- Advertisement -

Hazrat Sayyed Badi-ud-deen Ahmad Madaar Shah rahmatullahi alaihi

Alqaab:

Qutb-ul-Madaar, Zinda Shaah.

Hazrat Sayyed Badi-ud-deen Ahmad Madaar Shah rahmatullahi alaihi ki wilaadat 1 Shawwal 242 Hijri (August 839 A.D.) mein Halab (Shaam/Syria) mein hui.

Aap ke waalid ka naam Hazrat Sayyed Qidwat-ud-deen Mehzar Ali Halbi ibn Sayyed Baha-ud-deen Manaazar Ali rahmatullahi alaihi aur waalida ka naam Bibi Haajra binte Sayyed Abdullah Aazami rahmatullahi alaihi hai.

Hazrat Sayyed Badi-ud-deen Ahmad Madaar Shah rahmatullahi alaihi ke waalid Husaini saadaat hai aur waalida Hasani saadaat hain.

Aap ki waalida agar be-wuzu hoti to aap doodh nahi pite the.

Agar aap kisi wajah se ro rahe hote aur Azaan ki aawaz suntein to fauran khaamosh ho jaate aur puri Azaan suntein.

Isi tarah agar koi Tilawat e Quran kar raha ho, to aap khaamoshi ke saath sunte.

4 saal 4 maah aur 4 din ki umr mein Bismillah khwaani ke baad Aapke waalid ne Hazrat Khwaja Sadeed-ud-deen Huzaifa al-Mar’ashi ke paas ta’aleem ke liye rakha.

Aap Arabi ke har harf ke baarein mein gehra mutaalah karke sikhne lage.

Ek baar Hazrat Khwaja Huzaifa al-Mar’ashi ko Huzoor sallallāhu alaihi wa sallam ne khwaab mein farmaya ke ‘Ye ladka ALLAH ta’ala ka wali hai aur meri aal mein se hai. Tum is ka khas khayaal rakhna.’

14 saal ki umr mein Hazrat Sayyed Badi-ud-deen Ahmad Madaar Shah rahmatullahi alaihi Hafiz e Qur’an hue.

Aap Hadeeṡ, Tafseer, Fiq’h aur dusre uloom ke bhi maahir hue.

Iske baad Aap apne waalidain se ijazat lekar Hajj ke liye rawaana hue. Aap ne apne saath kuch bhi saamaan nahi liya.

Raaste mein jab aap Baitul Muqaddas par pahunche to Hazrat Baayazeed Bustami rahmatullahi alaihi apne mureedo ke saath waha tashreef farma the.
Hazrat Baayazeed Bustami rahmatullahi alaihi ne aap ki peshani chumkar farmaaya ‘Huzoor sallallahu alaihi wa sallam ne mujhe khwaab mein bashaarat di hai ke bahot jald tumhari mulaaqaat Badi-ud-deen Ahmad naam ke ek shakhs se hogi. Jab tum use milo to tum ne jo ilm haasil kiya hai wo use ata kar dena ke ye uska haq hai. Isliye main iske liye tayyaar hu.’

Is tarah Aap Hazrat Baayazeed Bastami ke mureed hue aur Tayfuria silsila mein daakhil hue.

Phir peer ki ijaazat lekar Hajj ke liye rawaana hue.

Ek baar Hazrat Sayyed Badi-ud-deen Ahmad Madaar Shah rahmatullahi alaihi Baitullah ka tawaf kar rahe the ke ghaib se aawaaz sunai di ke

‘Aye Badi-ud-deen! Ab tumhe Madina ke liye nikalna chahiye.’

Ye sunkar Aap fauran Madina ke liye rawaana ho gaye.

Jab aap Roza mubarak par pahunche aur Huzoor sallallahu alaihi wa sallam ko salaam pesh kiya to Roza mubarak ke andar se Aap ko jawaab mila.

Kuchh din Madina mein guzarne ke baad aap waapis aaye aur Hazrat Ali Halbi ke paas charo aasmaani kitaabo ka ilm haasil kiya aur ilaawa inke dusri kitaabo ka ilm bhi haasil kiya.

Phir Aap Huzoor sallallahu alaihi wa sallam ke hukm se Hindustan ke liye rawaana hue.

Safar mein Hazrat Sayyed Badi-ud-deen Ahmad Madaar Shah rahmatullahi alaihi roz Roza rakhte the.

ALLAH ta’ala ki taraf se roz aap ko 2 roti ata ki jaati, jisme se ek aap khairaat mein de dete.

Is tarah Aap jahaaz se Yemen hote hue Hindustan tashreef laaye.

Hazrat Sayyed Badi-ud-deen Ahmad Madaar Shah rahmatullahi alaihi Surat (Gujarat) shaher mein pahunche.

Yaha Aap ne Muslim aur Ghair-muslim sab ko Islam ki sahi ta’aleem dena shuru kiya.

Phir kuchh arse baad Hazrat Sayyed Badi-ud-deen Ahmad Madaar Shah rahmatullahi alaihi Khambhat tashreef le gaye.

Yaha Aap ki ta’aleem se Raja Jaswant Singh ne Islam apnaaya, Aapne uska naam Jaffar Khan rakha. Usne kai Masjiden banayi.

Phir Hazrat Sayyed Badi-ud-deen Ahmad Madaar Shah rahmatullahi alaihi ne Bhedoch jaakar qayaam farmaya.

Phir Khambhat se jahaaz mein Hajj ke liye tashreef le gaye. Waha se Iraq aur Bukhara hokar Shaam gaye.

Phir Hindustan aakar Ahmedabad gaye. Yaha Raja Balwaan Singh ne Islam apnaaya aur Aapne uska naam Zoraawar Khan rakha.

Phir Khambhat aakar jahaaz mein Hajj ke liye gaye. Waha se Iraq gaye aur Hazrat e Ghaus e aazam radiy-Allāhu ta’ala anhu se mile.

Us waqt Ghaus e aazam ke jalaal ka ye aalam tha ke koi insaan Aapke saamne nahi thehar sakta tha aur koi parinda Aapke upar se guzar nahi sakta tha.

Agar koi parinda aasmaan mein Aapke upar se guzarta to jalkar mar jaata.

Aap ne Ghaus e aazam se farmaaya ‘Humare naana jaan to rahmattallil aalameen kehlaate hain.’

Yeh sunkar Ghaus e paak ne khud ko badal diya aur sukoon waale ban gaye.

Phir Hazrat Sayyed Badi-ud-deen Ahmad Madaar Shah rahmatullahi alaihi Badkhashan hokar Misr pahunche.

Yaha pure ilaaqe mein koi beemaari phail gayi thi aur Hakeem Ahmad Misri ke ilaaj se bhi logo ko shifa nahi mil rahi thi.

Aap ne Hakeem Ahmad Misri se farmaaya ‘Ye beemaari ALLAH ki na-farmaani aur gunahao ki wajah se hai. Yaha ke log yateem bachcho ka maal chhin lete hain.’

Ye sunkar usne fauran tauba 500 Reasons Turmeric May Be The World’s Most Important Herb oral steroids online muscle the giants at the heart of the opioid crisis karli aur Aapka mureed ban gaya.

Hazrat Sayyed Badi-ud-deen Ahmad Madaar Shah rahmatullahi alaihi ki naseehat se dusre ilaaqe ke logo ne bhi yateemo ka maal lautana shuru kar diya.

Phir Aapki dua se ALLAH ta’ala unko is beemaari se najaat ata farmai.

Phir Hazrat Sayyed Badi-ud-deen Ahmad Madaar Shah rahmatullahi alaihi Neem Roz gaye aur Yaha Hazrat Shaah Lutfullah Aap ke mureed hue. Aap ne unhe ta’aleem e deen ke liye Najaf bheja.

Phir aap Hindustan aakar pure ilaaqe ka aur Sri Lanka mein bhi gasht karte rahe.

Hazrat Sayyed Badi-ud-deen Ahmad Madaar Shah rahmatullahi alaihi jab Ajmer pahunche to logo ne aapko waha se chale jaane ke liye kaha aur kaha ke ‘Yaha jang mein bahut saare musalman mar gaye hain aur Taraghadh par unki laashein padi hai aur raat ko waha se Allahu akbar (takbeer) ki aawaaz aati hai.’

Hazrat Sayyed Badi-ud-deen Ahmad Madaar Shah rahmatullahi alaihi ne logo se farmaaya ‘Agar main is pareshani ko door kar du to tum meri baat maanoge?’
Logo ne kaha ‘Zaroor.’

Aapne apne shaagirdo ko bhejkar un shohada ko janaza padhakar dafn karne ke liye kaha. Iske baad wo aawaaze aana band ho gaya. Logo ka khauf door hua aur unko itminan hua aur sab ne musalman hokar Hazrat se bai’at ki.

Jab Aap Lucknow pahunche to ek shakhs ne aakar arz kiya ke ‘Meri biwi 4 mahine se beemaar hai aur aap uski sehat ke liye dua karein.’

Aap ne use Makhdoom Shaah Meena se milne ke liye kaha aur saath me apne shaagird Shaikh Shahaab-ud-deen ko jaa-namaaz aur ek thaili di aur farmaaya ‘Hazrat Qawaam-ud-deen ki dargaah par jaakar Shaah Meena ko ye do cheezein dena aur unko dua karne ke liye kehna.’

Jab wo log us aurat ko lekar waha pahunche to dekha ke Shaah Meena abhi bachche hain. Unho ne dono cheezein unko dekar saari baat batayi.

Shah Meena wazu karke jaanamaz par khade hue to aap ke pair kaampne lage. Unho ne Shaikh Shahaab-ud-deen ko dua karne ke liye kaha. Unho ne inkaar kiya magar israar aap ke karne par Shaah Meena ne Dua ki aur Shaikh Shahaab-ud-deen ne ‘Aameen’ kaha.

Unki dua se fauran us aurat ki beemaari door hui aur wo hosh mein aakar khaana maangne lagi. Unho ne us thaili mein se chaawal aur sirka nikalkar use khilaya. Use khaane ke baad use zyada achcha mehsoos hone laga.

Iske baad Makhdoom Shaah Meena mash’hoor ho gaye aur log unke paas apni takleefo aur beemaariyo ke liye dua karane ke liye aane lage.

Is tarah Hazrat Badi-ud-deen Madaar Shaah ne Shaah Meena ko Qutub ka darja ata farmaaya.

Ek baar ek budhi aurat Hazrat Sayyed Badi-ud-deen Ahmad Madaar Shah rahmatullahi alaihi paas aakar kehne lagi ‘Aaj ek ladka paida hua hai, Magar wo doodh nahi pee raha hai.’

Aap ne farmaaya ‘Ye bachcha ALLAH ka wali hai aur Maah e Ramzan shuru ho gaya hai. Isliye wo din ke waqt mein doodh nahi pee raha hai.’

Aap jab Kannauj pahunche to waha qareeb mein sukhe taalaab mein rehne lage. Ek baar kuchh logo ne aakar kaha ‘Kannauj mein Cholera ki beemaari paaili hai aur zyada ta’adaad mein log mar rahe hain. Aap hamare liye dua karein.’

Hazrat Sayyed Badi-ud-deen Ahmad Madaar Shah rahmatullahi alaihi ne farmaya ke ‘Main ALLAH se dua karunga. Magar yaha ke logo ko Islam apnana hoga.’

Logo ne kaha ‘Agar 40 din tak kisi ki maut nahi hoti hai to hum Islam apnayenge.’

Hazrat Sayyed Badi-ud-deen Ahmad Madaar Shah rahmatullahi alaihi ne Qaazi Shahaab-ud-deen Kidwai ko bhejkar dua karne ke liye kaha.

Unho ne jaise hi Kannauj ki had par khade hokar dua ki, shaher mein se ek aag ka gola nikalkar upar uthne laga.

Qaazi Shahaab-ud-deen Kidwai apni roohaani taaqat se us aag ko nigal gaye aur Makanpur waapas aaye.

Iske baad 39 din guzar gaye aur Kannauj mein kisi ki maut nahi hui.

Logo ne jama hokar mashwara kiya ke agar kal 40we din bhi agar koi nahi marega to sab ko Islam apnana hoga.

Aisa karte hain ki kisi budhe shakhs ko maar daalte hain.

Jab logo ne Bhikha aur Gopal naam ke do daane shakhs ko saari baatein batayi to unho ne logo se kaha ‘Jo us aag ko nigal sakta ho wo waapas baahar bhi nikal sakta hai.’

Aur dono ne tay kiya ke hume Islam apnaana hai. Unki baat sunkar sab logo ne bhi Islam apnaaya.

Hazrat Sayyed Badi-ud-deen Ahmad Madaar Shah rahmatullahi alaihi ke chehre par ALLAH ta’ala ne aisa noor ata farmaya tha ke agar koi Aap ko baghair hijaab ke dekh leta to be-ikhtiyaar aap ke qadmo mein gir padta aur kalma e shahaadat padh leta.

Aap paani par is tarah chal sakte the jis tarah zameen par, ya raith par chalte ho.

Aap ALLAH ke fazl se apne takht par baithkar jaha jaana chahte waha pahunch jaate the.

Karaamat:

(1) Hazrat Ghaus e aazam Abdul Qadir Jeelaani radiy-Allahu ta’ala anhu ki bahen Sayyeda Bibi Naseeba ko koi aulaad nahi thi. Unho ne apne bhai se kaha ‘Kaa’inat ki har cheez aap ka faiz o barkat haasil karti hai. Magar main aulaad se mehroom hu. Aap mere liye dua kijiye ke ALLAH ta’ala mujhe aulaad ata farmaye.’

Hazrat Ghaus e aazam Abdul Qadir ne farmaya ‘Tumhare naseeb mein aulaad hai, magar wo Hazrat Madaar shah ki dua se hai. Wo bahot jald Baghdad tashreef laayenge. Jab wo aaye to tum unse ilteja karna. Agar wo tumhare liye dua karein to inshaAllah ALLAH tumhe ata farmayega.’

Kuch dino ke baad Hazrat Madaar Shaah Baghdad tashreef laaye. Sayyeda Naseeba ne jab ye khabar suni to fauran aap ki baargah mein haazir hui aur dua ke liye kaha.

Hazrat Sayyed Badi-ud-deen Ahmad Madaar Shah rahmatullahi alaihi ne farmaya ALLAH ta’ala tumhein 2 bete ata farmayega agar tum unme se ek ko Islam ki isha’at ke liye dene ke liye raazi ho to.’

Sayyeda Naseeba iske liye raazi ho gayi.

Iske baad Aap ki dua se Sayyeda ko 2 bete hue. Jinke naam Sayyed Muhammad aur Sayyed Ahmad rakhe gaye.
Kuch arse baad jab Madaar shah teesri baar Baghdad tashreef laaye aur kuchh din ke liye waha qayaam kiya.

Ek din Sayyed Muhammad ghar ki chhat par khel rahe the ki achanak waha se niche gire aur fauran unka inteqal ho gaya.

Ye dekhkar Sayyeda ki aankho mein aansoo aa gaye. Itne mein unhe yaad aaya ki maine apne wade ke mutabik is bete ko Madaar shah ko dene ka tay kiya tha.

Chunache wo Madaar Shaah ki baargah mein apne bete ki laash ko lekar pahunchi aur kaha ‘Aap ki dua se ALLAH ta’ala ne mujhe 2 bete ata farmaye the. Jinme se ek mujhe rakhna hai aur dusra jise aap ko dena tha uska inteqal ho gaya hai.’

Aap ne farmaya ‘Theek hai, wo beta mujhe de do.’

Sayyeda ne kaha ‘Magar jo mar chuka hai use kisi ko nahi de sakti.’

Ye sunkar Aap ne laash ke qareeb khade hokar farmaya ‘Aye Jamaal-ud-deen Jaameman Jannati! ALLAH ta’ala ke hukm se khade ho jaao.’

Ye kehte hi wo ladka zinda hokar khada ho gaya. Baad mein woh isi naam se mash’hoor hua. Aur unka laqab ‘Jameel Shaah Daatar’ bhi hai Aur unka mazaar Helsa Jatinagar (Bihar) mein hai.

(2) Kannauj meim rehne wale ek shakhs ko aulaad nahi thi. Ek martaba wo apni biwi ke saath Madaar Shaah ke paas aaya. Aap ne uske liye dua ki. Uske baad uski biwi ko hamal raha magar usko jo bachcha paida hua wo sirf gosht ke tukde jaisa tha uska sar, haath, ya pair nahi the.

Wo shakhs use lekar Madaar Shaah ke paas aaya. Aap use dekhne lage aur phir Aap ne kuchh gungunana shuru kiya. Uske saath hi us bachche ne shuru kiya aur phir ALLAH ta’ala ne use zindagi ata farmayi aur insaani shakl o soorat ata farmayi. Aur us ka naam ‘Alrai’ rakha gaya.

(3) Ek baar Aap apne mureed Hazrat Khwaja Sayyed Abu Turaab Fansoor ke saath ek baagh mein sair kar rahe the. Aap ne ek insaan ki khopdi dekhi.

Aap ne us se puchha ‘Tum kaun ho aur kya ho?’ ALLĀH ke hukm se wo khopdi bolne lagi aur us ne kaha ‘Main is baagh ki nigraani ka kaam karta tha aur apne bacho ki parwarish karta tha.

Magar ek din achaanak mujhe maut aa gayi. Aur 12 saal se main yahi par dafn tha. Aur mere gunaaho ki wajah se mujh par azaab ho raha tha. Kisi ko meri koi parwah nahi hai. Aur main kahi ka nahi raha.’

Ye sunkar Aap ne ALLĀH se dua ki. Aap ki dua se ALLĀH ne apni rahmat se use zinda kiya aur jism ata farmaaya.

Aap ne use ‘Zamzama’ naam diya aur us ke baad wo 12 saal tak dunya mein raha.

(4) Ek baar ek aurat Madaar Shaah ki baargaah meim aayi aur kaha ‘Mujhe bahot duao ke baad ALLĀH ne ek beta diya tha. Magar bad-naseebi se bachpan mein hi us ka inteqaal ho gaya. Ab main tanha aur be-sahara hu.

Aap ki dua se bahot se logo ne faiz paaya hai to main kyun mehroom rahu?’

Aap ko raham aa gaya aur Aap us bachche ki qabr par gaye aur farmaaya ‘Kum bi iznillāh.’ Aur fauran wo bachcha zinda hokar kalma padhne laga.

Magar us bachche ne Hazrat se iltija ki ke ye dunya gunaho aur khwahishaat se bhari hai aur usme koi sukoon nahi. Haqeeqi sukoon to Jannat mein hai. Is liye main is dunya mein waapas aana nahi chaahta.’

(5) Ek baar Madaar Shaah ek nadi ke kinaare baithe the. Itne mein ek machhyaare (maahigeer) bhaagkar aaya aur bataaya ke ‘Ek saudagar kashti mein apna maal lekar safar par nikla tha. Kuchh der baad wo kashti dariya mein doob gayi.’

Aap ne waha se geeli mitti li aur use dekar farmaaya ‘Jis jagah par wo kashti doob gayi hai waha jaakar is mitti ko daal do.’

Us ne waha jaakar jab wo mitti dariya mein daali to use ye dekhkar ta’ajjub hua ke wo kashti paani ke upar salaamat laut aayi aur tairne lagi.

Ye dekhkar wo apne saathiyo ke saath Hazrat ke paas aaya aur Aap ki daawat par wo sab musalman ho gaye.

(6) Ek martaba Aap Surat pahunche to Aap ne ek maqaam par logo ki bheed dekhi. Aap waha pahunche to dekha ke ek na-bina shakhs raaste mein baitha tha.

Jab us shakhs ko Hazrat ki haazri ka pata chala to us ne aap se fariyaad ki. Aap ne fauran wuzu kiya aur phir usi paani ko us shakhs ki aankho par lagaya. Fauran us shakhs ki aankho ki roshni durust ho gayi.

Yeh karaamat dekhkar aas-paas ke ilaaqe ke log Aap ki bahut izzat karne lage aur apne naam ke sath Shaah lagaane lage.

(7) Hazrat Ahmad ghud-sawaari mein bahot maahir the. Ek baar wo apne ghode par sawari karte hue soch rahe the ki main dunya mein sab se zyada khush aadmi hu aur mujhe kisi tarah ki koi pareshaani nahi hai.

Bad-qismati se un ka ghoda gir gaya aur un ko bhi neeche girne ki wajah se gehri chot aai aur dard aur khoon nikal jaane ki wajah se be-hosh ho gaye.

Jab Madaar shah aap ke paas aaye to aap ne farmaaya ‘Kab tak tum yun be-hosh pade rahoge. Utho aur ALLĀH ta’ala se tauba karo.’

Ye sunkar Hazrat Ahmad jaage aur tauba ki. Unho ne Hazrat ke qadmo ko chhune ke koshish ki. Magar dard ki wajah se na kar paaye.

Madaar shah ke pukarne par unka ghoda waha aa gaya aur aap Hazrat Ahmad ko qareeb ke gaanv mein ek jarrah (doctor) ke paas le gaye aur ilaaj ke liye kaha.

Us ne jaanch karke kaha ‘Is shakhs ka ilaaj karna mere bas ki baat nahi. Shaayad gehre jakhm ki wajah se yeh mar bhi sakta hai.’
Ye sunkar Aap ne waha zameen par padi anaar ki chhal ko uthaaya aur use piskar un ke jakhmo par lagaaya to khoon nikalna band ho gaya. Chand dino baad Hazrat Ahmad bilkul tandurast ho gaye. Aur Aap ke mureed hue aur Madaar Shaah ke Makka ke safar mein aap ke saath rahe.

(8) Ek martaba Madaar Shaah Bengal ke ilaaqe mein the. Waha qahet pada tha. Logo ne Aap ki baargaah mein haazir hokar arz ki ‘Kitne mahine se baarish nahi ho rahi hai aur is wajah se sab bahot pareshaan hain. Paani ki pareshaani hai aur hamari kheti bhi sukh kar barbaad ho rahi hai.’

Aap ne baargaah e ilāhi mein dua ke liye apne haath uthaaye aur farmaaya ‘Aye ALLĀH! Tu Qaadir e mutlaq hai. Main ek insaan hu aur aasi hu. Teri baargaah mein dua karta hu ki teri makhlooq par raham farma de aur tere Habeeb Muhammad Mustafa sallallāhu alaihi wa sallam ke sadqe mein in par rahmat naazil farma.’

Is ke saath hi tez baarish shuru ho gayi aur charo taraf paani paani ho gaya. Yaha tak ke jo log Madaar Shaah ki baargaah mein aaye the un ko bhi paani ki wajah se apne gharo tak waapas jaana mushkil ho gaya.

(9) Ek baar Madaar Shaah naher ke kinaare baithe the. Itne mein ek Jogi ek botal lekar aaya aur kaha ‘Ye Aksir hai’.

Aap ne is ke baare mei puchha to us ne kaha ‘Ise taambe ki cheez par lagao to use sona bana deta hai.’

Aap ne us botal ko naher mein phenk diya. Ye dekhkar wo Jogi gusse mein aa gaya aur aap se kehne laga ‘Tum ne meri zindagi bhar ki mehnat barbaad kar di.’

Aap ne farmaaya ‘Insaan khud aksir hai. Lihaaza kisi aur cheez ko taanbe mein se sona banaane ke liye istemaal kyun karna chaahiye?’

Phir aap ne kaha ‘Ye aksir dikhta kaisa hai?’ Us ne kaha ‘Mitti jaisa.’ Aap ne waha se mitti uthaakar farmaaya ‘Ye mitti bhi aksir jaisa kaam kar sakti hai. Ise le jaao aur jitna chaho sona bana lo.’

Use yaqeen na hua aur us ne jaanch karne ke liye taanbe ke bartan par lagaaya to wo sone ka ho gaya.

Ye dekhkar wo Aap ke qadmo me gir gaya aur Islaam mein daakhil ho gaya. Aur kuchh dino ke liye aap ki khidmat mein bhi raha.

(10) Kabul mein qayaam ke dauraan ek martaba Hazrat Shaah e Madaar ne apne khaadimo ko paani laane ke liye bheja. Wo log qareeb mein ek kuen par gaye aur jab wo us mein se paani nikal rahe the to waha rehne wale kuchh logo ne unhe roka.

Khaadimo ne aakar Hazrat ko ye baat batayi. Aap ne unhe farmaaya ‘Kuen par waapas jaao aur us se kaho ke Shaheed e Karbala ke pote ne tumhe bulaya hai.’

Khaadimo ne waisa hi kiya. Aap ka farmaan sunkar kuen ka paani tez raftar se upar aane laga. Aur jab khaadim ne bartan mein paani bhar liya to paani waapas apni jagah par chala gaya. Ye sab dekhakar wo sab log sharminda ho gaye aur Hazrat ki baargah mein aakar qadmo mein gir gaye aur muafi maangi.

(11) Ek baar Madaar Shaah Mevat ke pahaadi ilaaqe se guzar rahe the. 52 Dakaito ke ek giroh ne Aap ko ameer suadagar samajhkar aap ko lootne ke liye hamla kiya.

Aap ne apne chehre par se naqaab hata diya. Aur us noor ki wajah se wo sab log andhe ho gaye aur chillaane lage. Aur Hazrat ke qadmo me girkar muafi maangne lage.

Aap ne farmaaya ‘Main tumhe ek hi sharth par muaf kar sakta hu ke tumhe ye loot karna aur raahgiro ko pareshan karna chhodna hoga.’

Un logo ne kaha ‘Hum waada karte hain ki abhi se ye burai ka kaam chhod denge aur mehnat karke rozi kamaenge.’ Is ke saath hi sab ko aaankho ki roshni phir se mil gai.
Wo sab log musalman ho gaye aur aap ke mureed hue.

(12) Ek baar aap wa’az farma rahe the. Ek shakhs waha se guzra to logo ki bheed dekhkar us ne Shaikh Mohammad Baqaullāh se is ki wajah puchhi.

Unho ne bataaya ‘Hamare Peer Qutb-ul-Madaar Shaah wa’az farma rahe hain.’ Magar wo shakhs aap ke martabe ko maanne se aitraaz karne laga.

Madaar Shaah us ke dil ki baat jaankar use qareeb bulaya aur farmaaya ‘Tumhare ghar ke saamne jo paid hai wo kis ka hai?’

Us ne kaha ‘Wo bahot puraana darakht hai aur bijli girne ki wajah se sukh gaya hai aur us par koi patte, ya phal na hone ki wajah se ye bataana mushkil hai ki wo kis cheez ka paid hai.

Aap ne use us paid ke saamne dekhne ke liye kaha aur farmaaya ‘Ab batao ye kaun sa paid hai?’ Jab us ne paid ko dekha to wo hairat mein ye dekhkar pad gaya ke wo paid patto aur naariyal se bhara hua hai.

Wo Hazrat ke qadmo mein gir gaya aur muafi maangi. Aap ne use us paid ka khayaal rakhne ke liye kaha aur farmaaya ‘Jo is paid ke naariyal ka paani piyega use aankho ki beemaari nahi hogi.’

(13) Qaazi Maulana Shahaab-ud-deen Malik-ul-Ulama Madaar Shaah ki izzat nahi karte the. Ek baar unho ne Aap se kai sawaal kiye aur Aap ne har sawaal ka jawaab diya. Phir bhi wo nahi maane.

Ek baar unho ne ek zinda shakhs ko kafan pehnakar janaaze mein rakhkar Hazrat ki baargaah mein bheja aur Madaar shah se namaaz e janaaza padhaane ke liye kaha. Aap ne namaaz e janaaza padhai aur apne kheme mein chale gaye.

Madaar shaah ko koi ilm nahi hai ye sochkar wo log janaaza kholkar kafan ko hataane lage. Jaise hi kafan khola un logo ne dekha ki wo shakhs mar chuka hai.

Qaazi Maulana Shahaab-ud-deen ko jab ye pata chala to Madaar shah ki baargaah mein aaye to apni gustaakhi ke liye muafi maangi.

Aap Hazrat Khwaja Baayazeed Bastami rahmatullāhi alaihi ke mureed aur khalifa hain.

Aap se tareeqat ka ‘Madaariya’ silsila jaari hai.

Aap ke khulfa :
(1) Hazrat Khwaja Sayyed Abu Muhammad Arghoon rahmatullāhi alaihi
(2) Hazrat Sayyed Maulana Hisaam-ud-deen Salaamati Jaunpuri rahmatullāhi alaihi
(3) Hazrat Sayyed Muhammad Jamaal-ud-deen Jaaneman Jannati Bukhari rahmatullāhi alaihi
(4) Hazrat Sayyed Ajmal Shaah Bahraichi rahmatullāhi alaihi
(5) Hazrat Khwaja Sayyed Abul Hasan Tayfoor rahmatullāhi alaihi
(6) Khwaja Sayyed Abu Turaab Fansoor rahmatullāhi alaihi
(7) Hazrat Qaazi Shahaab-ud-deen Kidwai Daulatabadi rahmatullāhi alaihi
(8) Hazrat Qaazi Mahmood Kintoori rahmatullāhi alaihi
(9) Hazrat Qaazi Mazhar Kallesar rahmatullāhi alaihi
(10) Hazrat Qaazi Mutesher Kaliyari rahmatullāhi alaihi
(11) Hazrat Sadan Shaah Sarmast rahmatullāhi alaihi.

Aap ke wisaal se pehle Aap ne mureedo se farmaaya ke ‘Mere wisaal ka waqt qareeb hai. Is liye paani ka intazaam karke rakhna. Mujhe farishtein ghusl denge.’

Ye sunkar mureedo ne Aap ko unhe chhodkar na jaane ke liye kaha. Aap ne farmaaya ‘Har jaandar ko maut ka maza chakhna hai. Aur main tumhe chhodkar nahi jaa raha hu. Jab bhi tum mujhe yaad karke dua karoge ALLĀH ta’ala tumhari muraad puri farmaega.’

Is ke baad Aap puri raat apne kamre mein tilaawat e Qur’an karte rahe.

Aap ka wisaal 17 Jamaadi ul awwal 838 Hijri (1434 A.D.) mein 596 baras ki umr mein hua.

Aap ki namaaz e janaaza Hazrat Sayyed Maulana Hisaam-ud-deen Salaamati rahmatullāhi alaihi ne padhaai.

Aap ka mazaar Makanpur (Uttar Pradesh) hai.

ALLĀH ta’ala us ke Habeeb sallallāhu alaihi wa sallam ke sadqe mein
Aur Hazrat Sayyed Badi-ud-deen Ahmad Madaar Shaah rahmatullāhi alaihi ke aur Ahle bait Aur Auliya Allāh ke waseele se
Sab ko mukammal ishq e Rasool ata farmaye aur Sab ke imaan ki hifaazat Farmaye aur Sab ko nek amal karne ki taufiq ata farmaye.
Aur Sab ko dunya wa aakhirat mein kaamyaabi ata farmaye aur Sab ki nek jaa’iz muraado ko puri Farmaye.
Aameen.

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy