- Advertisement -

Aala Hazrat Imam Ahmad Raza Khan rahmatullahi alaihi

Alqaab: Aala Hazrat, Mujaddid e deen o millat, Imam e Ahle sunnat, Azeem ul barkat, Faazil e Bareilwi.
Aala Hazrat ki wiladat 10 Shawwaal 1272 Hijri (14 June 1856 A.D) ko Bareilly Sharif (Uttar Pradesh) me hui.
Aala Hazrat Imam Ahmad Raza Khan rahmatullahi alaihi ke waalid ka naam Hazrat Maulana Naqi Ali Khan bin Maulana Raza Ali Khan rahmatullahi alaihi aur waalida ka naam Husaini khaanam bint e Asfandar Yaar Beg hai.
Aap Hazrat Malik Qais Abdur Rasheed bin Ays Afghani radiy-Allahu ta’ala anhu ki nasl se hain.
Aap ke pardaada Hazrat Saeedullah Khan 1151 Hijri (1739 A.D) me Naadir Shah ke saath Hindustan aaye the aur yahi sukoonat pazeer hue the.
Sultaan Muhammad Shaah ne unko lashkar ke saalaar banaaye the.
Aala Hazrat Imam Ahmad Raza Khan rahmatullahi alaihi bachpan se hi bade zaheen the.
Aap ne 4 baras ki umr me Quran majeed mukammal kiya.
Aala Hazrat Imam Ahmad Raza Khan rahmatullahi alaihi ne apne waalid se Dars e Nizami ki taaleem mukammal ki.
Aala Hazrat Imam Ahmad Raza Khan rahmatullahi alaihi ne Mirza Ghulam Qadir Baig rahmatullah alaihi se ‘Meezan e Munsha’ab’ ki taaleem haasil ki.
Aap ne Hazrat Maulana Abdul Ali Rampuri, Hazrat Allama Shah Aale Rasool Marehrawi, Shaikh-e-Kabeer Hazrat Allama Sayyed Shaah Abul Husain Ahmad-e-Noori Marehrawi, Shaikh Ahmad bin Zain-e-Dahlaan Makki, Shaikh Abdur Rahman Makki aur Shaikh Husain bin Saalih Makki se bhi taaleem haasil ki.
Aap ne 6 saal ki umr me Rabi ul Awwal me Milaad e Rasool ke unwaan par shaandar taqreer farmai.
8 saal ki umr me Arabi zabaan me 1 kitaab likhi.
14 Sha’abaan 1286 Hijri ko 13 baras 10 maah ki umr me pehla Fatwa likha aur Dastaar e Fazeelat ata ki gayi.
Bachpan me Aala Hazrat Imam Ahmad Raza Khan rahmatullahi alaihi ne Maah e Ramzan me roza rakha.
Bahot garmi hone ki wajah se aur aap par abhi roza farz nahi tha.
Isliye aap ke waalid aap ko ek kamre ke andar le gaye aur kamra band karke meethai di aur kaha ‘Ise kha lo’.
Aala Hazrat Imam Ahmad Raza Khan rahmatullahi alaihi ne kaha ‘Maine roza rakha hai.’
Aap ke waalid ne kaha ‘Darwaaza band hai, Koi nahi dekhega. Tum khaa lo. Tum abhi bache ho.’
Aap ne kaha ‘Bhale koi na dekh raha ho. Magar mera Rab jiske liye maine roza rakha hai wo to dekh raha hai.’
1291 Hijri (1874 A.D.) me 18 saal ki umr me Aap ka nikah Sayyeda Irshaad Begum bint Shaikh Fazle Husain se hua.



Aala Hazrat Imam Ahmad Raza Khan rahmatullahi alaihi ke 2 shehzadein aur 5 shehzadiya hain.
2 Saahabzaade:

  1. Haamid Raza Khan urfe Hujjat-ul-Islaam
  2. Mustafa Raza Khan urfe Huzoor Mufti e Azam e Hind.

2 saahabzaadi:
Ek saahabzaadi ka nikah Aap ke bhatije Hazrat Mufti Allama Hasnain Raza Khan bin Hasan Raza Khan rahmatullahi alaihi ke saath hua.
1294 Hijri (1877 A.D.) me Hazrat Maulana Abdul Qaadir Badayuni rahmatullahi alaihi Bareilly Shareef aaye aur aap unki daawat se unke saath Marehra shareef gaye.
Jab waha pahunche to Aala Hazrat Imam Ahmad Raza Khan rahmatullahi alaihi ne farmaaya ‘Mujhe mere peer ki khushbu aa rahi hai.’
Jab aap Khaanqaah-e-Barkatiya me pahunche to Hazrat Sayyed Shaah Aal e Rasool Barkati Marherawi rahmatullahi alaihi ne Aap ko dekhkar farmaya ‘Aao. Main kab se tumhara intazar kar raha tha.’
Aap bai’at karke Hazrat ke mureed ho gaye.
Hazrat Sayyed Abul Husain Ahmad-e-Noori Miyan Barkati rahmatullahi alaihi ne aap se farmaya ke ‘Yaha mureed hokar khilaafat haasil karne ke liye aane waalo ko pehle mujaahida karna padta hai. Jab wo us darje par pahunch jaata hai tab hi use khilaafat aur ijaazat milti hai.’
To Sayyedina Shah Aale Rasool Barkati rahmatullahi alaihi ne fauran kaha ke ‘Aye logo! Ahmad Raza pehle hi se ALLAH ta’ala ki taraf se sanwaar karke bheja gaya hai. Sirf use silsile se jodna tha. Qayamat me jab main Rab ta’ala ke saamne khada rahunga aur mujhe puchhega ki Tum apne saath kya laaye ho. Toh main kahunga ki Aye mere Rab tera ata kiya hua Ahmad Raza lekar aaya hu.’
Aala Hazrat Imam Ahmad Raza Khan rahmatullahi alaihi ne 2 baar Hajj ada kiye:

  1. 1295 Hijri (1878 A.D.) me apne waalid ke saath.
  2. 1323 Hijri (1906 A.D.) me apne biraadar Maulana Hasan Raza Khan aur saahabzaade Haamid Raza Khan (hujjat-ul-islaam) aur Mustafa Raza Khan (Mufti-E-Azam-E-Hind) ke saath.

Aala Hazrat Imam Ahmad Raza Khan rahmatullahi alaihi ko Sunnat o hadees par mukammal yaqeen tha aur har amal Sunnat o hadees ke mutaabiq hi karte the.
Aap hamesha ba-jama’at namaz ada karta.
Aap farmate hain ke ‘Wali ki asl karaamat ye hai ke wo hamesha nek aur parhezgaar hota hai aur shariat aur sunnat par amal karta hai.’
(1) Ek baar ye afwah phaili ke Bareilly Shareef me Taa’oon (Plague) phaila hai.
Ittefaaq se Aala Hazrat Imam Ahmad Raza Khan rahmatullahi alaihi ko masoodo me soojan ho gaya aur dard itna shadeed tha ke aap ka munh bhi khul nahi pata tha aur tez bukhaar bhi tha.
Jab doctor ko bulaya gaya to usne jaanch karne ka baad kaha ke ‘Aapko Plague hone ka andesha hai.’
To aap ne kaha ke ‘Ye mumkin nahi hai. Kyun ke Huzoor sallallahu alaihi wassallam ne ek dua batai hai aur farmaya hai ke jab koi badi beemaari phailne ki khabar suno to is dua ko padh lena. In sha Allāh hifaazat ho jaayegi. Aur maine is masnoon dua ko padh liya hai.’
Phir aap ne farmaya ‘Aye Allah! Tere Habeeb Sallallahu alaihi wassallam ke farmaan ko sahi saabit karde.’
Itne me aap ne ghaib se ek aawaaz suni ke miswaak aur kaali mirch Istemal karo.
Aala Hazrat Imam Ahmad Raza Khan rahmatullahi alaihi ne takleef bardaasht karte hue bhi miswaak kiya aur apne munh me kaali mirch ke daane rakhe.
Aisa karne se ALLAH ke karam se aap ki takleef kam hone lagi aur aap me phir se taaqat aane lagi.
Aur is tarah us doctor ko maanna pada ke uski tashkees (diagnosis) galat thi.



(2) Aap 1295 Hijri (1878 A.D.) me apne waalid ke saath hajj ke liye gaye.
Hajj ke safar me jahaaz se waapas aate waqt samundar me toofan shuru ho gaya.
Jahaaz ke kaptan ne aakar kaha ke ‘Toofaan itna tez hai ke shaayad ham nahi bach sakte.’
Ye sunkar aap ke waalid ne kaha ke ‘Aye mere bete! Mujhe mujh se zyada tumhari fikr hai.’
Aap ne farmaya ke ‘Hume kuchh nahi ho sakta kyun ke maine jahaaz par sawaar hote hi bahri sawaari (safar) ki masnoon dua padh li thi aur mujhe yaqeen hai ke mere Aaqa Sallallahu alaihi wa sallam ka farmaan hamesha sahi hota hai. Is liye hamare jahaaz ko kuchh bhi nahi hoga.’
Thodi der me toofaan rook gaya aur kaptan ne aakar kaha ke ‘Ab hamare jahaaz ko koi khatra nahi hai.’
Aala Hazrat Imam Ahmad Raza Khan rahmatullahi alaihi ne apne har amal se Huzoor E akram Rasool-Allah Sallallahu alaihi wassallam aur Aale rasool ke mukammal ishq ka saboot diya.
(1) Ek baar aap doli me bethkar Bareilly Shareef ke bazaar se guzar rahe the. Aap ne doli uthaane walo ko doli rokne ke liye kaha aur puchha ‘Tum me se saadat kaun hai?’
Kisi ne jawaab nahi diya.
Aap ne phir se ilteja karte hua kaha ke ‘Meharbani karke bata do ke aap me kaun saadat hai. Mujhe aale rasool ki khushboo aa rahi hai.’
Tab ek hazrat ne kaha ‘Main aale rasool hu. Ghareebi aur majboori ki wajah se main doli uthane ka kaam kar raha hu.’
Aap ne fauran haath chumkar kaha ke ‘Mujhe muaf kar dena.’
Phir aap ne us sayyedzaade ko doli me bithaaya aur khud unki jagah par doli uthaakar chalne lage.
(2) Aala Hazrat Imam Ahmad Raza Khan rahmatullahi alaihi ko Hazrat Shaah Mahedi miyan Barkaati se bahot mohabbat thi aur aap unki bahot ta’azeem karte the.
Hazrat ko baadi aur bawaasir ki takleef thi. Unke ek mureed Hajj karke Marehra shareef aaye.
Apne Peer ki takleef sunkar unho ne is ke ilaaj ek taambe ka chhalla (angoothi) diya.
Hazrat Shaah Mahedi miyan ko bahot zyada takleef thi.
Isliye aap ne wo chhalla apne ungli me pehan liya.
Ittifaq se Aala Hazrat Imam Ahmad Raza Khan rahmatullahi alaihi un dino me Marehra shareef tashreef laaye aur Hazrat Shaah Mahedi miyan ke ghar par qayaam kiya.
Aap ne dekha ke Hazrat ne apni ungli me taambe ka chhalla pehna hai.
Aap ne socha ke Hazrat ko kis tarah batau ke ye chhalla pehnna khilaf e shariat hai kyun ke Sayyedzaade ke adab ka muamala hai.
Aap ne ek tarkeeb ki aur Hazrat se arz kiya ‘Huzoor! Mujhe baadi ki takleef ka koi ilaaj bataaiye.’
Hazrat ne fauran apni ungli me se wo chhalla utarkar aap ko diya aur kaha ‘Hamare ek mureed ne Madeena munawwara se ye chhalla laakar is beemaari ke ilaaj ke liye mujhe diya hai. Tum ise le lo.’
Aap ne adab ke saath us chhalle ko le liya aur Peerzaade ko is khilaaf e shariat kaam se rok diya aur unko ehsaas bhi nahi hone diya.
(3) Ek martaba Khaanqaahe Barkatiya ke Sajjaada nasheen saahab ne ghar ki rakhwaali ke liye do kutto ki farma’ish ki.
Aap ne ba-adab jawab diya ki ‘Faqeer jaldi do kutte hazir e khidmat kar dega.’
Phir Bareilly Shareef se apne dono saahabzaado ko Khaanqaahe Aaliya Barkatiya me laaye aur Sajjaada nasheen saahab se arz kiya ‘Huzoor! Ye saara din kaam-kaaj bhi karenge aur raat ko rakhwaali bhi karenge.’



Karamaat:
(1) Ek baar Aap Rail se Pilibhit se Bareily ja rahe the.
Raaste me Nawabganj station par train 1-2 minute ke liye ruki. Maghrib ka waqt ho chuka tha.
Aap apne saathiyon ke saath namaz ke liye platform par utre.
Saathi pareshaan the ki train chali jayegi to kya hoga.
Lekin aap ne itminaan se Azaan dilwakar ba-jama’at namaz shuru kardi.
Udhar Driver train ka engine chalu karta hai, lekin train nahi chalti.
Engine uchalta aur phir patri par girta hai.
T .T, Station Master, wagairah sab log jama ho gaye.
Driver ne bataya ki engine me koi kharaabi nahi hai.
Achanak ek Pandit chikh utha ‘Wo dekho koi durwesh Namaz padh raha hai, shaayad train isi wajah se nahi chalti?’
Ye sunkar log Aala Hazrat Imam Ahmad Raza Khan rahmatullahi alaihi ke ird gird jama ho gaya.
Aap itminaan se namaz mukammal karke jaise hi apne saathiyo ke saath Rail me sawaar hue to Rail chalu ho gayi aur aage badhi.
(2) Bareilly Shareef me ek shakhs Auliya, Peer o Murshid aur bai’at me nahi maanta tha.
Uska ek dost Aala Hazrat Imam Ahmad Raza Khan rahmatullahi alaihi se milne ke liye ja raha tha.
Usne us shakhs se kaha ke ‘Tum mere saath Aa’la Hazrat se milne chalo aur waha unse is baare me mobahisa kar lena.”
Wo ye baat kar raha tha ke us shakhs ne ek dukan me taazi mithai dekhi.
Usne kaha ke ‘Pehle ye mithaai lete hain, Phir main tumhare saath chalta hu.’
Usne kaha ke Aala Hazrat Imam Ahmad Raza Khan rahmatullahi alaihi milne ke baad waapas aate waqt raaste me yaha se mithaai le lenge.
Bahot samjhaane par wo maana
Aur dono Aa’la Hazrat ki baargaah me gaye.
Dono waha baithe the, itne me ek mureed kuchh mithai lekar aaya aur waha haazir sab ko taqseem karne ke liye kaha.
Aala Hazrat Imam Ahmad Raza Khan rahmatullahi alaihi ke darbaar me ye tareeqa tha ke jinki daadhi hoti unko do hisse diye jaate aur baghair daadhi wale ko ek hissa diya jaata kyun ki wo bachein jaise lagte hain.
Chunaanche jo mureed taqseem karne ke liye khada hua wo isi tarah sab ko de raha tha.
Jab us shakhs ki baari aai to wo mureed use ek hissa de raha tha.
Tab Aala Hazrat Imam Ahmad Raza Khan rahmatullahi alaihi ne use do hisse dene ke liye kaha.
To us mureed ne kaha ‘Hazrat, Iski dhadi nahi hai.
Aala Hazrat Imam Ahmad Raza Khan rahmatullahi alaihi ne farmaya ‘Usko do hisse khaane ki khwaahish hai.’
Us shakhs ne jab ye suna to use pata chal gaya ke Aala Hazrat Imam Ahmad Raza Khan rahmatullahi alaihi ko uske dil ki khwaahish bhi khabar ho gayi hai. Wo sharminda hua aur Aala Hazrat Imam Ahmad Raza Khan rahmatullahi alaihi ka mureed ho gaya.
(3) Ek baar kisi ne khat me Aap ke naam ke saath ‘Haafiz’ likh diya. Ye khat Aap ko 29 Sha’abaan ko mila. Aap ne jab padha to socha ke main haafiz e Quran nahi hu. Is liye mujhe Haafiz kehna sahi nahi. Magar main jald hi Haafiz e Quran ban jaaunga.
Phir maah e Ramzan me isha ke waqt me azaan aur namaz ke dauraan Hazrat Sadrush Shariah Allama Mufti Amjad Ali Azmi rahmatullahi alaihi Aap ko Quran majeed ka ek paara padhkar sunaate aur Aap usko namaz e taraweeh me Qir’at me padhte. Aur is tarah Ramzan ke khatm hone tak aap Haafiz e Quran ho gaye.
(4) Log agar kisi mas’ale ke liye talaash karte to Aala Hazrat Imam Ahmad Raza Khan rahmatullahi alaihi baghair kitaab dekhe safa number ke saath uska jawab dete.
(5) Ilm e Falkiyat o Taqweem (Astronomy) me Aap ko itni mahaarat thi ke Aap din ko sooraj ko dekhkar aur raat me sitaara ko dekhkar ghadi me waqt mila lete aur 1 minute ka bhi farq na hota.



(6) Aligarh University ke Vice Chancellor Dr. Sir Zia-ud-deen Ahmad ko Ilm e Riyaazi ke ek aham mas’ale ka hal nahi mil raha tha. Bahot saare University me mas’ala bheja magar jawab nahi mila.
Aakhirkaar ye tay kiya ke Germany jaakar is mas’ale ka jawab haasil kiya jaaye. Jab Hazrat Sayyed Sulaiman Ashraf ko is baat ka pata chala to unho ne Bareilly Shareef jaaakar Aala Hazrat Imam Ahmad Raza Khan rahmatullahi alaihi se milne ka mashwara diya.
Dr. Sir Zia-ud-deen Ahmad ne kaha ‘Woh to Maulwi hain aur deeni masale ke baare me jaankaari rakhte honge. Is masale ka hal unhe kaise pata hoga?’
Sayyed Sulaiman Ashraf ne kaha ke ‘Bareilly nazdeek hi to hai. German jaane se pehle ek baar Aala Hazrat se mil to lijiye.’
Bahot israar karne par Dr. Zia-ud-deen Ahmad Bareilly jaane ke liye tayyaar hue.
Sayyed Sulaiman Ashraf ne Aala Hazrat ko paighaam bhej diya ke ‘Agar Dr. Zia-ud-deen Ahmad suit aur tie pehankar aaye to kuchh kehna nahi. Pehle unse baat kar lena.’
Dopahar ko Aligarh se nikle aur Bareilly Shareef pahunche to
Asr ki azaan ho chuki thi. Aala Hazrat Imam Ahmad Raza Khan rahmatullahi alaihi wazu ke liye tayyaari kar rahe the.
Dr. Sir Zia-ud-deen Ahmad ko dekhkar puchha ‘Aaiye, Kya baat hai?’
Unho ne kaha ‘Bada aham masala hai. Aap pehle namaz padh len. Uske baad aaraam se baat karte hain.’
Aala Hazrat ne farmaya ‘Bataiye to sahi.’
Unho ne apna masala bataya. Jaise uski baat puri hui fauran Aala Hazrat Imam Ahmad Raza Khan rahmatullahi alaihi ne uska jawaab de diya.
Jawab sunkar unhe bahot ta’ajjub hua. Sochne lage ke ‘Main iske hal ke liye pure Hindustan me kai jagah par raabat kar chuka hu aur inho ne masala sunar fauran tasalli bakhsh jawab de diya.
Jab Aala Hazrat Imam Ahmad Raza Khan rahmatullahi alaihi namaz ada karke aaye usne majeed sawal kiye aur jawab sunte sunte aankho se aansoo jaari ho gaye aur kehne laga ke ‘Ilm e ladunni ke baare me suna tha, aaj dekh bhi liya.’ Aur unki zindagi me tabdeeli aa gayi. Namaz ke paaband ho gaye.
(7) 1301 Hijri (1882 A.D.) me Pilibhit me Madrasa Daar-ul-Hadees ke bunyaadi jalse me Hindustan ke bahot saare mash’hoor mohaddeeseen aur ulama tashreef laaye the aur Aala Hazrat Imam Ahmad Raza Khan rahmatullahi alaihi ke mubarak haatho se Madrasa ki sange bunyaad rakhi gayi aur Aap ne lagaatar 3 ghante tak Ilm e Hadees, Usool e Hadees aur is se muta’alliq mozu par shaandaar taqreer farmayi.
Aala Hazrat Imam Ahmad Raza Khan rahmatullahi alaihi Imam e Ahle sunnat aur 14wi sadi ke Mujaddid e Islam hain.
1317 Hijri (1900 A.D.) me Patna me Ahle Sunnat wal Jamat ke ijtema ke dauran Maulana Abdul Muqtadir Badayuni rahmatullahi alaihi ne Aala Hazrat Imam Ahmad Raza Khan rahmatullahi alaihi ko ‘Mujaddid’ kehkar khitaab kiya.
Iske ilaawa Shaikh Isma’eel bin Khaleel aur Shaikh Moosa Ali Shaami rahmatullahi alaihi aur dusre arab wa ajam ke ulama ne Aap ko Mujaddid kaha hai.
Aala Hazrat Imam Ahmad Raza Khan rahmatullahi alaihi ne apni kitaabo aur bayaano me bahot si buri bid’ato ko radd kiya hai.

  1. Mazaar (ya Qabr) ko Sajda, Ruku ya Tawaf karna.
  2. Aurto ka mazaraat par jaana.
  3. Maushiqi aur saaz (Music) waali Qawali.
  4. Mazaar par, ya Majlis, ya Juloos me nachna, gana-bajana.
  5. Taziyadari.




Jab Mirza Ghulam Ahmad Qadiyani ne Imam Mahdi hone ka aur phir Nabi hone ka daawa kiya.
Tab Aala Hazrat Imam Ahmad Raza Khan rahmatullahi alaihi ne 1323 Hijri (1906 A.D.) me Hajj ke liye gaye to ‘Al Motamad Al Mustanad’ naam se ek tehreeri ṡaboot (Document) tayyaar karke Makkah aur Madina Shareef ke ulama ko pesh kiya aur phir Hejaaz ke 33 ulama ki raay aur faisla jama karke Arabi me ‘Husaam-ul-Harmain’ naami kitaab tayyaar ki jisme Mirza Ghulam Ahmad Qadiyani ke kafir hone ke ṡaboot diye gaye hain.
Aala Hazrat Imam Ahmad Raza Khan rahmatullahi alaihi ne Wahabi aur Deobandi ke Ashraf ul Ambiya Khair ul bashar Rasool-Allah sallallahu alaihi wa sallam ki gustakhi bhare bad-aqeedo ko radd karte hue ṡaboot pesh kiye.
(1) Huzoor Mohammad Mustafa sallallahu alaihi wa sallam Insaan-e-kaamil hone ke saath noor bhi hain.
(2) Huzoor Mohammad Mustafa sallallahu alaihi wa sallam ko ALLAH ta’ala ne Mukhtaare kul banaya hai.
(3) Huzoor Mohammad Mustafa sallallahu alaihi wa sallam Hazir wa nazir hain.
(4) Huzoor Mohammad Mustafa sallallahu alaihi wa sallam ko ALLAH ta’ala ne Ilm e ghaib ata kiya hai.
(5) ALLAH ta’ala ne apne Ambiya, Auliya aur Shohada ko wisaal ke baad bhi Aalam e baqa me hamesha ki zindagi ata farmayi hai.
(6) ALLAH ta’ala ke muqarrab bande ya’ni Ambiya, Auliya, Shohada, Ahle bait aur Saaliheen ka waseela lena jaa’iz hai.
1323 Hijri (1906 A.D.) me jab Aala Hazrat dusri baar Hajj ke liye gaye the to Makkah me sirf 8 ghante me Huzoor E Akram sallallahu alaihi wa sallam ke Ilm e ghaib ke ṡaboot par ‘Addaulatul Makkiyah’ naam ki kitaab likhi. Jise padhkar Arab ke ulama ne Aap ko Imam maana.
Tehreek e Khilafat ke dauraan Mohandas Gandhi ko kisi ne Ahmad Raza Khan se milne ka mashwara diya. Jab Aala Hazrat ko bataya gaya ke Gandhi aap se milna chahte hain.
To Aala Hazrat ne farmaya ke ‘Wo kis baare me guftagoo karna chahte hain? Deeni ya Dunyawi? Agar dunyawi muamale me guftaguoo karna chahte hain to main unse nahi mil sakta. Mujhe dunyawi baato me dilchaspi nahi hai.’
Tasannif :
1330 Hijri (1912 A.D.) me Aala Hazrat ne ‘Kanz-Ul -Imaan fee Tarjuma al-Qur’an’ naam se Quran majeed ka Urdu tarjuma kiya hai.
Aala Hazrat ne bahot saari mash’hoor Hamd e baari ta’ala, Na’at e Mustafa, Manqabat aur Munajaat likhi hain.
Aala Hazrat Imam Ahmad Raza Khan rahmatullahi alaihi ne 55 se zyada uloom par taqreeban 1000 kitaabein likhi hain.
Unme se kuchh mash’hoor kitaaben :

  1. Fatawa Razawiya (12 Jild)
  2. Ahkaam e Shariat
  3. Husaam-ul-Harmain
  4. Fatawa Harmain
  5. Addaulat-ul-Makkiya
  6. Al Fuyuzaatul Makkiya
  7. Azzubdat-uz-Zakiyya
  8. Al Ijaazat-ul-Mateena
  9. Kifl-ul Faqeeh
  10. Aalil Ifaada Fee Taaziyatil Hind wa Bayaane Shahaadat.

Hijri (1904 A.D.) me Aala Hazrat ne Jaamia Razawia Manzar e Islam ki taameer ki.
Aala Hazrat Imam Ahmad Raza Khan rahmatullahi alaihi ke mash’hoor shaagird:

  1. Hujjat-ul-Islam Haamid Raza Khan
  2. Mufti e Azam e Hind Mustafa Raza Khan.
  3. Huzoor Sadrush Shariah Amjad Ali Azami.
  4. Sadr-ul-Afaazil Maulana Sayyed Naeem-ud-deen Muradabadi,
  5. Muhaddees-e-azam-e-Hind Sayyed Muhammad Ashrafi Kachhauchhawi,
  6. Malik-ul-Ulama Zafar-ud-deen Bihari,
  7. Qutb-e-Madeena Zia-ud-deen Ahmad al-Madani.




Aap Hazrat Sayyed Shah Aale Rasool Marehrawi Qadri Barkaati rahmatullahi alaihi ke mureed aur khalifa hain.
Aala Hazrat se ‘Razawi’ Silsila jaari hai.

Aala Hazrat ke khulfa:

(1) Hazrat Hujjat-ul-Islam Allama Maulana Muhammad Hamid Raza Khan rahmatullahi alaihi
(2) Hazrat Mufti-e-azam-e-Hind Maulana Mustafa Raza Khan rahmatullahi alaihi
(3) Hazrat Ustad-e-Zamaan Maulana Hasan Raza Khan rahmatullahi alaihi
(4) Hazrat Sadrush Shariah Allama Maulana Mufti Amjad Ali Azami rahmatullahi alaihi
(5) Hazrat Sadr-ul-Afaazil Allama Maulana Sayyed Naeem-ud-deen Muraadabadi rahmatullahi alaihi
(6) Hazrat Qutb-ul-Madeena Allama Shaikh Zia-ud-deen Ahmad Madani rahmatullahi alaihi
(7) Hazrat Malik-ul-Ulama Allama Maulana Sayyed Zafar-ud-deen Bihari rahmatullahi alaihi
(8) Hazrat Burhaan-e-Millat Allama Burhaan-ul-Haq Jabalpuri rahmatullahi alaihi
(9) Hazrat Allama Maulana Abdus Salaam Jabalpuri rahmatullahi alaihi
(10) Hazrat Mubbaligh-e-azam Allama Maulana Shaah Abdul Aleem Siddeeqi Merathi rahmatullahi alaihi
(11) Hazrat Allama Maulana Mukhtaar Ahmad Siddeeqi Merathi rahmatullahi alaihi
(12) Hazrat Sultaan-ul-waa’izeen Maulana Abdul Ahad Mohaddees Pilibhiti rahmatullahi alaihi
(13) Hazrat Shaikh Muhammad Abdul Hayy rahmatullahi alaihi
(14) Hazrat Shaikh Ahmad Khaleel rahmatullahi alaihi
(15) Hazrat Shaikh Ahmad Khudrawi rahmatullahi alaihi
(16) Hazrat Shaikh Muhammad bin Abi Bakr rahmatullahi alaihi
(17) Hazrat Shaikh Muhammad Saeed rahmatullahi alaihi
(18) Hazrat Maulana Sayyed Ahmad Ashraf rahmatullahi alaihi
(19) Hazrat Raees-ul-Muhaqqeeqeen Maulana Shaah Sulaiman Ashraf Bihari rahmatullahi alaihi
(20) Hazrat Sher Besha e Ahle Sunnat Allama Maulana Hashmat Ali Khan rahmatullahi alaihi
(21) Hazrat Maulana Jameel-e-Qaadri rahmatullahi alaihi
(22) Hazrat Maulana Mufti Mahmood Jaan rahmatullahi alaihi
(23) Hazrat Budh Shaah Baaba rahmatullahi alaihi.
Ramzan Sharif 1339 Hijri me Aala Hazrat shadeed beemaar aur kamzor the. Bareilly Shareef me sakht garmi thi. Shariat me shaikh e faani ko ijazat hai ki roza na rakh sake to fidiya de aur naatwa mareez ko ijazat hai ki qaza kare.
Lekin Aala Hazrat ne farmaya ki ‘Barielly me shiddate garmi ke sabab mere liye roza rakhna mumkin nahi, lekin pahaad par thandak hoti hai. Yaha se Nainitaal qareeb hai. Muwali pahaad par roza rakha jaa sakta hai. Mai waha jaane par qaadir hu.’
Chunaanche mahe Ramzan Aap ne wahi guzara aur pure roze rakhe.
Kamzori ke sabab Aala Hazrat chalkar masjid tak nahi jaa sakte the. Magar chaar aadami Aap ko kursi par bitha kar masjid tak pahuchate aur isi tarah ba-jama’at namaz ada karte rahe.
Aala Hazrat ke wisaal ke kuchh waqt pehle Shaam (Syria) ke kisi Wali ne Bait-ul-Muqaddas me khwab me dekha ke Huzoor e akram sallallahu alaihi wa sallam ki mehfil me aap ke aas-paas kuchh ashaaba baithe hai jaise wo kisi ka intazar kar rahe the.
Unho ne puchha ‘Ya Rasool-Allah sallallahu alaihi wa sallam! Aap kis ka intazar kar rahe hain?
Huzoor E Akram sallallahu alaihi wassallam ne farmaya ke ‘Ahmad Raza Khan.’
Unho ne puchha ‘Ahmad Raza Khan kaun hain?’
Huzoor E Akram sallallahu alaihi wassallam ne farmaya ke ‘Hindustan ke Bareilly ka ek aalim.’
Jab unki aankh khuli to fauran Syria se Bareilly Shareef aane ke liye nikal pade.
Lekin jab wo waha pahunche to pata chala ke Imam Ahmad Raza Khan ka inteqal ho chuka tha.
Aala Hazrat ne wisaal se pehle wasiyat ki thi ke ‘Meri namaz e janaza Maulana Hamid Raza Khan, ya Allama Amjad Ali Azami padhayein aur mere janaza ko ‘Ka’abe ke Badr ud Duja’ padhte hue le jaayien aur meri qabr ko itni gehri banana jitni meri unchaai hai.’
Apne wisaal ke 42 minute pehle Aala Hazrat ne farmaya ‘Mere kamre se paisa, lifafa, card wagairah hata do kyun ki us par tasweer bani hoti hai.’
Aala Hazrat ka wisaal 25 Safar 1340 Hijri (28 October 1921 A.D.) ko azaan e Jum’aa ke dauran 65 saal ki umr me hua.
Aala Hazrat Imam Ahmad Raza Khan rahmatullahi alaihi ka mazaar Bareilly Shareef (Uttar pradesh) me hai.
ALLAH ta’ala uske Habeeb sallallahu alaihi wa sallam ke sadqe me Aur Aala Hazrat Imam e Ahle sunnat Ahmad Raza Khan rahmatullahi alaihi aur Tamaam Auliya Allah ke waseele se
Sab ko mukammal ishq e Rasool ata farmaye aur Sab ke Imaan ki hifazat farmaye aur Sab ko nek amal karne ki taufiq ata farmaye.
Aur Sab ko dunya wa aakhirat me kaamyabi ata farmaye aur Sab ki nek jaa’iz muraado ko puri farmaye.
Aameen.

- Advertisement -

Comments are closed, but trackbacks and pingbacks are open.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy