Hazrat Mufti Amjad Ali Azmi (Sadrush shariah) rahmatullahi alaihi

Alqaab: Sadrush Shariah (Chief of the Islamic Law), Badr e Tareeqat (Shining Moon of Tareeqah), Faqeeh e azam.

Hazrat Mufti Amjad Ali Azmi (Sadrush shariah) rahmatullahi alaihi ki wilaadat 1296 Hijri (1879 A.D) me Ghausi, Aazamgardh (Uttar Pradesh) me hui.

Hazrat Mufti Amjad Ali Azmi (Sadrush shariah) rahmatullahi alaihi ke waalid ka naam Allama Hakeem Jamaal-ud-deen bin Maulana Khuda-Bakhsh hai.

Aap ne apne daada ke paas bunyaadi ta’aleem haasil ki.

Iske baad apne bade bhai Maulana Muhammad Siddeeq se majeed ta’aleem haasil ki.

Phir aap ke bhai ke mashware par Aap ko Madrasa-e-Hanafiya (Jaunpur) me bheja gaya. Waha Hazrat Allama Maulana Hidayatullah Khan Rampuri se Dars-e-Nizami ki ta’aleem haasil ki.

Hazrat Mufti Amjad Ali Azmi (Sadrush shariah) rahmatullahi alaihi roz Ghausi se Aazamgadh tak aur phir waha se Jaunpur tak ka safar karte the.

Iske baad Madrasatul-Hadees (Pilibhit) me Shaikh-ul-Mohaddeeseen Allama Maulana Wasi Ahmad Surati se Hadees ki ta’aleem haasil ki aur 1320 Hijri (1902 A.D) me Aapko Sanad ata ki gayi.

Aap ne Hakeem Abdul Wali se Ilm e Tibb (Medicine) sikha.

Iske baad Aap 4 saal tak (1323 – 1327 Hijri) Madrasa e Mohaddees e Surati me Mudarris rahe.
Phir Aap Azeemabad (Patna) jaakar 1 saal tak mareezo ka ilaaj karte rahe.

Iske baad Aala Hazrat Imam Ahmad Raza Khan ne Aap ko Bareilly Shareef bulakar Daar-ul-Uloom Manzar-e-Islam me Mudarris ki zimmedaari di aur saath me ‘Maktbah-e-Ahle-Sunnah’ (Printing Press) ki nigraani ki zimmdedaari di aur ‘Jamat-Raza-e-Mustafa’ ke Sadr (president) bhi banaya.

Iske ilaawa Aap Aala Hazrat Imam Ahmad Raza Khan ko ‘Kanzul-Imaan fi Tarjamah al-Qur’an’ tayyaar karne me bhi madad karte rahe. Jo 1330 Hijri (1911 A.D) me mukammal hua.

1343 Hijri (1924 A.D) me aap Ajmer gaye aur for Daar-ul-Uloom Moeeniyah Usmaaniyah me Sadr-ul-Mudarriseen (Head teacher) rahe.

1351 Hijri (1933 A.D) me Aap Bareilly Shareef wapas aaye aur waha 3 saal tak rahe.

Phir Dadoon (Aligardh) ke Nawab Haji Ghulaam Muhammad Khan Shervan ki daawat par Daar-ul-Uloom Hafiziah Shervani me 7 saal tak Sadr-ul-Mudarriseen rahe. Phir 1 saal tak Banaras me thehre.

Iske baad 1364 Hijri (1945 A.D) me Daar-ul-Uloom Manzar-e-Islam, Bareilly Shareef me wapas aaye.


Tasannif :

Hazrat Mufti Amjad Ali Azami (Sadrush shariah) rahmatullahi alaihi ki likhi hui kitabo me se ye mash’hoor hain:

(1) Bahar-e-Shariat
(2) Fataawa Amjadia
(3) Sharh Ma’an al-at’har.

Hazrat Mufti Amjad Ali Azmi (Sadrush shariah) rahmatullahi alaihi ke mash’hoor Shagird:

(1) Sher Besha e Ahle Sunnat Allama Hashmat Ali Khan,
(2) Mohaddis e azam e Pakistan Maulana Sardaar Ahmad Khan,
(3) Hafiz e Millat Hazrat Allama Abdul Azeez Mohaddees Muradabadi,
(4) Imam-ul-Nahw Sadr-ul-Ulama Allama Ghulaam Jeelaani Aazmi,
(5) Ameen-e-Shariat Mufti Rafaaqat Husain Kanpuri,
(6) Allama Muhammad Muslih-ud-deen Siddeeqi,
(7) Mujaahid e Millat Shaikh Allama Maulana Habeeb-ur-Rahmān,
(8) Shams-ul-Ulama Qaazi Shams-ud-deen Jaunpuri,
(9) Faqeeh e aazam Shaikh Mufti Shareef-ul-Haq Amjadi,
(10) Khair-ul-Azkiya Allama Ghulaam Yazdani Ghausawi,
(11) Ra’is-ul-Mohaddeeseen Allama Mubeen-ud-deen Amrohawi,
(12) Khaleel-ul-Ulama Maulana Mufti Khaleel Khan Barkaati,
(13) Fakhr-ul-Amathi Allama Muhammad Sulaiman Bhagalpuri,
(14) Maulana Abdul Haq Mubarakpuri,
(15) Maulana Mohammad Ilyaas Siyalkoti,
(16) Maulana Mufti Mohammad E’ajaaz Razawi.

Pariwaar:
Hazrat Mufti Amjad Ali Azmi (Sadrush shariah) rahmatullahi alaihi ki 4 biwiya aur 11 saahabzaade aur 4 saahabzaadiya hain.

(1) Kareema Khaatoon se 4 bete:

  1. Hakeem Shams-ul-Huda,
  2. Maulana Mohammad Yahya,
  3. Shaikh-ul-Hadees Allama Abdul Mustafa Azhari,
  4. Allama Ata-ul-Mustafa.

1 beti : Zubaida Khaatoon.

(2) Safiy-un-nisaa se 1 beti:

  1. Ra’isa Khaatoon.

(3) Raabia Khaatoon se 2 bete:

  1. Muhammad Ahmad,
  2. Qaari Raza-ul-Mustafa.

(4) Hajra Bibi se 5 bete:

  1. Muhaddis-e-Kabeer Allama Maulana Zia-ul-Mustafa,
  2. Muhammad,
  3. Maulana Ṡana-ul-Mustafa,
  4. Maulana Baha-ul-Mustafa,
  5. Maulana Fida-ul-Mustafa.

2 betiya:

  1. Sa’eeda Khatoon,
  2. Aa’isha Khaatoon.

Hazrat Mufti Amjad Ali Azmi (Sadrush shariah) rahmatullahi alaihi Aala Hazrat Imam Ahmad Raza Khan Bareilwi rahmatullahi alaihi ke mureed aur Khalifa hain.


Hazrat Mufti Amjad Ali Azmi (Sadrush shariah) rahmatullahi alaihi ke Khulfa :

(1) Hazrat Sher Besha e Ahle Sunnat Mazhar e Aala Hazrat Allama Hashmat Ali Khan,
(2) Hazrat Mohaddees-e-azam-e-Pakistan Maulana Sardaar Ahmad Khan,
(3) Hazrat Haafiz-e-Millat Allama Abdul Azeez Mohaddees Muradabadi,
(4) Hazrat Faqeeh-e-azam Sharah-e-Bukhari Shaikh Mufti Shareef-ul-Haq Amjadi,
(5) Hazrat Imam-ul-Nahw Sadr-ul-Ulama Allama Ghulaam Jeelaani Aazmi,
(6) Hazrat Ameen-e-Shariat Maulana Mufti Sayyed Shaah Rafaaqat Husain Kanpuri,
(7) Hazrat Allama Muhammad Muslih-ud-deen Siddeeqi,
(8) Hazrat Khair-ul-Azkiya Allama Ghulaam Yazdani Ghausawi,
(9) Hazrat Maulana Abdul Haq Mubarakpuri.

Hazrat Mufti Amjad Ali Azmi (Sadrush shariah) rahmatullahi alaihi ko 1337 Hijri (1922 A.D) me Hajj ki sa’adat naseeb hui.

1367 Hijri me ek martaba Hazrat Mufti Amjad Ali Azmi (Sadrush shariah) rahmatullahi alaihi Hazrat Allama Muhammad Muslih-ud-deen Siddeeqi ke saath Ahmedabad (Gujarat, India) me Hazrat Shaah e aalam rahmatullahi alaihi ke mazaar par haazir hue.
Shaah e aalam rahmatullahi alaihi ki masjid me 2 mubarak takht lagaye hue hain.

Jisme se ek takht par Huzoor RasoolAllah sallallahu alaihi wassallam jalwa afroz hue the aur dusre par Hazrat Shaah e aalam baba tashreef rakhte the aur madrasa me taaleem diya karte the Aur Shaah e aalam baba ki dua se in takhto ke neeche 2-2 rakat nafl namaz padhkar dua karne wale ko ALLAH ta’ala dunya aur aakhirat me bhalai ata farmata hai aur har jaayiz dua qubool farmata hai.

Dono hazrat in takhto ke niche namaz padhkar dua karke faarigh hue to Hazrat Allama Muhammad Muslih-ud-deen Siddeeqi ne apne peer se puchha ‘Huzoor, aap ne kya dua maangi.’

Hazrat Mufti Amjad Ali Azami (Sadrush shariah) rahmatullahi alaihi ne farmaya: ‘ALLAH ta’ala har saal Hajj e baitullah ki sa’adat naseeb farmaye.’

Yeh dua is tarah qubool hui ki usi saal safar e Hajj ke dauran Hazrat Mufti Amjad Ali Azmi (Sadrush shariah) rahmatullahi alaihi ka wisal ho gaya.


Ek Hadees shareef me Huzoor RasoolAllah sallallahu alaihi wassallam ne farmaya hai:

‘Jo Hajj ke liye nikla aur faut ho gaya to Qayamat tak uske liye Hajj ka sawab likha jayega aur Jo Umrah ke liye nikla aur faut ho gaya uske liye Qayamat tak Umrah ka sawab likha jayega.’

26 Shawwal 1367 Hijri ko Aap apni biwi ke saath Hajj e baitullah ke safar par rawana hue.

Rawana hone se pehle Aap ne railway station par majme ke saamne shaandar taqreer farmayi.

Phir car me safar ke dauran baarish ki wajah se Aap ki tabiyat kharaab hui Aur Mumbai pahunchne tak aap ko Pneumonia ho gaya.

Mumbai station par Hazrat Mufti Amjad Ali Azmi (Sadrush shariah) rahmatullahi alaihi ka ilaaj shuru kiya gaya. Magar Aap be-hosh ho gaye.

Huzoor Mufti e azam e Hind bhi Hajj ke liye jaa rahe the. Aap lagaatar Hazrat Sadrush Shariyah ki iyadat ke liye aate the Aur saath me bahot saare chahne waale bhi aate.

Ek baar ek shakhs ne Aala Hazrat Imam Ahmad Raza ki likhi hui Naat shareef padhna shuru kiya.
Hazrat Mufti Amjad Ali Azami (Sadrush shariah) rahmatullahi alaihi ne foran aankhen kholi aur takiye ke sahare baithkar adab ke sath naat e pak suni.

Huzoor Mufti e azam e Hind aur Hazrat Sadrush Shariah ek saath ek hi hawaai jahaaz me Hajj ke liye rawaana hone wale the.

Magar Aap ki bemaari ki wajah se Huzoor Mufti e azam e Hind rawaana ho gaye. Uske baad Hazrat Mufti Amjad Ali Azmi (Sadrush shariah) rahmatullahi alaihi ki sehat aur zyada kharaab ho gayi aur Aap ka intiqal ho gaya.

Hazrat Mufti Amjad Ali Azmi (Sadrush shariah) rahmatullahi alaihi ka wisaal 2 Zil Qadah 1367 Hijri (6 September 1948 A.D, 12:26 p.m) ko Peer ke roz hua.

Hazrat Mufti Amjad Ali Azmi (Sadrush shariah) rahmatullahi alaihi ka mazaar Ghausi, Aazamgardh (Uttar Pradesh) hai.

ALLAH ta’ala us ke Habeeb sallallahu alaihi wassallam ke sadqe me Aur Hazrat Sadrush Shariah Mufti Amjad Ali Azmi rahmatullahi alaihi aur Auliya Allah ke waseele se Sab ko mukammal ishq e Rasool ata farmaye aur Sab ke Imaan ki hifazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyaabi ata farmaye aur Sab ki nek jaayiz muraado ko puri farmaye.
Aameen.

error: Content is protected !!
Scroll to Top