- Advertisement -

Hazrat Shaikh Abu Bakr Shibli rahmatullahi alaihi

Alqaab: Taaj-ul-Auliya, Qutb-ul-Aarifeen.
Aapki wiladat 247 Hijri (861 A.D.) me Samarra (Iraq) me hui.
Aapke waalid ka naam Yunus hai.
Aapke pariwaar ka watan Khorasan ka Shibla gaanv tha.
Aapka bachpan Baghdad me guzra.
Aap 30 saal tak Hadees aur Fiqh ki ta’aleem haasil karte rahe.
Aapne Hazrat Imam Maalik ki ‘Muwatta’ ko hifz kiya.
Hazrat Shaikh Abu Bakr Shibli rahmatullahi alaihi Nihawand ke governer the.
Ek baar Khalifa ne apne tamaam governer ko apne mahel me ek mehfil me bulaya, jisme wo apne ek khaas aur qareebi shakhs ko ek ilaake ka governor ka ohada dene wale the.
Hazrat Shaikh Abu Bakr Shibli bhi is mehfil me saamil hue.
Khalifa ne us shakhs ko governer ka qeemati kapda diya.
Us naye governer ko jukhaam ho jaane ki wajah se jaldi me use apna naak saaf karne ke liye us qeemati kapda Istemal karna pada.
Khalifa yeh dekhkar ghussa ho gaya.
Use laga ke ye meri tauheen hai aur us ne fauran use governer ke ohade se barkhaasht kar diya.




Aapne yeh sab dekha to fauran khayal aaya ke “Ek chhoti si galti ki wajah se khalifa ne is shakhs ko governer ke ohade se mehroom kar diya. Aur hum to Maalik e Kaa’inaat Rabbul aalameen ki na-farmaani karte rehte hain aur gunaah karte rehte hain.”
Aap governer ka ohada chhodkar durwesho ki sohbat me rehne lage.
Aapne bahot saare Sufi mashaa’ikh ki sohbat me rehkar faiz hasil kiya.
Aakhir me aap Hazrat Khair-un-Nassaaj rahmatullahi alaihi ke shaagird bane.
Kuchh arse tak unki sohbat me taaleem hasil karne ke baad unke farmaan par aap Hazrat Junaid al-Baghdadi rahmatullahi alaihi ki baargaah me gaye.
Unho ne aapko kai saal tak apni sohbat me rakhkar taaleem mukammal ki.
Hazrat Junaid al-Baghdadi rahmatullahi alaihi Aap se bahot mohabbat karte the.
Aap Waaqif-e-Rumooz-e-Khafi wa Jali the.
Aap hamesha saadgi pasand farmaate the aur akṡar waqt tanhai me guzaarte.
Aap puri raat jaagkar Ibadat o Riyazat karte.
Ek baar Aap ne wuzu ke waqt miswak talaash kiya magar na mila.
Aap ne ek deenaar kharch karke dusra mishwak khareeda.
Logo ne kaha “Aap ne mishwak itna mahenga kyun khareeda?”
Hazrat Shaikh Abu Bakr Shibli rahmatullahi alaihi ne farmaya “Yeh dunya aur uski har cheez ALLAH ta’ala ke nazdeek machchhar ke baraabar bhi nahi hai. Agar Qayamat ke din ALLAH mujhse sawaal kare ke Tum ne mere mehboob Sallallahu alaihi wassallam ki sunnat ko kyun chhoda, maine jo maal tumhe ata kiya tha uski qeemat machchhar ke barabar bhi nahi thi. Phir tum ne use sunnat ada karne ke liye kyun kharch nahi kiya to main kya jawab dunga?”
Hazrat Abu Bakr ibn Mujahid apne zaamane ke bahot bade wali aur Imam hain.
Aapki taqreer sunne ke liye bahot badi taadad me ulama jama hote the.
Ek martaba Hazrat Abu Bakr Shibli unki mehfil me pahunche to wo fauran adab ke saath khade ho gaye Aur phir aage aakar mohabbat ke saath aapse gale mile aur aapki peshaani ko chuma.
Yeh dekhkar mehfil me se ek shakhs ne khade hokar arz kiya “Huzoor! Aapne is shakhs ki ta’azeem wa takreem kyun ki?”




Hazrat Abu Bakr ibn Mujahid ne farmaya “Aye logo! Maine iske saath wo hi kiya hai, jo Huzoor Rasool-Allah Sallallahu alaihi wassallam ko iske saath karte dekha tha.”
Phir aapne aage farmaya “Ek baar maine khwab me dekha ki Huzoor Rasool-Allah Sallallahu alaihi wassallam ki mubarak mehfil saji hui hai. Aur jab Hazrat Abu Bakr Shibli mehfil me tashreef laaye to Huzoor Rasool-Allah Sallallahu alaihi wassallam khade ho gaye aur aage aakar unki peshaani ko chuma.
Maine arz kiya: ‘Ya Rasool-Allah Sallallahu alaihu wassallam, Aap inse itni zyada mohabbat ke saath sulook kyun kar rahe hain?’
Huzoor Rasool-Allah Sallallahu alaihi wassallam ne faramaya: ‘Yeh har namaz baad “Laqad jaa’akum rasoolum” aur “Fa’in tawallaw fa hasbiyallāh”. (Surah al-Taubah, Aayat 128-129) tilawat karta hai aur phir 3 martaba ‘Sallallahu alaika Ya Rasool-Allah’ padhta hai.”
Aqwaal:
‾‾‾‾‾‾‾‾‾‾
Hazrat Shaikh Abu Bakr Shibli rahmatullahi alaihi irshad farmate hain:
(1) Yeh dunya ek aisa bartan hai jisme paani ubal raha hai aur jo uski khubsurti kharab kar raha hai.
(2) Apne sha’oor par qaaboo rakhna aur apni saanso ki hifazat karna Tasawwuf ki haqeeqat hai.
(3) Kisi ne Aapko Tasawwuf ke baare me puchha to aap ne farmaaya ‘Apne dil ko makhlooq aur duniyawi cheezo se door karke Khaaliq e kaa’inaat ki taraf pher dena ye ‘Tasawwuf’ hai.’
(4) Khuda shanaas kabhi Khuda ke siwa kisi se nahi milta aur jo aisa karte hain woh Khuda ko hargiz nahi paa sakte.
Aarif wo hi hai jo na to Khuda ke siwa kisi ka mushaahida kare, na kisi se mohabbat aur baat kare aur na kisi ko apne nafs ka muhaafiz tasawwur kare.
(5) ALLAH ta’ala ki mohabbat aag jaisi hai. Jis tarah aag har cheez ko pighla deti hai, usi tarah ALLAH ki mohabbat ki aag dil ko jalaaye to uski nishani ke taur par aankho se aansoo aane chahiye.
(6) Bure logo ki sohbat ki nahusat se nek bando ke baare me bad gumaani (galat khayaal) paida hoti hai.
Aap Hazrat Shaikh Junaid al-Baghdadi rahmatullāhi alaihi ke mureed aur khalifa hain.
Hazrat Shaikh Abu Bakr Shibli rahmatullahi alaihi ke khulfa:
(1) Hazrat Shaikh Abul Fazl Abdul Azeez bin Haaris Yemeni al-Tameemi rahmatullahi alaihi,
(2) Hazrat Shaikh Abul Hasan Neemalam al-Husri rahmatullahi alaihi,
(3) Hazrat Shaikh Muhammad Zojjaaj rahmatullahi alaihi.
Hazrat Shaikh Abu Bakr Shibli rahmatullahi alaihi ka wisaal 27 Zil Hijjah 334 Hijri (946 A.D.) ko Shabe Juma ke 87 saal ki umr me hua.
Aap ka mazaar Khayrazan, Baghdad (Iraq) me hai.
ALLAH ta’ala uske Habeeb Sallallahu alaihi wassallam ke sadqe me
Aur Hazrat Shaikh Abu Bakr Shibli rahmatullahi alaihi aur tamaam Auliya Allah ke waseele se sabko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sabko dunya wa akhirat me kaamyaabi ata farmaye aur Sabki nek Jaayiz muraado ko puri farmaye.
Aameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy