- Advertisement -

Hazrat Allama Mufti Sayyed Shah Turab ul Haq Qadri Razawi rahmatullahi alaihi

Alqaab: Mujahid e Ahle Sunnat, Shehanshaah-e-Khitabat.
Aapki wilaadat 27 Ramzan 1363 Hijri (15 September 1944 A.D.) ke roz Hyderabad me hui.
Aapke waalid ka naam Sayyed Hasanain Qadri Jilani aur waalida ka naam Akbar-un-Nisaa Begum hai.
Sayyed Shah Turab ul Haq Qadri Razawi rahmatullahi alaihi Hasani Saadaat hai Aur Hazrat Ghaus e azam Shaikh Sayyed Abdul Qadir Jilani radiy-Allahu ta’ala anhu ki nasl se hain.
Aapne ibtidaai ta’aleem Madrasa Tahtaaniyah, Hyderabad me haasil ki.
Taqseem-e-Mulk ke baad 1370 Hijri (1951 A.D.) me Aapka pariwaar Pakistan aa gaya.
P.I.B. Colony, Karachi me qayaam ke dauraan Faize Aam High School me ta’aleem haasil ki.
Phir Hazrat Allama Qari Muhammad Muslih-ud-deen Siddeeqi rahmatullahi alaihi se ta’aleem haasil ki.
Iske baad Aapne Daar-ul-Uloom Amjadia, Karachi me ta’aleem haasil ki.
Ta’aleem mukammal hone ke baad Aap Daar-ul-Uloom Amjadia, Karachi ke Mudaaris aur baad me Sadr bane.
Daar-ul-Uloom Amjadia, Karachi ke har jalse me Aap Khitaab farmate.
Sayyed Shah Turab ul Haq Qadri Razawi rahmatullahi alaihi Jamat e Ahle Sunnat, Karachi ke Ameer aur Jamat e Ahle Sunnat World ke Naazim the.
Aap Jamiat Ulama-e-Pakistan me shaamil hue.
Aap Tehreek-e-Khatme Nabuwwat aur Tehreek-e-Nizaam-e-Mustafa me bhi shareek hokar pur zor kirdaar ada kiya.
Aap Markazi Ruyat-e-Hilaal committee ke Chairman bhi rahe.
Sayyed Shah Turab ul Haq Qadri Razawi rahmatullahi alaihi Madrasa Anwaar-ul-Qur’an Qadriya Razawiya, Jaamia Anwaar-ul-Qur’an Qadriya Razawiya, Gulshane Iqbaal, Muslih-ud-deen Welfare Society, Al-Musallam Welfare Society ke Chairman the aur Daar-ul-Uloom Amjadia ke Naazim-e-Ta’aleemaat (Trustee) the aur Sunni Tehreek Ulama Board, Sunni Raahbar Council, Sunni Ittehaad Council ke Rukn the.
Aur Daar-ul-Uloom Musli-ud-deen, Tehreek-e-Awaam e Ahle Sunnat, Tehreek-e-Ittehaad-e-Ahle Sunnat, Jamiat-e-Isha’at-e-Ahle Sunnat, Bazme Raza, Anjuman-e Isha’at-e-Islaam ke Sar-parast the.
Sayyed Shah Turab ul Haq Qadri Razawi rahmatullahi alaihi chunaav jitkar 1405 se 1408 Hijri (1985 to 1988 A.D.) tak Qaumi Assembly, Pakistan ke member rahe.
Aapne isha’at wa tabligh e deen ke liye Asia, Arab, Europe, America, aur Africa ke kai mulko ka safar kiya.
Aapne apni Taqreer, tasannif aur Fatawe ke zariye Ahle Sunnat wal Jama’at ki azeem khidmat ki hai.
1388 Hijri (1968 A.D.) me Sayyed Shah Turab ul Haq Qadri Razawi rahmatullahi alaihi Bareilly tashreef laaye, to Huzoor Mufti e azam e Hind Mustafa Raza Khan Bareilwi rahmatullahi alaihi ne Aapko Masjid-e-Raza me imamat ka sharf ata faramaya.



Tasannif:
Sayyed Shah Turab ul Haq Qadri Razawi rahmatullahi alaihi ki likhi hui mash’hoor kitabein:
(1) Tafseer-e-Surah-al-Faatiha
(2) Tafseer Surah Wa-Duha taa Surah an-Naas
(3) Anwaar-ul-Quran
(4) Zia-ul-Hadees
(5) Jamaal-e-Mustafa (Sallallahu alaihi wassallam)
(6) Fazaa’il-e-Sahaba wa Ahle Bait
(7) Shahadat-E-Imam Hussain (radiy-Allahu ta’ala anhu)
(8) Imam e Azam Abu Hanifa
(9) Kitaab-us-Salaat
(10) Masnoon Duaein
(11) Tasawwuf aur Tareeqat
(12) Islaami Aqaa’id
(13) Jannati log kaun?
(14) Mazaraat-e-Auliya aur Tawassul
(15) Falaah-e-Daarain
(16) Rasool e Khuda (Sallallahu alaihi wassallam) ki Namaz
(17) Muballigh banaane waali Kitaab
(18) Deeni Ta’aleem
(19) Khawaatin aur Deeni masail
(20) Mubaarat Raatein
(21) Fazaa’il-e-Sha’abaan-ul-moazzam.
1386 Hijri (1966 A.D.) me Aapka nikah Akhtar bint e Hazrat Allama Qari Muhammad Muslih-ud-deen Siddeeqi ke saath hua.
Sayyed Shah Turab ul Haq Qadri Razawi rahmatullahi alaihi ke 3 saahabzaade aur 6 saahabzaadiya hain.
Saahabzaade:
(1) Siraaj-ul-Haq
(2) Abdul Haq
(3) Fareed-ul-Haq
Aap Hazrat Mufti e azam e Hind Mustafa Raza Khan Bareilwi rahmatullahi alaihi ke mureed aur khalifa hain.
Hazrat Allama Qaari Muhammad Muslih-ud-deen Siddeeqi rahmatullahi alaihi aur Hazrat Maulana Faazil-ur-Rahman bin Zia-ud-deen Madani ne bhi Aapko khilaafat ata farmai hai.
Aapke khalifa:
Hazrat Allama Sayyed Shah Abdul Haq Qadri.
Sayyed Shah Turab ul Haq Qadri Razawi rahmatullahi alaihi ka wisaal beemaari ke sabab 4 Moharram 1438 Hijri (6 October 2016 A.D.) ko Jumerat ke roz hua.
Aapki namaz e janaza Memon Masjid me namaz e Juma ke baad padhayi gayi.
Aap ki namaz e janaza aapke saahabzaade Hazrat Allama Sayyed Shah Abdul Haq Qadri ne padhayi.
Sayyed Shah Turab ul Haq Qadri Razawi rahmatullahi alaihi ka mazaar Jodia Bazar Kharadar, Karachi (Pakistan) me hai.
ALLAH ta’ala uske Habeeb Sallallahu alaihi wa sallam ke sadqe me
Aur Hazrat Allama Mufti Sayyed Shah Turab ul Haq Qadri Razawi rahmatullahi alaihi aur tamaam Auliya Allah aur Ahle bait ke waseele se
Sabko mukammal ishq e Rasool ata farmaye aur Sabke imaan ki hifazat farmaye aur Sabko nek amal karne ki taufiq ata farmaye.
Aur Sabko dunya wa aakhirat me kaamyaabi ata farmaye aur Sabki nek Jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy