- Advertisement -

Hazrat Maulana Muhammad Ibraheem Raza Khan urfe Jilani Miyan rahmatullahi alaihi

Alqaab: Mufassir e azam, Qamr-ul-Aarifeen.
Hazrat Maulana Muhammad Ibraheem Raza Khan rahmatullahi alaihi ki wiladat 10 Rabi’ ul aakhir 1325 Hijri (May 1907 A.D.) ko Bareilly Sharif (Uttar Pradesh) me hui.
Hazrat Muhammad Ibraheem Raza Khan rahmatullahi alaihi ke waalid ka naam Hazrat Hujjat ul Islam Hamid Raza Khan bin Aala Hazrat Imam Ahmad Raza Khan rahmatullahi alaihi hai.
Hazrat Muhammad Ibraheem Raza Khan rahmatullahi alaihi ke daada jaan Aala Hazrat Imam Ahmad Raza Khan rahmatullahi alaihi ne aap ke kaan me Azaan aur Iqaamat padhi aur khajoor chabaakar aap ke munh me rakhi.
Hazrat Muhammad Ibraheem Raza Khan rahmatullahi alaihi ke aqeeqah me Aala Hazrat Imam Ahmad Raza Khan rahmatullahi alaihi ne madrasa ke tamaam talba ko khaas daawat ki aur ye ehtamaam kiya ke sab khush ho.
14 Sha’abaan 1329 Hijri (July 1911 A.D.) ko aap ki Bismillah khwaani ki gayi.
Hazrat Maulana Muhammad Ibraheem Raza Khan rahmatullahi alaihi ne apni waalida se Quran majeed ki aur Urdu ki taaleem haasil ki.
7 saal ki umr me aap ko Daar-ul-Uloom Manzar e Islam me daakhil kiya gaya.
Hazrat Hujjat ul Islam Maulana Haamid Raza Khan, Hazrat Maulana Ahsaan Ali Saahib Muhaddees Faizpuri, aur Hazrat Muhaddees e azam Pakistan Maulana Sardaar Ahmad se taaleem haasil ki.
1344 Hijri (1926 A.D.) me 19 saal ki umr me aap Aalim aur Faazil hue.
Hazrat Hujjat ul Islam ne aap ki dastaarbandi ki aur aap ko khilaafat ata farmayi.
Hazrat Hujjat ul Islam ke wisaal ke baad Huzoor Mufti e azam e Hind ne aap ko khilaafat aur Madrasa ki zimmedaari ata farmayi.
Hazrat Maulana Muhammad Ibraheem Raza Khan rahmatullahi alaihi ne puri zindagi saadgi ke saath guzzari.
Aap hamesha Sunnat e Rasool par amal karte aur sab ko iske liye taaleem dete.
Aap namaz e Fajr ke baad kuchh waqt wazife me guzaarte.
Phir Madrasa me taaleem ke liye jaate.
Aap Muslim Shareef, Tirmizi Shareef aur Mishkaat Shareef ka dars dete.
Hazrat Maulana Muhammad Ibraheem Raza Khan rahmatullahi alaihi apne shaagirdo ki Wahabi ko bad-aqeeda ke baare me bataakar unko radh karne ke liye saboot paish karke taaleem dete.
Hazrat Maulana Muhammad Ibraheem Raza Khan rahmatullahi alaihi bahot achhe muqarrir the.
Ek baar ek 2 roza jalse me pehle din aap ne ek shaandaar taqreer farmayi.
Dusre din Hazrat Muhaddees e azam Kichhauchhwi rahmatullahi alaihi ne taqreer farmayi tab 20 wahabi unke paas aaye aur kaha ke ‘Hazrat ki kal raat ki taqreer se muta’asir hokar hume hamare galat aqeedo ka pata chala hai.’ Aur un logo ne tauba ki.
Aap ne ‘Aala Hazrat’ naam se maahaana risaala jaari kiya aur logo ko Ahle Sunnat wal Jamat ki taaleem dena shuru kiya.




Hazrat Maulana Muhammad Ibraheem Raza Khan rahmatullahi alaihi ki likhi hui kitaabein:

  1. Zikrullah
  2. Ne’amatullah
  3. Hujjatullah
  4. Fazaa’il e Durood Shareef
  5. Tafseer Surah Balad
  6. Tashreeh Qasida Nu’maania

1372 Hijri (1953 A.D.) me aap Haramain shareefain tashreef le gaye tab Makkah mukarrama aur Madeena munawwara ke ulama ne aap ki bahot ta’azeem ki.
Karamat:
(1) Ek baar ek paidaishi gunge shakhs ko aap ki baargaah me laaya gaya. Aap ne us ke liye dua farmai to ALLAH ta’ala ke fazl se wo shakhs bolne laga.
Hazrat ki ye karaamat dekhkar tablighi jama’at ke bahot saare logo ne apni bad-aqeeda se tauba karli.
(2) Ek baar ek shakhs apni biwi ke saath aap ki baargaah me aaya aur arz kiya ke ‘Mera saale ko qatl ke galat ilzaam me giraftaar kar liya gaya hai. Uske pariwaar ki zimmedaari uske upar thi. Aap uski rihaai ke liye dua farma dijiye.’
Aap ne jab jaan liya ke us shakhs ka saala Sunni hai to aap ne ek kagaaz liya aur us par ‘Allahu Rabbu Muhammadin Salla alaihi wa sallama Nahnu Ibaadu Muhammadin Salla alaihi wa sallama’ likhkar diya.
Aur us qaidi shakhs ko yaad karne ke liye aur kasrat se padhne ke liye farmaya.
Aur farmaya ‘Ise taaweez banaakar us shakhs ke baazu par baandhne ke liye kehna. Agar ALLAH ne chaaha to wo riha ho jaayega.’
10 din baad wo dono us shakhs ke saath lekar niyaz (meethaai) lekar aaye aur kaha ‘Aap ki dua se mera saala be-gunaah saabit hua aur dusre do shakhs jinho ne qatl kiya tha unhe umr qaid ki saza hui hai.’
Hazrat Maulana Muhammad Ibraheem Raza Khan rahmatullahi alaihi ne unko Silsila me daakhil kiya aur unhe namaz ki pabaandi karne ka aur kasrat se durood shareef ka wird karne ke liye naseehat ki.
Aqwaal:

  1. Mere apne aib mujhe dusro ke aib dhundhne se rokte hain.
  2. ALLAH ta’ala ne hume 2 haath aur 1 zabaan di hai taake hum sune zyada aur bole kam.
  3. Amal ke bagair ilm rooh ke liye bojh hai.
  4. Sabr Zeher se zyada kadwa lagta hai magar uska phal shahed se zyada meetha hota hai.
  5. ALLAH ta’ala use dunya me bhi raahat deta hai jo aakhirat ke liye nek amal karta hai.
  6. Mulk ki shaan uske ulma se hoti hai.





Hazrat Maulana Muhammad Ibraheem Raza Khan rahmatullahi alaihi ka nikah Sarkaar begum binte Hazrat Mufti e azam e Hind Muhammad Mustafa Raza Khan rahmatullahi alaihi se hua.
Hazrat Maulana Muhammad Ibraheem Raza Khan rahmatullahi alaihi ke 5 bete aur 3 betiya hain.
Saahabzaade:

  1. Hazrat Allama Rehaan Raza Khan
  2. Hazrat Tajushshariah Allama Mufti Mohammad Akhtar Raza Khan
  3. Hazrat Dr. Qamar Raza Khan
  4. Hazrat Manaan Raza Khan Manaani Miya
  5. Hazrat Tanweer Raza Khan.

Saahabzaadiya:

  1. Sarfraaz Begum (Jinka nikah Hazrat Maulana Shaukat Hasan Khan se hua hai)
  2. Sartaaj Begum (Jinka nikah Hazrat Abdul Haseeb se hua hai)
  3. Dilshaad Begum (Jinka nikah Younus Raza Khan se hau hai)

Hazrat Maulana Muhammad Ibraheem Raza Khan rahmatullahi alaihi Hazrat Hujjat ul Islaam Maulana Hamid Raza Khan ke mureed aur khalifa hain.
Huzoor Mufti e azam e Hind Muhammad Mustafa Raza Khan rahmatullahi alaihi ne bhi aap ko khilaafat ata farmayi hai.
Hazrat Maulana Muhammad Ibraheem Raza Khan rahmatullahi alaihi ka wisaal 11 Safar 1385 Hijri (12 June 1965 A.D.) ko Peer ke roz hua.
Aap ki namaz e janaza Mufti Sayyed Muhammad Afzal Husain ne padhaai.
Mufti Muhammad Afzal Husain, Maulana Muhammad Ahsaan Ali, Maulana Sayyed Aarif Ali, Sayyed Ijaaz Husain aur Muhammad Ghaus Khan ne aap ko qabr me utaara.
Hazrat Maulana Muhammad Ibraheem Raza Khan rahmatullahi alaihi ka mazaar Bareilly Shareef (Uttar Pradesh) me Aala Hazrat ke bagal me hai.
ALLAH ta’ala uske Habeeb Sallallahu alaihi wa sallam ke sadqe me
Aur Hazrat Maulana Muhammad Ibraheem Raza Khan rahmatullahi alaihi aur tamaam Auliya Allah ke waseele se
Sab ko mukammal ishq e Rasool ata farmae aur Sab ke Imaan ki hifazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmaye aur Sab ki nek Jaayiz muraado ko puri farmaye.
Aameen.

- Advertisement -

No Comments
  1. […] Allama Qamar Raza Khan rahmatullahi alaihi ne ibtidaai ta’aleem apne waalide mohtaram Maulana Muhammad Ibraheem Raza Khan Bareilwi se haasil […]

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy