- Advertisement -

Hazrat Zaid ibn Haarisah radiy-Allahu ta’ala anhu

Aapki wiladat 581 A.D. me Najd me hui.
Aapke waalid ka naam Haarisah ibn Sharahil aur waalida ka naam Sauda bint Saalaba hai.
Aap Banu Kalb qabeele ke Uzra khandaan se ta’alluq rakhte hain.
Aapki waalida Tayy qabeele ke Maan khaandaan se hain.
Ek martaba 8 saal ki umr me Aap apni waalida aur qabeele walo ke saath safar kar rahe the, tab Qayn qabeele walo ne aapke khaimo par hamla karke Aapko qaid kar liya aur gulaam banakar Ukkaz ke bazaar me 400 dinaar me bech diya.
Makka Sharif ke Hakeem bin Hijjaam ne Aapko kharida aur apni fhufhi Hazrat E Khadeeja bint Khuwailid radiy-Allahu ta’ala anha ko diya.
Jab Hazrat e Khadeeja bint Khuwailid radiy-Allahu ta’ala anha ka nikah Huzoor Sallallahu alaihi wassallam se hua to wo Hazrat e Zaid ko apne saath le gayi.
Huzoor Sallallahu alaihi wassallam Aap se bahot mohabbat karte the aur ‘Habeeb’ kehkar bulaate the.
Jab Aapke waalid Haarisah aur chacha Kaab Makka aaye, to Ka’abatullah par Huzoor Sallallahu alaihi wassallam se mulaqaat hui, to Zaid ko wapas dene ke badle jitni chaahe utni raqam dene ke liye baat ki.
Magar Huzoor Sallallahu alaihi wassallam ne farmaya: ‘Zaid ko hi faisla karne do. Agar wo apne pariwaar ke saath jaana chaahta hai to main use bagair koi muawaze ke aazaad kar dunga.’
Zaid ko bulaaye gaye to unho ne apne waalid aur chacha se kaha ke ‘Main Mohammad (Sallallahu alaihi wassallam) ko chhodkar waapas nahi aana chaahta. Kyun ki inme maine kuchh khaas baat dekhi hai.’
Phir Huzoor Sallallahu alaihi wassallam Zaid ko lekar Ka’aba ki sid’hi par gaye aur ek iqraar-naama tayyar karke shahido ki maujudgi me baahum dastkhat kiye.
Phir logo se mukhatib hokar farmaya ‘Aaj se Zaid mera beta hai.’
Aapke waalid aur chacha khush hokar wapas laut gaye.
Iske baad Makka ke log Aapko Zaid ibn Muhammad kehne lage.
Jab 609 A.D. me Huzoor Sallallahu alaihi wassallam ne Islam ki daawat di to Aap fauran Islam me dakhil ho gaye.
Aap Islam apnane wale sab se pehle teen (3) Sahabi e Rasool me saamil hain.
13 Nabawi (622 A.D.) me jab Huzoor Sallallahu alaihi wassallam Hazrat Abu Bakr Siddiq radiy-Allahu anhu ke saath Makka se hijrat karke Yasreeb (Madina Sharif) aa gaye.
Iske baad Aap bhi Hijrat karke Madina Sharif aa gaye.
Kuchh mahine baad Huzoor Sallallahu alaihi wassallam ke farmaan par Aap Makka Sharif aaye aur
Ummul mo’mineen Sawda bint e Jama’a radiy-Allahu anha,
Shehzaadi e Rasool-Allah Umme Kulsum aur Fatimah Zahara radiy-Allahu anha,
Khaadim Abu Raafi,
Hazrat e Abu Bakr Siddiq radiy-Allahu anhu ki zuaja Umme Rummaan,
aur unke bachche Asma, Abdullah aur Aa’isha.
Aapki zauja Baraaka aur beta Usaama, Talhah ibn Ubaydullah, Abdullah ibn Urayqit radiy-Allahu anhu ko apne saath Makka se Madina Sharif lekar aaye.
Jab Huzoor Sallallahu alaihi wassallam ne Sahaba me aapas me Mawaakhaat qaa’im ki, to Aapko apne chacha Hazrat e Hamza bin Abdul Muttalib radiy-Allahu anhu ka bhai banaya.




Aapki 6 biwiya, 2 sahabzaade aur 1 sahabzaadi hai.
(1) Durrah (Fakhita) bint Abi Lahab bin Abdul Muttalib
(2) Umme Ayman, Barakah bint Sa’alaba bin Amr (Huzoor Sallallahu alaihi wassallam ki Baandi) se
Ek Sahabzaade : Usama [Wiladat 3 Nabawi (612 A.D.)]
(3) Hind bint Awwaam
(4) Umme Mubashshir, Humayma bint Sayfi [Nikah 2 Hijri (623 A.D.)]
(5) Zaynab bint Jahsh bin Riyab [Nikah 3 Hijri (625 A.D.) Talak 4 Hijri (626 A.D.)]
(6) Umme Kulṡum bint Uqba [Nikah 628 A.D.) Talak] se
Ek Sahabzaade : Zaid (Bachpan me hi inteqaal hua)
Ek Sahabzaadi : Ruqayya.
Jab Aapne Hazrat e Zaynab bint Jahsh ko talak de diya aur uske baad Hazrat e Zaynab bint Jahsh radiy-Allahu anha ka nikah Huzoor Sallallahu alaihi wassallam ke saath hua to ALLAH ta’ala ne Aayat naazil farmayi:
‘Phir jab Zaid ne use [Zainab ko] talak dene ki garz puri karli, to hum ne usse Aapka nikah kar diya taake mo’mino par unke munh bole beto ki biwiyo (ke saath nikah) ke baare me koi harj na rahe jab ke wo (talak dekar) unse alag ho gaye ho, Aur Allah ka hukm to pura kiya jaane waala hi tha.’
(Quran: Surah al-Ahzaab, Aayat 37)
Chunaanche Aap ek aise Sahabi e Rasool hain jinka naam Quran majeed me aaya hai.
Isi tarah jab ALLAH ki taraf se Aayaatein naazil hui :
(1) ‘Tum unko unke baap (hi ke naam) se pukara karo, Yehi ALLAH ke nazdeek zyada adl hai, Phir agar tume unke baap ma’aloom na ho to wo deen me tumhare bhaai aur tumhare dost hain.’
(Quran: 33 Surah al-Ahzaab, Aayat 5)
(2) ‘Aur Mohammad (Sallallahu alaihi wassallam) tumhare mardo me se kisi ke baap nahi, lekin wo ALLAH ke Rasool hain aur tamaam nabiyo ke baad (tashreef laakar) silsila e nabuwwat ko khatm karne waale aakhari nabi hain, Aur Allah har cheez ka khoob ilm rakhne wala hai.’
(Quran: 33 Surah al-Ahzaab, Aayat 40)
Iske baad logo ne Aapko Zaid ibn Muhammad ke badle Aapke asli naam Zaid ibn Haarisah kehkar pukaarna shuru kar diya.
Aap Tirandaaji ke maahir the.
Aapne Jung e Badr, Jung e Uhud, Jung e Khandaq aur Jung e Khaibar shaamil hokar apni shuja’at dikhayi.
Jung e Badr me fatah ke baad Huzoor Sallallahu alaihi wassallam Aapko Hazrat Abdullah ibn Rawaahah radiy-Allahu ta’ala anhu ke saath fatah ki khush-khabari dene ke liye Madina Sharif bheje.
Aap Sulaih Hudaibiyah ke mauqe par bhi haazir the.
Huzoor Sallallahu alaihi wassallam Islami fauj ke saath Banu Mustaliq se jung ke liye gaye, to Aapko Madina Sharif me apna Naa’ib banakar gaye the.
Huzoor Sallallahu alaihi wassallam ne Aapko sath (7) jung me Islami fauj ka Saalaar banakar bheja tha.
(1) Jung e Qaraada– Najd ke qareeb Makka ke qaafile ke saath [Jamadi us saani 3 Hijri (November 624 A.D.)]
(2) Jung e Jumum– Banu Saalim ke saath [Rabi us saani 6 Hijri (September 627 A.D.)]
(3) Jung e Is– Makka ke qaafile ke saath [Jamaadi ul awwal 6 Hijri (September 627 A.D.)]
(4) Jung e Taraf– Nakhl ilaaqe me.
(5) Jung e Waadi al-Qura– Banu Faraza qabeele ke saath, Jisme aap shadeed jakhmi hue. [Jamaadi us saani 6 Hijri (November 627 A.D.)]
Phir Aap Sha’aban 6 Hijri (January 628 A.D.) me Islami fauj ke saath dobara Waadi al-Qura gaye aur Banu Faraza ko haraaya.
(6) Jung e Hisma– Juzam qabeele ke saath [Jamaadi us saani 6 Hijri (October 628 A.D.)]
(7) Jung e Mu’tah – Byzantine lashkar ke saath [Jamaadi us saani 8 Hijri (October 629 A.D.)]
7 Hijri (629 A.D.) me Huzoor Sallallahu alaihi wassallam ne apne Sahaba ko khato (letter) ke saath Islam ki daawat ke liye alag alag mulko ke baadshaah ke paas bheje.
Hazrat Haaris bin Umair al-Azdi radiy-Allahu ta’ala anhu ko safeer banakar Bosra ke baadshaah ki jaanib bheja.
Hazrat Haaris bin Umair Azdi jab maqaame Mu’tah par pahunche to waha ke governor Sharjeel Ghassani ne aapko rokkar shaheed kar diya.




Jab Huzoor Sallallahu alaihi wassallam ko pata chala to Aapne Jamaadi ul awwal 8 Hijri (September 629 A.D.) ko Hazrat e Zaid bin Haarisah radiy-Allahu ta’ala anhu ko saalaar banakar 3000 musalmano ka lashkar bheja.
Jab musalman Musharif pahunche to pata chala ke Byzantine aur unke saathiyo ka lashkar taqreeban 200000 ka hai.
Musalmano ne intezar karne ka aur Madina Sharif se madad mangwane ka mashwara kiya.
Magar Hazrate Abdullah ibn Rawahah radiy-Allahu ta’ala anhu ne irshad farmaya ke ‘Musalman baatil se jung karne se ya shaheed hone se darta nahi hai.’
Hazrat Zaid ibn Haarisah radiy-Allahu ta’ala anhu ne pehle kaafiro ko Islam ki daawat di, magar wo na maane.
Aakhirkaar maqaame Mu’tah par muslim lashkar ne kaafiro ke saath jung ki.
Aapne bahot bahaaduri ke saath jung ki.
Magar shadeed jakhmi hokar aakhirkaar shaheed ho gaye.
Aapki shahaadat ke baad Hazrat Ja’afar bin Abu Taalib radiy-Allahu ta’ala anhu Islami lashkar ke saalaar bane.
Unki shahadat ke baad Hazrat e Abdullah ibn Rawahah radiy-Allahu ta’ala anhu saalaar e lashkar bane aur woh bhi shaheed ho gaye.
Aap ka wisaal 5 Jamaadi ul awwal 8 Hijri (September 629 A.D.) ko Junge Mu’tah ke dauraan hua.
Aapka mazaar Mu’tah (Jordan) me hai.
ALLAH ta’ala uske Habeeb Sallallahu alaihi wassallam ke sadqe me
Aur Hazrat Zaid ibn Haarisah radiy-Allahu ta’ala anhu aur tamaam is aur shaaba ke Waseele se
Sab ko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sabko dunya wa aakhirat me kaamyaabi ata farmaye aur Sabki nek Jaayiz muraado ko puri farmaye.
Aameen

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy