaja Sayyed Siraaj-ud-deen Chishti ke khalifa (Aap ke saahbazaade) Hazrat Khwaja Sayyed Mohammad Ilm-ud-deen Chishti rahmatullahi alaihi hain.
Hazrat Khwaja Sayyed Siraaj-ud-deen Chishti ka wisaal 21 Jamaadi ul awwal 817 Hijri (August 1414 A.D.) ko hua.
Aapka mazaar Patan (Gujarat) me hai.
ALLAH ta’ala uske Habeeb Sallallahu alaihi wasallam ke sadqe me
Aur Hazrat Khwaja Sayyed Siraaj-ud-deen Chishti rahmatullahi alaihi aur tamaam Auliya Allah aur Ahle bait ke waseele se Sabko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sabko dunya wa aakhirat me kaamyaabi ata farmaye aur Sabki nek Jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy