- Advertisement -

Hazrat Hafiz E Millat Abdul Azeez Muradabadi rahmatullahi alaihi

Alqaab: Hafiz-e-Millat, Ustad-ul-Ulama, Jalaalatul-Ilm.
Hazrat Hafiz Abdul Azeez Muradabadi rahmatullahi alaihi ki wiladat (1894 A.D.) me Peer ke roz Bhojpur (Muradabad, Uttar Pradesh) me hui.
Hazrat Hafiz Abdul Azeez Muradabadi rahmatullahi alaihi ke waalid ka naam Hafiz Ghulaam Noor hai.
Hafiz-e-Millat ne apne waalid se ta’aleem haasil ki aur Hafiz e Quran hue.
Bhojpur me Urdu aur Faarsi ki ta’aleem haasil karne ke baad Aap Muradabad Madrasa Naeemiya me gaye aur waha 3 saal ta’aleem haasil ki.
Iske baad 1342 Hijri (1924 A.D.) me Hazrat Hafiz Abdul Azeez Muradabadi rahmatullahi alaihi Ajmer Madrasa Moeeniya me gaye aur Dars-e-Nizaami mukammal kiya.
Phir Huzoor Hafiz e Millat ne Ajmer me Hazrat Sadrush-Shariah Maulana Amjad Ali Azmi rahmatullahi alaihi se Hadees ki ta’aleem haasil ki.
Magar Hazrat Hafiz Abdul Azeez Muradabadi rahmatullahi alaihi ko 1351 Hijri (1932 A.D.) me Bareilly Shareef me sanad ata ki gai.
Sha’abaan 1352 Hijri (December 1933 A.D.) me Hazrat Sadrush-Shariah ki daawat par Aap Bareilly Shareef gaye aur Hazrat ke farmaan par Hazrat Hafiz Abdul Azeez Muradabadi rahmatullahi alaihi ne Madrasa Ashrafiya Misbaah-ul-Uloom, Mubarakpur me dars wa ta’aleem dena shuru kiya.
29 Shawwaal 1352 Hijri (14 February 1934 A.D.) me Aap ko Madrasa Ashrafiya Misbaah-ul-Uloom ka Sadr-ul-Mudarris banaaya gaya.
Hazrat Hafiz Abdul Azeez Muradabadi rahmatullahi alaihi ke mehnat se Madrasa ki shohrat badhne lagi aur talba ki ta’adaad badhne lagi.
Phir 1353 Hijri (1935 A.D.) me Aap ne madrasa nayi imaarat me ‘Daar-ul-Uloom Ashrafiya Misbaah-ul-Uloom’ naam se shuru kiya jiski bunyaad Aala Hazrat, Maulana Sayyed Ali Husain Ashrafi Miyan aur Hazrat Sadrush-Shariah Maulana Amjad Ali Azmi ke dast e mubarak se rakhi gayi.
Jab talba ki ta’adaad aur badhne lagi aur Madrasa ko ek badi jagah me tabdeel karne ki zaroorat padi tab Rabi ul awwal 1392 Hijri (May 1972 A.D.) me Huzoor Mufti-e-azam e Hind Mustafa Raza Khan aur Allama Arshad-ul-Qaadri ke dast e mubarak se ‘Al-Jaamiatul Ashrafiya’ ki bunyaad rakhi gayi.
Hazrat Hafiz Abdul Azeez Muradabadi rahmatullahi alaihi ki khwaahish thi ke Madrasa me talba ko tamaam uloom ke saath Arabi aur Angrezi dono zabaan ki pukhta taaleem di jaaye.
Taake faarigh hone ke baad duniya ke kisi bhi mulk me wo ta’aleem e deen ka kaam kar sake.
Hazrat Hafiz Abdul Azeez Muradabadi rahmatullahi alaihi ke bahot saare shaagirdo ne khidmat e deen ka kaam jaari rakha hai.



Hazrat Hafiz Abdul Azeez Muradabadi rahmatullahi alaihi ke mash’hoor shaagird:

  1. Qaari Muhammad Muslih-ud-deen Siddeeqi
  2. Faqeeh e azam e Hind Mufti Shareef-ul-Haq Amjadi
  3. Raees-ul-Qalam Allama Arshad-ul-Qaadri (Baani e Jaamia Faiz-ul-Uloom, Jamshedpur, Daar-ul-Uloom Amjadia, Mau wa Jaamia Hazrat Nizaam-ud-deen Aulia, Delhi)
  4. Muhaddees-e-Kabeer Allama Mufti Zia-ul-Mustafa Aazami (Jaamia Amjadiya Razawiya, Ghosi)
  5. Allama Badr-ud-deen Ahmad Razawi
  6. Bahr-ul-Uloom Mufti Abdul Mannaan Aazami
  7. Imam-ul-Ma’aqoolat Maulana Hafiz Abdul Ra’oof Balyawi
  8. Shaikh-ul-Islam Allama Sayyed Muhammad Madani Ashrafi (Baani e Muhaddees-e-Aazam Mission)
  9. Mufakkir-e-Islam Allama Qamar-uz-Zamaan Aazami (Baani e Jami’at-ul-Islaamiya, Ronahi)
  10. Allama Mohammad Ahmad Misbaahi (Sadr e Jami’at-ul-Ashrafia, Mubarakpur)
  11. Allama Yasin Akhtar Misbaahi (Baani e Daar-ul-Qalam, Delhi)
  12. Allama Badr-ul-Qaadri (Islamic Academy, The Hague)
  13. Dr. Jalaal-ud-deen Ahmad Noori (Karachi University)

Hazrat Hafiz Abdul Azeez Muradabadi rahmatullahi alaihi har amal Sunnat e Rasool ke mutaabiq karte the.
Ek baar Hafiz e Millat ke daanye paanv me zakhm ho gaya.
Ek saahab ne dawa laakar kaha ‘Hazrat! Dawa haazir hai.’
Sardi ka mausam tha, Hazrat moza pehne hue the.
Huzoor Hafiz e Millat ne baaye (ulte) pair ka moza utaara to wo saahab bol pade ‘Hazrat! Zakhm to daahine paanv me hai.’
Huzoor Hafiz e Millat ne farmaya ‘Baaye paanv ka pehle utaarna Sunnat hai.’
1386 Hijri (1967 A.D.) me Huzoor Hafiz e Millat ne Hajj ada kiya.
Hazrat Hafiz Abdul Azeez Muradabadi rahmatullahi alaihi ne photo na nikalwakar paaband e shariat hone ka saboot diya.
Madeena munawwara me qayaam ke dauraan ek martaba Aap Roza e Rasool Sallallahu alaihi wassallam par haath uthakar dua kar rahe the to ek Wahabi Police Officer ne Huzoor Hafiz e Millat ko roka aur kaha ke ‘Qibla ki jaanib haath uthakar dua karo.’
Huzoor Hafiz e Millat ne Roza e Rasool ke adab ki wajah se koi jawab na diya.
Magar woh Huzoor Hafiz e Millat ko pichhe khinchkar waha se door karne laga.
Jab usne kaha ke ‘Roza e Rasool ki jaanib rookh karke dua karna Shirk hai.’
Tab Hafiz-e-Millat ne usse kaha ke Quran majeed me ALLAH ta’ala Waseela ke liye farmata hai aur Huzoor Rasool-Allah Sallallahu alaihi wassallam ALLAH ta’ala ki baargaah me Waseela hain.
Usne kaha ‘Nek aamaal ko Waseela banaana chaahiye.’
Huzoor Hafiz e Millat ne farmaya ‘Kya musalman ke nek aamaal hamesha maqbool hote hain.’
Wo khaamosh raha.
Huzoor Hafiz-e-Millat ne farmaya ‘Koi bhi shakhs ye nahi jaanta ke uske nek aamaal qubool hote hain ya nahi. Har insaan qubool hone ki ummeed rakhte hue nek amal karta hai. Lekin Huzoor Rasool-Allah Sallallahu alaihi wa sallam ki zaat mubarak to ALLAH ta’ala ki baargaah me Maqbool hi hai aur isme koi shak nah hai. Aur jo maqbool ho usi ko ALLAH ta’ala ki baargaah me Waseela bana sakte hain. Chunaanche Huzoor Nabi e kareem Sallallahu alaihi wa sallam behtareen Waseela hain.’
Ye sunkar woh Police Officer baghair kuchh kahe waha se chala gaya.



Tasannif:
Hazrat Hafiz Abdul Azeez Muradabadi rahmatullahi alaihi ki likhi hui mash’hoor kitaabein:

  1. Ma’arif-e-Hadees
  2. Fatawa Azeeziya
  3. Irshaad-ul-Qur’an
  4. Anba’-ul-Ghaib
  5. Al-Misbaah-ul-Jadeed
  6. Firqa-e-Na’ajiya
  7. Haashiya Sharh Mishkaat.

Aqwaal:

  1. Dunya me amal karoge to qabr me raahat paaoge.
  2. Har aitraaz ka jawab sahi amal se hi dena chahiye.
  3. Amal karne waale bano kyun ki sahi amal se hi izzat badhti hai.
  4. Maal o daulat ALLAH ta’ala ki ne’amat hai, magar use nek kaam me kharch karne ki aadat bahot badi ne’amat hai.
  5. Woh shakhs Qaabile ehtaraam hai jis ke libaas me saadgi ho aur dil me sahi ilm ho.
  6. Hamesha dusro ki achhai dekho aur apne aib par nazar rakho.
  7. Apni izzat kuchh nahi, Asl izzat deen ki hai. Deen ki jalaalate shaan se hamari shaan hai.

Huzoor Hafiz-e-Millat ko Hazrat Sadrush-Shariah Maulana Mufti Amjad Ali Azami rahmatullahi alaihi ke mureed aur Khalifa hain.
Hazrat Maulana Sayyed Ali Husain Ashrafi Miyan Kichhauchhawi rahmatullāhi alaihi ne bhi Aap ko khilaafat ata farmayi hai.
Hazrat Hafiz Abdul Azeez Muradabadi rahmatullahi alaihi ke khulfa:

  1. Hazrat Mumtaaz-ul-Fuqaha Muhaddees-e-Kabeer Allama Mufti Zia-ul-Mustafa Azami
  2. Hazrat Raahbare-Ahle-Sunnat Allama Mufti Mohammad Nasir-ud-deen Misbaahi,
  3. Hazrat Raees-ul-Qalam Allama Arshad-ul-Qaadri rahmatullahi alaihi.

1 Jamaadi ul aakhir 1396 Hijri ko Aap ne Sahih-al-Bukhari me se Kitaab-ul-Janaa’iz ka dars diya aur sabaq ke dauraan Hazrat Hafiz Abdul Azeez Muradabadi rahmatullahi alaihi ne farmaya ‘Aaj Peer ka din hai aur aaj hi ke din Huzoor Rasool-Allah Sallallahu alaihi wa sallam ki be’asat hui thi aur aaj hi ke din aap ka wisaal hua tha.’
Aur usi raat 11:55 p.m. Ko Hazrat Hafiz Abdul Azeez Muradabadi rahmatullahi alaihi ka inteqaal hua.
Hazrat Hafiz Abdul Azeez Muradabadi rahmatullahi alaihi ka wisaal 1 Jamaadi us saani 1396 Hijri (31 May 1976 A.D.) ko Peer ke roz hua.
Hazrat Hafiz Abdul Azeez Muradabadi rahmatullahi alaihi ka mazaar Mubarakpur (Uttar Pradesh) me hai.
ALLAH ta’ala uske Habeeb Sallallahu alaihi wa sallam ke sadqe me
Aur Hazrat Hafiz e Millat Hafiz Abdul Azeez Muradabadi rahmatullahi alaihi aur tamaam Auliya Allah ke waseele se
Sab ko mukammal ishq e Rasool ata farmae aur Sab ke imaan ki hifaazat farmae aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmae aur Sab ki nek Jaayiz muraado ko puri farmaye.
Ameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy