- Advertisement -

Hazrat Abdullah ibn Rawahah radiy-Allahu ta’ala anhu

Aapke waalid ka naam Rawahah bin Salaba aur waalida ka naam Kabsha bint e Waqeed hai.
Aap Khazraaj qabeele ke Banu Haaris khaandaan se hain.
Aap Yasrab (Madina Sharif) ke 12 aadamiyo ke us giroh me shaamil the jisne 11 Nabawi (621 A.D.) me maqaam e Aqaba par Huzoor Rasool-Allah sallallahu alaihi wassallam se Bai’at e Ula ki.
Iske baad Zil Hijja 12 Nabawi (622 A.D.) me Aap Yasrab (Madina Sharif) ke 73 mard aur 2 aurto ke giroh me bhi shaamil the jisne maqaam e Aqaba par Huzoor Rasool-Allah sallallahu alaihi wassallam se phir se bai’at ki. Aur har haal me unki ita’at karne ka aur unko madad karne ka waada kiya.
Huzoor sallallahu alaihi wassallam Hazrat Miqdaad ibn Amr Muhaajir radiy-Allahu ta’ala anhu ko Aapka bhaai banaaya.
Aap ne Ita’at e Rasool se mukammal ishq e Rasool ka ṡaboot diya.
Ek martaba Aap masjid e Nabawi me daakhil ho rahe the ke Aap ne Huzoor sallallahu alaihi wassallam ko farmate hue suna ke: “Jo shakhs jaha hai wahi par baith jaaye.”
Aap fauran darwaze ke qareeb hi baith gaye. Huzoor sallallahu alaihi wassallam ne jab dekha to irshad farmaya “ALLAH ta’ala tumhe ita’at me barkat ata farmaye.”
Hazrat Abu Darda radiy-Allahu ta’ala anhu Aapke khaas dost the. Jab woh musalman nahi hue the, tab ek bhoot ko apne ghar me rakhe the. Aap ne unke ghar me jaakar us bhoot ko tod diya.
Jab Hazrat Abu Darda radiy-Allahu ta’ala anhu ghar par aaye to unki biwi khauf ki wajah se ro rahi thi ke “Shaayad koi aafat aa jaayegi.”
Lekin Hazrat Abu Darda radiy-Allahu ta’ala anhu ne socha ke “Jis bhoot ko hum khuda maan rahe the woh apni hifazat nahi kar saka to munaasib hai ke hum ALLAH ko apna ma’abood maane jo har cheez par qaadir hai.”
Hazrat Abdullah ibn Rawahah radiy-Allahu ta’ala anhu Hadees e Nabawi ko yaad rakhte aur dusre ashaaba ko bataate the.



Aap Shaayaraan e Islam me shaamil hain. Hazrat Abdullah ibn Rawahah radiy-Allahu ta’ala anhu ne kai mauqe par Huzoor sallallahu alaihi wassallam ki shaan me Qaseeda padhe hain.
Aapne Jung e Badr, Jung e Uhud, Jung e Khandaq aur Jung e Khaybar shaamil hokar apni shuja’at dikhaai.
Jung e Badr me fatah ke baad Huzoor sallallahu alaihi wassallam Aapko Hazrat Zaid ibn Haariṡah radiy-Allahu ta’ala anhu ke saath fatah ki khush-khabari dene ke liye Madina Sharif bheje.
Zil Qaadah 4 Hijri (April 626 A.D.) me Jung e Badr al-Maw’id ke mauqe par Huzoor sallallahu alaihi wassallam Hazrat Abdullah ibn Rawahah radiy-Allahu ta’ala anhu ko Madina Sharif me apna naa’ib banaya tha. (Quraish ka qafla darkar bhaag jaane ki wajah se jung nahi hui.)
Abu Raafi Sallam ibn Abul Huqaiq ke qatl ke baad 6 Hijri (628 A.D.) me Yusayr ibn Rizaam Khaibar ka naya sardaar bana.
Huzoor RasoolAllah sallallahu alaihi wassallam ko jab pata chala ke woh lashkar ke saath musalmano se saath jung karne ki saazish kar raha hai. To Hazrat Abdullah ibn Rawaha radiy-Allahu ta’ala anhu ko 3 sahaba ke saath Khaibar ke halaat jaanlene ke liye bheja.
Aapne wapas aakar waha ke halaat bataye to Huzoor sallallahu alaihi wassallam ne Aapko 30 ashaaba ke saath Khaibar bheje. Yusayr ibn Rizaam apne saathiyo ke saath Huzoor sallallahu alaihi wassallam ke paas aane ke liye tayyaar hua aur Hazrat Abdullah ibn Unais radiy-Allahu ta’ala anhu ke saath oont par sawaar hokar Madina Sharif ki jaanib rawaana hue.
Lekin Khaibar se 6 mile door Maqaam e Qarqarat par usne apna iraada badal diya aur oont par se neeche kood gaya.
Hazrat Abdullah ibn Unais radiy-Allahu ta’ala anhu ne us par hamla kiya aur woh maara gaya. Isi tarah dusre sahaaba ne bhi oont par sawaar kaafir ko qatl kar diya. 29 yahudi maare gaye aur ek bachkar bhaag gaya.
Aap 6 Hijri me Sulaih Hudaibiyah ke mauqe par bhi haazir the.
Aap Zil-Qa’ada 7 Hijri (628 A.D.) me Umrah al-Qa’ada me bhi shareek hue.
Aap Huzoor sallallahu alaihi wassallam ke oont ki lagaam pakadkar chal rahe the aur musalmano ke waqaar aur shuja’at ke ash’aar padh rahe the.
Hazrat e Umar Farooq radiy-Allahu ta’ala anhu ne Aapko roka aur kaha ke “Baitullah ke qareeb sher padhte ho?”
Yeh sunkar Huzoor sallallahu alaihi wassallam ne farmaya: “Ise padhne do. Iske alfaaz teer se bhi zyada taaqatwar aur aṡardaar hai.”
Phir Hazrat Abdullah ibn Rawahah radiy-Allahu ta’ala anhu se yeh padhne ke liye farmaya “Laa ilaha illallah wahdahu laa shareek lahu sadaqa wa’adahu wa nasar abdahu wa hazam al-ahzaab wahdahu.” Aapne yeh padhna shuru kiya aur musalman Aapke saath dohraane lage.
7 Hijri (629 A.D.) me Huzoor sallallahu alaihi wassallam ne apne sahaba ko khato ke saath Islam ki daawat ke liye alag alag mulko ke baadshaah ke paas bheje.
Hazrat Haaris bin Umair Azdi radiy-Allahu ta’ala anhu ko safeer banakar Bosra ke baadshaah ki jaanib bheja.
Hazrat Haaris bin Umair Azdi jab maqaame Mu’tah par pahunche, to waha ke governor Sharjeel Ghassani ne unhe rokkar shaheed kar diya.
Jab Huzoor sallallahu alaihi wassallam ko pata chala to Aapne Jamaadi ul awwal 8 Hijri (September 629 A.D.) ko Hazrat e Zaid bin Haarisa radiy-Allahu ta’ala anhu ko saalaar banakar 3000 musalmano ka lashkar bheja.



Jab musalman Musharif pahunche to pata chala ke Byzantine aur unke saathiyo ka lashkar taqreeban 200000 ka hai. Musalmano ne intezar karne ka aur Madina Sharif se madad mangwaane ka mashwara kiya.
Magar Hazrat e Abdullah ibn Rawahah radiy-Allahu ta’ala anhu ne irshad farmaaya ke ‘Musalman baatil se jung karne se ya shaheed hone se darta nahi hai.’
Hazrat Zaid ibn Haarisa radiy-Allahu ta’ala anhu ne pehle kaafiro ko islam ki daawat di magar wo na maane.
Aakhirkaar maqaam e Mu’tah par muslim lashkar ne kaafiro ke saath jung ki.
Jung me Hazrat e Zaid bin Haarisa radiy-Allahu ta’ala anhu shaheed hue, to Hazrat Ja’afar bin Abu Talib radiy-Allahu ta’ala anhu islami lashkar ke saalaar bane.
Unki shahadat ke baad Aap radiy-Allahu ta’ala anhu saalaar e lashkar bane.
Ek kaafir ne khanjar se Aapke chehre par waar kiya. Aap shadeed jakhmi hone ke ba-wajood bahaaduri se jung karte hue shaheed ho gaye.
Aapke baad Hazrat Khalid bin Walid radiy-Allahu ta’ala anhu ne halaat ko dekhkar tarkeeb se muslim lashkar ki hifazat ki.
Aap ka wisaal 5 Jamaadi ul awwal 8 Hijri (September 629 A.D.) ko Jung e Mu’tah ke dauraan hua.
Aapka mazaar Mu’tah (Jordan) me hai.
ALLAH ta’ala uske Habeeb sallallahu alaihi wassallam ke sadqe me Aur Hazrat Abdullah ibn Rawaha radiy-Allahu ta’ala anhu aur tamaam Auliya Allah aur Ahle bait aur Ashaaba ke waseele se Sab ko mukammal ishq e Rasool ata farmaye aur Sab ke imaan ki hifaazat farmae aur Sab ko nek amal karne ki taufiq ata farmaye. Aur Sab ko dunya wa aakhirat me kaamyaabi ata farmaye aur Sab ki nek jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy