- Advertisement -

Hazrat Shaikh Abul Jannaab Najmuddin Ahmad al-Kubra rahmatullahi alaihi

Alqaab: Shaikh e Wali taraash (Sculptor of Saints), Taamatul kubra.
Aap ki wilaadat 540 Hijri (1145 A.D.) me Khwarazm (Turkmenistan) me hui.
Hazrat Shaikh Abul Jannaab Najmuddin Ahmad al-Kubra rahmatullahi alaihi  ke waalid ka naam Umar bin Muhammad hai.
Aap ne Quran aur Kalaam ki ta’aleem haasil ki.
Hazrat Shaikh Abul Jannaab Najmuddin Ahmad al-Kubra rahmatullahi alaihi ne Iran aur phir Misr jaakar Hadeeṡ ki ta’aleem haasil ki.
Aap ne Hazrat Allama Abul Ma’ali Faraadi Nishapuri, Haafiz Abul Ula aur Imaam Abu Taahir Salfi Misri se ta’aleem haasil ki.
Ek arsa tak Aap ki dilchaspi Uloom e zahiri aur Dars o tadrees tak mahdood thi.
Ek martaba Hazrat Shaikh Abul Jannaab Najmuddin Ahmad al-Kubra rahmatullahi alaihi Tabriz me muqeem the, tab Hazrat Muhiy-us-Sunnah Imam Baghawi rahmatullahi alaihi ke ek shaagird se Imam Mausuf ki kitaab ‘Sharhus Sunnah’ padh rahe the, ke ittefaaq se Hazrat Baaba Farj Tabrizi rahmatullahi alaihi darsgaah ki taraf se nikle aur ek bharpur nigaah Aap par daali.
Us nigahe faiz ne Aapke dil ka aalam badal diya.
Aap Hazrat Baaba Farj Tabrizi ki khaanqaah shareef me haazir hue aur Hazrat ki khidmat me Uloom e baatini ki ta’aleem haasil ki.
Harzat ne apna Khirqa mubarak pehnaaya. Phir Aap raahe Sulook par aage badhte rahe.
Misr (Egypt) me Aapne Hazrat Baaba Farj Tabrizi rahmatullahi alaihi, Hazrat Moeen-us-Sunnah Shaikh Ruzbihan Yamaan Kabeer al-Wazzan Suharwardi Misri rahmatullahi alaihi, Hazrat Ismaeel al-Qasri rahmatullahi alaihi aur Hazrat Ibraheem Kurdi rahmatullahi alaihi se Tasawwuf ki ta’aleem haasil ki.
Phir Hazart Ismaeel al-Qasri rahmatullahi alaihi ke mashware par Hazrat Shaikh Zia-ud-deen Ammaar bin Yaasir al-Bitlisi rahmatullahi alaihi ke mureed hue aur apne peer ke wisaal ke baad Aap Misr waapas aaye.
Hazrat Shaikh Abul Jannaab Najmuddin Ahmad al-Kubra rahmatullahi alaihi ne Hazrat Gaus e aazam Shaikh Sayyed Abdul Qadir Jilani radiy-Allahu ta’ala anhu aur Hazrat Shaikh Zia-ud-deen Abul Najeeb Suharwardi rahmatullahi alaihi se bhi faiz haasil kiya.
Shaikh Ruzbihan al-Misri ke mashware par Aap ne nikah kiya.
Aapke saahabzaade Hazrat Baaba Mufrah rahmatullahi alaihi hain.
Phir 582 Hijri (1185 A.D.) me Khwarazm waapas aaye aur ta’aleem e deen karte rahe.



Tasannif:
Hazrat Shaikh Abul Jannaab Najmuddin Ahmad al-Kubra rahmatullahi alaihi ki mash’hoor kitaabein:
(1) Fawaatih-ul-Jamaal wa fawaatih-ul-Jalaal
(2) Usool-ul-Ashrah
(3) Risaalat al-kha’if al-ha’im min lawmaat al-la’im.
(4) Fi Adab al-saalikeen
(5) Taweelaat-ul-Najmiyah
(6) Adab al-suluk ila Hazrat Malik-ul-Mulook.
Aap ne apne shaagirdo ko bhi apni ta’aleem aur faiz se aala darje ke Wali e kaamil banaye. Isliye Aap ka laqab ‘Shaikh e Wali taraash (Sculptor of Saints)’ hai.
Ek martaba ek Saudagar Aapki khaanqaah shareef me haazir hua. Aap par us waqt khushi kaifiyat taari thi. Aapne us Saudagar par ek nigaahe kimiya asar daali aur martaba e Wilayat ataa farma kar puchha ke ‘Kis mulk se aaye ho?’
Usne mulk ka naam bataya. Aapne use Ijazat naama likh kar diya aur farmaya ke “Jaao! tumhe us mulk ka Qutbul irshad muqarrar kiya.”
Karaamat:
(1) Ek din Aap apne saathiyo ke saath baithe hue the. Ek baaz hawa me ek faakhta ka pichha kar raha tha. Achaanak Hazrat ki nazar us faakhta par padi. Fauran faakhta pichhe palti aur baaz ko pakad kar Aapke qadmo me la phenka.
(2) Ek din Aapki majlis me Ashaabe Kahaf ke baare me guftagu ho rahi thi. Aap ke ek mureed ke dil me khayaal paida hua ke Ummat e Muhamamdi me bhi koi aisa shakhs hai jis ki sohbat se Kutta faizyaab ho jaaye?
Aapne us mureed ke dil ki baat ma’aloom karli aur Khaanqaah ke darwaze par jaa kar khade ho gaye. Waha se ek Kutta guzra. Aapne us Kutte par nazar daali to wo usi waqt mutahayyar wa bekhud ho gaya aur Shaher se baahar qabrastan me jaa kar muqeem ho gaya aur wo apna sar hamesha zameen par ragadta rehta tha.
Wo Kutta jaha jaata 50-60 kutte uske aas paas jama hokar halqa bana lete aur Adab o ehtaraam ke saath uske saamne khade rehte.
Kuchh arse baad us kutte ka inteqaal hua to Hazrat ne farmaaya ke ‘Is ko dafn kardo.’
Aap Hazrat Shaikh Zia-ud-deen Ammaar bin Yaasir al-Bitlisi rahmatullahi alaihi ke mureed aur Khalifa hain.
Aap ko Hazrat Ismaeel al-Qasri rahmatullahi alaihi se bhi (Kumailiya silsila) ki khilafat mili hai.
Aap se ‘Suharwardi Kubrawiya’ silsila jaari hai.



Hazrat Shaikh Abul Jannaab Najmuddin Ahmad al-Kubra rahmatullahi alaihi ke khulfa:
(1) Shaikh Sa’ad-ud-deen Mohammad Hamuwayi rahmatullahi alaihi,
(2) Shaikh Razi-ud-deen Ali ibn Laala Ghaznawi rahmatullahi alaihi,
(3) Shaikh Majd-ud-deen Ahmad Baghdadi rahmatullahi alaihi,
(4) Shaikh Najm-ud-deen Abdullah Razi rahmatullahi alaihi,
(5) Shaikh Saif-ud-deen Abul Ma’ali Sa’ad Bakharzi rahmatullahi alaihi,
(6) Shaikh Baha-ud-deen Walad ibn Husain rahmatullahi alaihi,
(7) Shaikh Baaba Kamaal Khanjari Jundi rahmatullahi alaihi,
(8) Shaikh Ain-ul-zamaan Jamaal-ud-deen Gili rahmatullahi alaihi,
(9) Shaikh Mas’ood-ud-deen Hamawi rahmatullahi alaihi.
618 Hirji (1221 A.D.) me Mongol (Taataari) lashkar ne Khwarazm par hamla kiya, tab Aap Islam aur watan ki hifazat ke liye jung ke liye tayyaar hue.
Mongol lashkar ne Aapse kaha ke agar aap jung karne ke liye na aaye, to wo aap ko chhod denge. Magar Aap naa maane aur bahaaduri se jung karte hue shaheed ho gaye.
Aap ka wisaal 10 Jamaadi ul awwal 618 Hirji (1221 A.D.) ko hua.
Aap ka mazaar Urgench, Khwarazm (Turkmenistan) me hai.
ALLAH ta’ala uske Habeeb sallallahu alaihi wa sallam ke sadqe me aur Hazrat Shaikh Najmuddin Ahmad al-Kubra rahmatullahi alaihi aur tamaam Auliya Allah aur ke waseele se sabko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmae aur Sab ki nek jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy