- Advertisement -

Hazrat Salman Al Farsi radiy-Allahu ta’ala anhu

Laqab: Waaris-ul-Islam.
Hazrat Salman Al Farsi radiy-Allahu ta’ala anhu ki wiladat 568 A.D. me Hayy, Isfahan (Iran) me hui.
Hazrat Salman Al Farsi radiy-Allahu ta’ala anhu ka paida’ishi naam ‘Roazbeh’ tha.
Hazrat Salman Al Farsi radiy-Allahu ta’ala anhu ke waalid ka naam Hushiel hai.
Hazrat Salman Al Farsi radiy-Allahu ta’ala anhu ke waalid bahot ameer the aur ilaaqe ke sardaar (Dihqan) the.
Aap aatish-parast (Magian) khaandaan me paida hue the Aur jawaan hone par aap ko zimmedaari di gayi ke us aatish ki nigraani rakhe ke wo hamesha jalta rahe.
Aap ke waalid ki bahot saari milkat aur zimmedariya thi.
Ek baar unho ne Hazrat Salman Farsi radiy-Allahu ta’ala anhu ko unke badle kuchh zimmedaari ada karne ke liye bheja.
Raste me wo ek church ke paas se guzre aur waha unki prayer ki awaaz sunkar andar daakhil hue aur unki ibadat ka tareeqa dekhkar unhe laga ke ye mazhab hamare mazhab se behtar hai.
Waha der tak rookne ke baad jab raat ko apne ghar gaye to apne waalid ke puchhne par saari baat batayi.
Unko ye dar laga ke kahi Hazrat Salman Farsi radiy-Allahu ta’ala anhu apna mazhab chhod na de.
Isliye unho ne use pair me zanjeer baandhkar qaid karke rakha.




Hazrat Salman Al Farsi radiy-Allahu ta’ala anhu ne kisi tarah isaiyo (Christian) ko paighaam pahunchaya aur phir ek din waha se bhaagkar Shaam ki taraf ja rahe kaafile ke saath wo Shaam ke ek church me pahunche aur waha ke Paadri ke saath rehkar church ki khidmat karne lage.
Hazrat Salman Al Farsi radiy-Allahu ta’ala anhu ne dekha ke wo paadri mazhab ke naam par apne maanne walo ke paas se maal leta hai aur ghareebo ko dene ke badle khud jama karta hai.
Jab wo paadri mar gaya aur sab log use dafn karne ke liye aaye to Hazrat Salman Al Farsi radiy-Allahu ta’ala anhu ne saari baat unhe batayi.
To unho ne use dafn karna mauqoof rakha aur use patthar maarne lage.
Iske baad jo naya paadri aaya wo bahot achha aur ibadat karne waala tha.
Uski maut ke baad Hazrat Salman Al Farsi radiy-Allahu ta’ala anhu Mosul, Nisibis aur dusri maqaam par Eisaaiyo ke saath rahe.
Aakhir me unho ne suna ke Arab me ek nek shakhs ne ALLAH ke Nabi hone ka elaan kiya hai.
Hazrat Salman Al Farsi radiy-Allahu ta’ala anhu ne Ammuriyah se guzar rahe Banu Kalb qabeele ke Arab sardaaro ke giroh ko unke saath arab me le jaane ke liye kaha aur us ke liye apne paas jo bhi maal tha wo sab unhe de diya.
Wo unko apne saath le gaye.
Magar Madeena Shareef ke qareeb Waadi al-Qura me pahunchkar unho ne apna waada tod diya aur Hazrat Salman Al Farsi radiy-Allahu ta’ala anhu ko Banu Qurayzah ke Usman bin Ash’hal naami ek yahudi ko bech diya.
Usne Hazrat Salman Al Farsi radiy-Allahu ta’ala anhu ko apne bhateeje ko bech diya, Woh Hazrat Salman Al Farsi radiy-Allahu ta’ala anhu ko apne saath Yasrib le gaya.
Ek baar Aap ek darakht ke upar the, tab Aap ne apne Maalik ko kisi se baat karte suna ke Yasrib ke Aws aur Khazraaj khaandan ke log Quba ilaaqe me ek shakhs se milne gaye hain.
Jo Makka Shareef se hijrat karke aaya hai aur wo keh raha hai ke wo ALLAH ka Nabi hai.




Hazrat Salman Al Farsi radiy-Allahu ta’ala anhu ne use us nabi ke baare me kuchh aur bataane ke liye kaha to Maalik ne ghusse me aap ko buri tarah pita aur apne kaam par lag jaane ke liye kaha.
Shaam ke waqt Aap baargaah e Mustafa me pahunche aur kaha ke ‘Maine suna hai aap ne nabi hone ka elan kiya hai aur hijrat karke yaha aaye hain aur pareshaan hain. Main aap ke liye kuchh khajoor laaya hu jo Sadqa hai.’
Huzoor Sallallahu alaihi wa sallam ne use lekar apne ashaaba ko khaane ke liye de diya, Lekin khud nahi khaya.
Phir Huzoor sallallahu alaihi wa sallam jab Quba se Madeena Sharif pahunche to Hazrat Salman Al Farsi radiy-Allahu ta’ala anhu waha gaye aur kaha ‘Main phir se aap ke liye khajoor laaya hu, jo mere taraf se aap ke liye hadiya (tohfa) hai.’
Huzoor sallallahu alaihi wa sallam ne use lekar khud bhi khaaya aur apne ashaaba ko bhi khaane ke liye kaha.
Hazrat Salman Al Farsi radiy-Allahu ta’ala anhu ne eisaayio ki kitaab Injeel me padha tha ke Nabi sadqa nahi khaate.
Isliye Aap ne Islam apna liya.
Baad me Huzoor sallallahu alaihi wa sallam ne unke maalik ko Hazrat Salman Al Farsi radiy-Allahu ta’ala anhu ko aazaad karne ke liye kaha to us ne badle me 40 awakiyah (taqreeban sawa sher) sona aur 300 khajoor ke darakht maange.
Huzoor sallallahu alaihi wa sallam ne apne haatho se khajoor ke bij boye aur usme se ek raat me 300 khajoor ke darakht tayyar hue aur usi saal khajoor dene lage (jo Ajwa ke naam se mash’hoor hai). Aur Huzoor sallallahu alaihi wa sallam ne ek ande ke barabar sona diya jo maale ghanimat me aaya tha.
Hazrat e Salman ne arz kiya ‘Ya Rasool-Allah sallallahu alaihi wa sallam! 40 awakiyah sona chaahiye, Kya itna kaafi hoga?’
Huzoor Sallallahu alaihi wa sallam ne us sone par apni zabaan mubarak pher di.
Phir jab us sone ka wazan kiya gaya to wo barabar 40 awakiyah hua, na zyada na kam. Aur is tarah Hazrat Salman Al Farsi radiy-Allahu ta’ala anhu ko aazad karaya.
Hazrat Salman Al Farsi radiy-Allahu ta’ala anhu hamesha kehte the ‘Main Salman hu, Hazrat e Adam ki aulaad me se Islam ka beta.’
Hazrat Salman Al Farsi radiy-Allahu ta’ala anhu Ashaab e Suffa me saamil hain.
Hazrat e Salman al-Farsi, Abu Zar Jundub ibn Junaada al-Ghaffaari, Miqdaad bin Aswad aur Ammaar ibn Yaasir radiy-Allahu ta’ala anhuma ko Mo’mino ke 4 sutoon kaha gaya hai.
Roze mehshar jab ALLAH ta’ala Hazrat e Eisa alaihis salaam ki qaum me se aur Huzoor Rasool-Allah Muhammad Mustafa sallallahu alaihi wa sallam ki ummat me se un logo ko bulaayega jo apne nabi ke bataye hue deen par saabit qadam rahe tab Hazrat e Eisa alaihis salaam ke hawaariyo ko aur Ummat e Muhammadi me se in 4 ashaaba ko aage kiya jayega.
Huzoor Sallallahu alaihi wa sallam ne Hazrat e Salman Farsi aur Hazrat e Abu Darda radiy-Allahu ta’ala anhuma ko aapaas me bhai banaaya tha.
Hazrat Abu Darda Aap ki har baat maante the.
Ek baar Hazrat Salman Farsi Hazrat Abu Darda ke ghar gaye to pata chala ke unki biwi puraane kapde pehenti hain.




Aap ne puchha to bataaya ke ‘Aap ke bhai Abu Darda dunya ki khwaahishat se hamesha door rehna chaahte hain.’
Itne me Hazrat Abu Darda aaye aur Hazrat e Salman Farsi ke liye khaana lagaaya.
Hazrat e Salman Farsi ne unko bhi saath khaana khane ke liye kaha to unho ne kaha ke ‘Maine roza rakha hai.’
Hazrat e Salman Farsi kaha ke ‘Jab tak tum mere saath khana nahi khaaoge, main bhi nahi khaaunga.’
Ye sunkar Hazrat e Abu Darda aap ke saath khaana khaane ke liye baithe.
Phir raat ko dono saath me so gaye.
Kuchh waqt sone ke baad Hazrat Abu Darda Tahajjud ke liye khade hue.
Hazrat e Salman Farsi ne unko kuchh der wapas sone ke liye kaha.
Hazrat Abu Darda so gaye.
Phir kuchh waqt baad Hazrat Abu Darda phir se khade hue.
Hazrat e Salman Farsi ne phir se sone ke liye kaha.
Jab raat ka aakhri waqt baaqi raha to Hazrat e Salman Farsi ne uthaaye aur dono ne saath me namaz padhi.
Phir Hazrat e Salman Farsi ne unse kaha ke ‘Hamare Rab ke hamare upar haqooq hain, Hamari khud ke bhi hamare upar huqooq hain, Hamare mehmaan ke bhi hum par huquooq hain, Hamare ghar waalo aur rishtedaaro ke bhi ham par huqooq hain. Is liye hame sab ke huqooq ada karne chahiye.’
Hazrat e Abu Darda ne Huzoor Sallallahu alaihi wa sallam ki baargaah me ye sab baatein bayaan ki.
To aap ne fauran farmaya ke ‘Salman ne sach hi kaha hai.’
Aap Jung e badr ke ilaawa dusri bahot saari jungo me saamil hue.
Jung e Badr ke mauqe par aap Ghulaam hone ki wajah se jung me saamil nahi ho sake.
Ghazwa e khandaq ke mauqe par jab ashaaba alag alag mashwara de rahe the, tab Hazrat e Salman Farsi ke mashware par Madeena ki hifazat ke liye Madeena ke ird-gird khandaq khodi gayi aur Jab kaafiro ka lashkar aaya aur jung hui to musalmano ko fateh haasil hui.
Is mauqe par Muhajireen aur Ansaar ashaaba ke giroh ek dusre se ye kehne lage ke Salman Farsi ham se hain.’
Jab Huzoor sallallahu alaihi wa sallam ne ye baat suni to aap ne farmaya ke ‘Salman na Muhajireen me se hai aur na Ansaar me se, Balke wo hum me se hai aur ahle bait ki tarah hai.’
Hazrat e Ali radiy-Allahu ta’ala anhu Aap ko ‘Luqmaan al-Hakeem’ kehkar bulaate the.
Hazrat Salman Al Farsi radiy-Allahu ta’ala anhu ne Quran majeed ka Farsi me tarjuma kiya.
Is tarah Aap Quran majeed ka ghaire arabi me tarjuma karne waale sab se pehle shakhs hain.
16 Hijri me muslim lashkar ne Faars (Iran) ko gher liya aur Hazrat e Salman ne Faarsiyo se kaha ke ‘Main tum logo me se hi hu. Tum par koi zyadati nahi ki jayegi. Tumhare paas 3 raaste hain; Tum log Islam apna lo aur isse tum hamare bhai ban jaaoge, Ya tum musalmano ko hukoomat de do aur Jizyah ada karte raho aur ham tumhari zimmedari uthaayenge, Ya hamare saath jang karo.’
Faarsiyo ne dusra raasta qubool kiya.




Hazrat e Salman Farsi ko 30000 musalman ki fauj ke saath waha ka subedaar (governor) muqarrar kiya gaya.
Aap hamesha saadgi se rehte the aur khud mehnat karke kamate the. Aap ne rehne ke liye apna ghar bhi nahi banaaya tha aur ek kambal ke saath paid ke neeche soya karte the.
Aap Huzoor Sallallahu alaihi wa sallam ke khalifa Hazrat e Abu Bakr Siddeeq radiy-Allahu ta’ala anhu ke khalifa hain aur Siddiqeeya silsila e tareeqat me teesre Shaikh hain. (Jo Hazrat Shaikh Baha-ud-deen Naqshband rahmatullahi alaihi se ‘Naqshbandi’ silsila kehlaata hai.)
Hazrat Salman Al Farsi radiy-Allahu ta’ala anhu ke khalifa Hazrat Imam Qasim ibn Muhammad ibn Abu Bakr Siddeeq rahmatullahi alaihi hain.
Aap ka wisaal 10 Safar 33 Hijri (654 A.D.) me hua.
Aap ka mazaar Madain (Iraq) me hai.
ALLAH ta’ala uske Habeeb Sallallahu alaihi wa sallam ke sadqe me
Aur Hazrat Salman Al Farsi radiy-Allahu ta’ala anhu aur Ashaaba ke waseele se Sab ko mukammal ishq e Rasool ata farmaye aur Sab ke Imaan ki hifazat farmaye aur Sab ko nek amal karne ki taufiq ata farmaye
Aur Sab ko dunya wa aakhirat me kaamyaabi ata farmaye aur Sab ki nek Jaayiz muraado ko puri farmaye.
Aameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy