Hazrat Allama Mufti Muhammad Mustafa Raza Khan (Mufti E Azam Hind) rahmatullahi alaihi

Alqaab: Mufti e azam e Hind, Taajdaar e Ahle Sunnat, Shams-ul-Aarifeen, Maahtaab e Rushd o Hidaayat.
‾‾‾‾‾‾‾
Mufti E Azam Hind rahmatullahi alaihi ki wiladat 22 Zil Hijjah 1310 Hijri (18 July 1892 A.D) ko Bareilly me hui.

Aap ke waalid ka naam Aala Hazrat Imam Ahmad Raza Khan bin Maulana Naqi Ali Khan rahmatullahi alaihi aur waalida ka naam Sayyeda Irshad Beghum bint Shaikh Fazl Husain hai.

26 Rabi’ ul aakhir 1314 Hijri ko Aala Hazrat Imam Ahmad Raza rahmatullahi alaihi Ne Aap ki Bismillah khwaani ki.

Mufti E Azam Hind rahmatullahi alaihi ne apne bade bhai Hujjat-ul-Islam Maulana Haamid Raza Khan ke paas Quran Majeed ki ta’aleem haasil ki.

Iske baad Maulana Shah Raham Ilahi Manglori, Maulana Sayyed Basheer Ahmad Aligadhi aur Maulana Zahur ul Husain Faarooqi Rampuri ke paas ta’aleem haasil ki Aur apne waalid Imam Ahmad Raza Khan ke paas bhi fiqh aur dusre uloom ki ta’aleem haasil ki.

Mufti E Azam Hind rahmatullahi alaihi Quran, hadees, tafseer, fiqh, sarf, nahaw, tajweed, balaaghat, kalaam, falsafa, tasawwuf, mantiq, seerah, taareekh, aqaa’id, riyaazi, tauqeet, jaafar aur haayat jaise bahot saare uloom ke maahir the.

Mufti E Azam Hind rahmatullahi alaihi ne 13 saal ki umr me Fatawa dena shuru kiya.

Ek baar Aap Daar ul Ifta gaye to dekha ki Hazrat Maulana Zafar-ud-deen Bihari koi fatawa likh rahe the aur hawale ke liye almari me se Fatawa Razawiya nikal rahe the.

Ye dekhkar Mufti E Azam Hind rahmatullahi alaihi ne farmaya ‘Kya aap jawab ke liye Fatawa Razawiya par munhasar hain?’

Unho ne kaha ‘Theek hai, Tum bagair kitab dekhe is ka jawab do.’

Wo ‘Raza’at’ ke baare me mas’ala tha aur aap ne uska sahi jawab likhkar diya.

Wo fatawa Aala Hazrat ke paas tehqiqat ke liye bheja gaya.

Aala Hazrat use padhkar khush hue aur us par apne dastkhat kiye.

Phir Aala Hazrat ne aap ke liye ‘Abul Barkaat Muhiy-ud-deen Jeelaani Aale Rahman urf Mustafa Raza’ ki mohar banakar di.

Mufti E Azam Hind rahmatullahi alaihi ne 50,000 se zyada fatawa jaari kiye.

Mufti E Azam Hind rahmatullahi alaihi 1328 Hijri (1910 A.D) me Daar-ul-uloom Jaamia Manzare Islam, Bareilly me Mudarris bane aur is idaare me 27 saal tak rahe.

Aala Hazrat Imam Ahmad Raza Khan ne Bareilly me Daar-ul-Qaza (Muslim Law Court) shuru kiya aur Hazrat Sadrush Shariah Mufti Amjad Ali Azmi ko usme Qazi banaya aur Huzoor Mufti e Azam e Hind aur Hazrat Burhaan e Millat Maulana Mufti Burhaan-ul-Haq Jabalpuri ko unki madad ke liye rakha.


Pariwaar:

1329 Hijri me Mufti E Azam Hind rahmatullahi alaihi ka Nikah Bibi Faatima Jaan begum bint e Mufti Muhammad Raza Khan se hua.
Mufti E Azam Hind rahmatullahi alaihi ke ek saahabzaade Anwar Raza (jinka inteqal 18 mahine ki umr me hua) aur 6 saahabzaadiya hain.

Sab se badi saahabzaadi Sarkaar beghum ka nikah Hazrat Mufassir e azam Ibraheem Raza Khan rahmatullahi alaihi ke saath hua.

Mufti E Azam Hind rahmatullahi alaihi har kaam shariat ke mutaabiq karte the aur har sunnat e Rasool ko apnate the aur logo ko bhi iske liye taaleem dete the.

Ilm e deen sikhne wale aur masaa’il janne ke liye aane walo ko hamesha sahi jawab dete the, chahe bada ho ya chhota.

Aap haq baat kehne me kisi se darte nahi the Aur har buri bidat ko radd karke logo ko usse door rehne ke liye kehte the.

Mufti E Azam Hind rahmatullahi alaihi kabhi Qibla ki taraf pair nahi karte the aur us jaanib thunkte bhi nahi.

Aap hamesha ba-jamat namaz padhte the, Bareilly me ho ya safar me.

Qabrastan me jaate to fauran Dua e maghfirat karte.

Kisiki mayyat me jaate to kabhi bhi waha khaana nahi khaate.

Logo ko achhe islami naam rakhne ke liye kehte jaise Abdullah, Abdur Rahman, Muhammad aur Ahmad.

Kisi ko koi gham ho to use sabr ki talkeen karte aur ALLAH ko yaad karne ke liye kehte.

Logo ko mustaqbil janne, ya batane se mana farmate the.

Tamaam zindagi Mehfil e Milad wa Mehfil e Zikr me ishq aur adab ke saath saamil hote rahe.

Aap hamesha ek ghulaam ki tarah Aale Rasool ki har khidmat karte rehte Aur ulama ki ta’azeem aur khidmat karte.

1399 Hijri (1979 A.D) me ek martaba ek Sayyeda khatoon apne bete ke saath ilaaj ke liye aai. Garmi ka mausam tha aur aap aaram farma rahe the. Us khatoon ne aap ke khaadimo se kaha ‘Agar Huzoor mufti e azam jaag rahe ho to main unse milna chaahti hu.’

Magar kisi ne Aap ko khalel pahunchaane ki himmat nahi ki. Wo aurat apne bete ko lekar wapas jaane lagi aur kehne lagi ‘Kya main ye samjhu ki yaha Saadaat ki baat bhi nahi suni jaati.’

Jab Aap ne ye suna to fauran apne khaadim ko us sayyeda ko bulaane ke liye kaha. Us aurat ne apne bete ko aap ke paas bheja. Aap ne bahut mohabbat aur ta’azeem ke saath us ladke se uska naam puchha aur apna haath uske sar par rakha. Aur apne khaadim se uske liye saib lane ke liye kaha. Aur phir us Sayyeda khaatoon ko parde me hi apni baat bataane ke liye kaha. Phir unko taweez banakar diya.

Ek baar Hazrat Peer Ala-ud-deen Taahir Qadri rahmatullahi alaihi Bareilly shareef aaye to Aap ta’azeem aur adab ke saath unke peechhe nange paanv chalte the.

Hazrat Sadrush-Shariah Maulana Amjad Ali Aazmi al-Qadri Aala Hazrat ke urs ke mauqe par Bareilly Shareef aate, tab aap unke istaqbaal aur ta’azeem ke liye Railway station tak jaate.


Mufti E Azam Hind rahmatullahi alaihi ne 3 martaba Hajj ada kiye:

(1) 1323 Hijri (1905 A.D),

(2) 1364 Hijri (1945 A.D),

(3) 1391 Hijri (1971 A.D).

Karamat:

(1) Ek baar aap Faizabaad gaye tab Hazrat Maulana Abdul Qayyoom Muzaffarpuri apne saath Aashiq Ali naami ek shakhs ko lekar Aap ke paas Bait ke liye aaye.

Mufti E Azam Hind rahmatullahi alaihi ne usse farmaya “Kaho ki maine apna haath Gaus e azam ke haath me diya.”

Woh bola “Maine apna haath Mufti e azam ke haath me diya.”

Mufti E Azam Hind rahmatullahi alaihi ne phir se farmaya “Kaho ki maine apna haath Gaus e azam ke haath me diya.

Woh bola “Maine apna haath Mufti e azam ke haath me diya hai.

Abhi thodi der pehle aap ne mujhe gunaaho se tauba karwai hai.

Ab main jhoot kaise bol sakta hu.”

Aap ne use samjhaya “Bait ka yehi tareeqa hota hai. Tum mujh se bait kar rahe ho to silsile se hokar ye Gaus e azam tak pahunchta hai.”

Magar woh nahi maana.

Mufti E Azam Hind rahmatullahi alaihi jalaal me aa gaye aur uske sar par apna amama shareef daalkar usse farmaya

“Tum yeh kyun nahi keh rahe ho? Kaho ki maine apna haath Gaus e azam ke haath me diya.

Usne foran kaha “Maine apna haath Ghaus e azam ke haath me diya.”

Woh ye alfaaz lagataar kehta raha yaha tak ki wo be-hosh ho gaya.

Jab use hosh aaya to Maulana Abdul Qayyoom ne use kone me le jaakar puchha ‘Kya hua tha?’

Us shakhs ne kaha ‘Jaise hi Hazrat ne apna amaama mere sar par rakha to maine dekha ki Huzoor Ghaus e azam mere saamne hain aur keh rahe hain ki Aashiq Ali, Mufti e azam ke haath mere haath hain. Wo mere khalifa hain. Kaho ki maine apna haath Ghaus e azam ke haath me diya. Jab maine ye suna to main kehne laga ki maine apna haath Ghaus e azam ke haath me diya aur jab Ghaus e azam rukhsat hue to main behosh ho gaya.’

(2) Maghribi Dinajpur Islampur ilaaqe me ek shakhs ne Huzoor Mufti e azam rahmatullahi alaihi ko mad’oo kiya aur bahot ehtemam kiya.

Jab Hazrat aaram ke liye lete to wo shaks raat bhar jaagta raha. Hazrat ne us raat Tahajjud Ki Namaz na padhi.

Azaan e Fajr ke baad Mufti Mohammad Shareef sahab Amjadi ne hasbe dastoor Hazrat Mufti E Azam Hind rahmatullahi alaihi ko jagaya to Hazrat uthe aur phir ba-jama’at namaz e Fajr padhi.

Nashte ke baad Hazrat Mufti E Azam Hind rahmatullahi alaihi waha se rukhsat ho gaye.

Iske baad us shakhs ne ye kehna shuru kar diya ke ‘Bahot mash’hoor Tha Ke bahot bade Buzurg hain. Maine to unme buzurgi ki koi baat na dekhi. Unho ne Tahajjud Ki Namaz tak nahi padhi.’

Wo Ataab ka Shikaar Hua. Uske ghar me aag lag gayi. Saara ghar aur maal o saamaan jal gaya. Ghar me 10001000 ke note the jalkar raakh ho gaye. Sirf badan ke kapde bache.

Is tabahi se wo pagal jaisa ho gaya, Aitraaf ke ulma ne use tambeeh ki ke ‘Tune ek aarife kaamil ki shaan me gustakhi ki hai. Ye usi ki saza hai.’

Ab use hosh aaya magar kya karta. Dil hi dil me tauba ki. Ittefaaq se saal bhar ke baad Huzoor Mufti e azam rahmatullahi alaihi us atraaf me tashreef le gaye, to usne haazir hokar maafi muangi Aur phir Hazrat Mufti E Azam Hind rahmatullahi alaihi ko apne ghar le gaya aur mureed hua. Us ke baad uski saari pareshaniya aur tang-dasti door ho gayi aur wo khush-haal ho gaya.

(3) General Ayyoob Khan ki hukumat ke dauran Pakistan me har mahine aur khaas kar Shawwaal (Eid-ul-Fitr) aur Zil Hijja (Eid-ul-Adha) ke chand ka elaan karne ke liye Rooyat Hilal Committee banai gayi thi.

Ek baar 29 Ramazan ko ek hawaai jahaaz aasman me ud raha tha aur usme se chand dekhkar Hilal Committee ne chand ho jaane ka elaan kar diya. Magar Pakistan ke Sunni ulama ne ise sahi maanne se inkar kiya. Unho ne har mulk ke ulema ke paas iske liye sawal naama bheja.

Huzoor Mufti e azam ke paas jab ye aaya to Aap ne foran likhkar diya ‘Shariat me chaand dekhkar Roza rakhne ka ya Eid manaane ka hukm hai. Jaha chaand na dikhe waha ke Qaazi ko tehqiqaat karke iske baare me faisla dena chaahiye. Chand zameen par se ya zameen se judi hui jagah se dikhna chahiye. Aur hawaai jahaaz se chand dekhna galat hai. Kyun ki chand ghuroob hota hai, fana nahi hota.

Isi liye kabhi 29wi ko dikhta hai, kabhi 30wi ko. Aur chand dekhne ke liye hawaai jahaaz lekar jaana ho to itni bulandi par se 27wi aur 28wi ko bhi chaand dikh sakta hai.

To is soorat me kya ye maan len ke 27wi ya 28wi ko chand dikh gaya. Koi bhi aaqil is baat ko qubool nahi kar sakta.

Lihaza is soorat e haal me, kya ye munaasib nahi hoga ki 29wi ko chaand dekha jaaye?’

Mufti E Azam Hind rahmatullahi alaihi ka ye fatawa Pakistan ke akhbaaro me bataya gaya. Iske baad Hilaal Committee ko barkhaast kar diya gaya.

Mufti E Azam Hind rahmatullahi alaihi ke bahot saare shaagirdo ne Hindustan aur dusre mulko me Islam ki isha’at ka kaam jaari rakha.


Mufti E Azam Hind rahmatullahi alaihi ke mash’hoor shaagird:

(1) Muhaddees e azam e Pakistan Maulana Muhammad Sardaar Ahmad
(2) Faqeeh e Asr Maulana E’ajaaz Wali Khan
(3) Raees-ul-Atqiya Maulana Mubeen-ud-deen Amrawi
(4) Faqeeh e aazam e Hind Maulana Mufti Shareef-ul-Haq Amjadi
(5) Maulana Muhammad Rehaan Raza Khan Bareilwi
(6) TajushShariah Faqeeh e Islam Mufti Muhammad Akhtar Raza Khan Azhari Bareilwi
(7) Mufti Sayyed Muhammad Afzal Husain
(8) Maulana Qaazi Abdul Raheem Bastawi
(9) Maulana Mufti Burhaan-ul-Haq Jabalpuri.

Aap ne bahot saari Hamd-e-baari ta’ala, Naat shareef aur Manqabat likhi hain.
Aapki likhi hui kitaab ‘Saamaan e Bakhshish’ (Majmua e Naat shareef) mash’hoor hai.

Mufti E Azam Hind rahmatullahi alaihi ne taqreeban 40 kitaaben likhi hain.
Jin me se ye mash’hoor hain :

(1) Fataawa Mustafawiya (2 Jild)
(2) Tanweer ul Hujjat bi Tawaaril Hajjah
(3) Tard-ush-Shaitaan
(4) Hujjatul Da’ira bi Jawaabil Hujjatul Hazira
(5) Al-qaul ul Ajeeb fi Ajoobatit Tasweeb
(6) Masaa’il e Sima
(7) Adkhal-ul-Insaan
(8) Almaut-ul-Ahmaar
(9) Noor-ul-Irfaan
(10) Saif-ul-Jabbaar
(11) Malfoozaat e Aa’la Hazrat.

Aap Hazrat Allama Shaah Sayyed Abul Husain Ahmad Noori Barkaati Qadri rahmatullahi alaihi ke mureed aur khalifa hain.

Jab aap ki umr 6 mahine thi tab aap ke Peer Hazrat Allama Shaah Sayyed Abul Husain Ahmad Noori Barkaati Qadri rahmatullahi alaihi ne aap ko dekhkar farmaya tha ‘Yeh bachcha ALLAH ka wali ma’aloom hota hai aur ALLAH ke fazl se ye deen e islam ki khub khidmat karega. Ye faiz o barkat ka samundar hai aur log is se faizyaab hote rahenge.’ Phir unho ne apni ungli aap ke munh me rakhi.


Mufti E Azam Hind rahmatullahi alaihi ke Khulfa:

Asia me:

(1) Hazrat Mufassir-e-aazam Maulana Ibrāheem Raza urfe Jeelaani Miyan Bareilwi rahmatullahi alaihi
(2) Hazrat Maulana Rehaan Raza Khan Bareilwi rahmatullahi alaihi
(3) Hazrat TajushShariah Maulana Mufti Muhammad Akhtar Raza Khan urfe Azhari Miyan Bareilwi rahmatullahi alaihi
(4) Hazrat Ameen-e-Shariat Allama Sibtain Raza Khan Bareilwi rahmatullahi alaihi
(5) Hazrat Sadr-ul-Ulama Maulana Mufti Tehseen Raza Khan Bareilwi rahmatullahi alaihi
(6) Hazrat Habeeb Raza Khan Bareilwi rahmatullahi alaihi
(7) Hazrat Mohaddeeṡ-e-aazam e Pakistan Maulana Sardaar Ahmad rahmatullahi alaihi
(8) Hazrat Sher Besha e Ahle Sunnat Maulana Hashmat Ali Khan rahmatullahi alaihi
(9) Hazrat Mujahid-e-Millat Maulana Shaah Habeeb-ur-Rahman Alawi rahmatullahi alaihi
(10) Hazrat Faqeeh-e-Asr Maulana E’ajaaz Wali Khan rahmatullahi alaihi
(11) Hazrat Allama Sayyed Shaah Ahmad Saeed Muhaddees Kaazmi rahmatullahi alaihi
(12) Hazrat Sayyed Ahmad Ali Ajmeri rahmatullahi alaihi
(13) Hazrat Allama Qaazi Sayyed Shams-ud-deen Ja’afari al-Husaini Jawanpuri rahmatullahi alaihi
(14) Hazrat Haaji Mubeen-ud-deen Muhaddees Amrohi rahmatullahi alaihi
(15) Hazrat Shaikh-ul-Hadees Allama Abdul Mustafa Azhari Amjadi rahmatullahi alaihi
(16) Hazrat Khaleel-ul-Millat Mufti Muhammad Khaleel Khan Barkaati rahmatullahi alaihi
(17) Hazrat Soofi Muhammad Iqbal Razawi rahmatullahi alaihi
(18) Hazrat Mufti Shareef-ul-Haq Amjadi Mohaddees rahmatullahi alaihi
(19) Hazrat Bahr-ul-Uloom Mufti Abdul Mannaan rahmatullahi alaihi
(20) Hazrat Maulana Mushtaaq Ahmad Nizaami rahmatullahi alaihi
(21) Hazrat Ustaaz-ul-Ulama Maulana Muhammad Jahaangeer Fatehpuri rahmatullahi alaihi
(22) Hazrat Mufti Sayyed Afzal Husain al-Qadri rahmatullahi alaihi
(23) Hazrat Maulana Shaah Muhammad Ibraheem Khushtar Siddeeqi Razawi rahmatullahi alaihi
(24) Hazrat Shaikh ul-Hadeeṡ Maulana Abdul Qayyoom Hazarwi rahmatullāhi alaihi
(25) Hazrat Muhaddis e kabeer Maulana Zia-ul-Mustafa Qadri Amjadi
(26) Hazrat Faqeeh e aazam e Hind Maulana Mufti Shareef-ul-Haq Amjadi rahmatullahi alaihi
(27) Hazrat Qaazi Abdur Raheem Bastawi rahmatullahi alaihi
(28) Hazrat Maulana Mufti Muhammad Husain Muhaddees rahmatullahi alaihi
(29) Hazrat Mufti Sayyed Abdul Aleem Qadri (Mumbai)
(30) Hazrat Maulana Muhammad Ibraheem Turki rahmatullahi alaihi (Rajkot, Gujarat)
(31) Hazrat Maulana Qaari Muslih-ud-deen Siddeeqi Amjadi Mohaddees rahmatullahi alaihi (Karachi / Pakistan)
(32) Hazrat Allama Maulana Muhammad Zareef Faizi Chishti rahmatullahi alaihi (Ahmadpur Sharqia, Punjab / Pakistan)
(33) Hazrat Allama Mufti Manzoor Ahmad Faizi Chishti rahmatullahi alaihi (Ahmadpur Sharqia, Punjab / Pakistan)
(34) Hazrat Mujahid-e-Ahle-Sunnat Maulana Allama Sayyed Shah Turab-ul-Haq Qadri Jilani rahmatullahi alaihi (Pakistan)
(35) Hazrat Mufakkir e Islam Allama Maulana Qamar-uz-zama Aazmi
(36) Hazrat Mufassir e Quran Allama Qaari Zaheer-ud-deen Khan
(37) Hazrat Ashraf-ul-Fuqaha Mufti Mujeeb Ashraf Nagpuri
(38) Hazrat Allama Maulana Mufti Abdul Haleem Siddeedi Nagpuri
(39) Hazrat Mufti Azeez-ul-Hasan
(40) Hazrat Dr. Sayyed Shah Muhammad Ameen Miyan Barkati Marehrawi (Ph.D.)
(41) Hazrat Dr. Sayyed Shah Mufti Ghulaam Sarwar al-Husaini rahmatullahi alaihi (Ph.D. Arabic Grammer)
(42) Hazrat Siraj-e-Millat Allama Sayyed Siraaj Azhar Qadri Razawi rahmatullahi alaihi (Mumbai)
(43) Hazrat Allama Mufti Sayyed Shaahid Ali Rampuri
(44) Hazrat Shehbaaz-e-Deccan Maulana Qaari Muhammad Mujeeb Ali Qadri Razawi
(45) Hazrat Allama Abdul Sattaar Hamadani
(46) Hazrat Sayyed Tasneem-ul-Qadri
(47) Hazrat Raaqim-ul- Huroof Maulana Qaari Muhammad Amaanat Rasool
(48) Hazrat Mufti Sayyed Muhammad Afzal Husain
(49) Hazrat Allama Maulana Mufti Mehmood Akhtar Qadri Razawi Amjadi (Mehmoodul Ulema) Qazi E shehar Mumbai


Arab mulk me:

(1) Hazrat Qutb-ul-Waqt Sayyed Ameen Qutbi Makki rahmatullahi alaihi
(2) Hazrat Shaikh Sayyed Abbaas Alawi al-Hasani Maaliki rahmatullahi alaihi
(3) Hazrat Ustaaz-ul-Ulama Shaikh Noor Muhammad Saif Makki rahmatullahi alaihi
(4) Hazrat Sayyed Muhammad Alawi al-Maaliki Hasani Mohaddees rahmatullahi alaihi
(5) Hazrat Maulana Shaikh Fazl-ur-Rahman Qadri al-Madani rahmatullahi alaihi
(6) Hazrat Shaikh Sayyed Muaz Fat’hulluh Husaini al-Shaami rahmatullahi alaihi.

South Africa me:

(1) Hazrat Maulana Muhammad Ahmad Muqaddam rahmatullahi alaihi
(2) Hazrat Maulana Abdul Hameed Palmer al-Qadri Noori rahmatullahi alaihi
(3) Hazrat Khaadim-ul-Ilm Shaikh Abu Muhammad Abdul Haadi Qadri Razawi rahmatullahi alaihi.

Europe me:
(1) Hazrat Ghufraan Siddeeqi (America)
(2) Hazrat Mawlana Badrul Qaadri (Holland)


Mufti E Azam Hind rahmatullahi alaihi ka wisaal 14 Moharram 1402 Hijri (12 November 1981 A.D) ko raat ko 1:40 ko 92 saal ki umr me hua.

Mufti E Azam Hind rahmatullahi alaihi ki namaz e janaza Hazrat TajushShariah Maulana Mufti Muhammad Akhtar Raza Khan urfe Azhari Miyan Bareilwi rahmatullahi alaihi ne padhai. Taqreeban 25,00,000 log is me saamil hue.

Aap ka mazaar Bareilly Shareef (Uttar Pradesh) me Aala Hazrat Imam Ahmad Raza Khan rahmatullahi alaihi ke bagal me hai.

ALLAH ta’ala uske Habeeb sallallahu alaihi wassallam ke sadqe me Aur Huzoor Mufti e azam e Hind Mustafa Raza Khan Bareilwi rahmatullahi alaihi aur tamaam Auliya Allah ke waseele se Sab ko mukammal ishq e Rasool ata farmaye aur Sab ke Imaan ki hifazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmaye aur Sab ki nek jaayiz muraado ko puri farmaye.
Aameen.

2 thoughts on “Hazrat Allama Mufti Muhammad Mustafa Raza Khan (Mufti E Azam Hind) rahmatullahi alaihi”

  1. Pingback: Hazrat Allama Mufti Sayyed Shah Turab Ul Haq Qadri Razawi Rahmatullahi Alaihi | Islaah

  2. Pingback: Hazrat Mufti Amjad Ali Azmi (Sadrush Shariah) Rahmatullahi Alaihi | Islaah

Comments are closed.

error: Content is protected !!
Scroll to Top