- Advertisement -

Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi

Alqaab: Banda nawaaz, Gaisu daraaz, Shehanshaah-e-Deccan, Wali al-Kabeer as-Saadiq.
Aap ki wilaadat 4 Rajab 720 Hijri (1320 A.D.) ko Delhi me hui.
Aap ke waalid ka naam Hazrat Sayyed Yousuf Husaini urfe Sayyed Raaja bin Sayyed Ali hai.
Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi Husaini saadaat hain.
Aap ke pardaada Herat me rehte the.
Sayyed Abul Hasan Jundib rahmatullāhi alaihi Khurasan se Delhi tashreef laaye the.
Aap ke waalid Hazrat Khwaja Nizaam-ud-deen rahmatullāhi alaihi ke mureed the.
Sultan Muhammad bin Tughlaq ke zamaane Mein 725 Hijri (1325 A.D.) Mein aap ka pariwaar Daulatabad (Devgiri) aa gaya.
731 Hijri (1330 A.D.) mein aap ke waalid ka inteqaal hua.
Us ke baad aap ke daada ne aap ki parwarish ki aur bunyaadi ta’aleem di.
15 saal ki umr mein aap Hazrat Khwaja Naasir-ud-deen Chiraag e Dehli rahmatullahi alaihi ke paas ta’aleem ke liye Delhi aaye.
Aap ne Hazrat Kethli, Hazrat Taaj-ud-deen Bahaadur aur Qaazi Abdul Muqtadir se bhi ta’aleem haasil ki.
Aap ne Delhi, Mewath, Gwalior, Chander, Aircha, Chatra, Chanderi, Miandhar, Baroda aur Khambaya mein taaleem haasil ki.
Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi ne Qur’an, Ilm e nahaw, Hadeeṡ, Fiqh, Tafseer, Kalaam, Falsafa aur Tasawwuf ki ta’aleem haasil ki.
16 Rajab 736 Hijri (1 March 1336 A.D.) ko Aap Hazrat Naasir-ud-deen Chiraagh e Delhi rahmatullāhi alaihi ke mureed hue.
Aap ke Peer ne Aap ko majeed taaleem haasil karne ke liye farmaaya.
Chunanche Aap ne Usool-e-Bizoori, Risaala Shamsia, Kashaf, Misbah, aur Qadoori ki ta’aleem haasil ki.
757 Hijri (1356 A.D.) mein Hazrat Nasir-ud-deen Chiraagh e Dehli rahmatullāhi alaihi ne Aap ko khilaafat ata farmai.
Ek baar aap dusre mureedo ke saath apne peer ki doli uthaakar chal rahe the.
Aap ke lambe baal doli ke andar phans gaye. Aap ko bahot dard hone laga. Magar apne peer ki mohabbat aur ta’azeem ki wajah se aap ne bardaasht kar liya aur zaahir na kiya.
Jab Hazrat Khwja Naasir-ud-deen rahmatullāhi alaihi ko ye sab pata chala to aap bahot khush hue aur farmaaya :
‘Har ki mureed Sayyed Gaisu daraaz shud,
Wallāh khilaaf-e-nest ki Uoo ishq baaz shud.’
Is tarah aap ‘Gaisu daraaz’ ke naam se mashhoor ho gaye.
Ramazan 757 Hijri mein Peer ke wisaal ke baad Aap ne Khaanqah ki zimmedaari samhali.
Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi 44 saal tak Delhi mein rahe aur logo ko ta’aleeme deen karte rahe.
Aap hamesha ghareebo aur haajatmando ko imdaad karte the.
Aap ke paas khaana, kapde, ya aur koi cheez aati, to aap taqseem kar dete aur har aane wale ko ata farmate.
Isliye aap ‘Banda nawaaz’ ke naam se mash’hoor hue.
Phir jab Timur ne Delhi par hamla kiya, to Aap apne pariwaar aur mureedo ke saath Daulatabad ke liye rawaana hue.
Bahamani Sultan Taaj-ud-deen Firoz Shaah ki daawat par 800 Hijri (1397 A.D.) mein Aap Gulbarga tashreef laaye aur khaanqaah ki taamir ki.
Dauraan e safar ek baar Aap ne Gwalior mein Maulana Ala-ud-deen Gwaliori ke ghar par qayaam kiya.
Hazrat ko takleef na ho is liye Maulana ne apne ghar walo ko dusre makaan par bhej diya tha.
Un ke bhai Maulana Shams-ud-deen bahot beemaar the.
Unho ne Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi ko apne bhai ki sehat ke liye dua karne ke liye kaha.
Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi ne unhe agle din aane ke liye farmaaya.
Agle din jab Maulana aaye to aap ne farmayab:
‘Maine tumhare bhai ke liye dua ki. Magar mujhe ye farmaan hua hai ki tumhara bhai sirf 10 din ke liye zinda rehne wala hai.’
Maulana ne arz kiya:
‘Phir aap ye dua farma dijiye ke mera bhai ba-imaan duniya se jaaye.’
Aap ne farmaaya ‘Maine us ke liye dua kar di hai.’
10 roz baad raat ko Maulana ke bhai ka inteqaal ho gaya.
Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi ne uske janaza mein shirkat ki aur uski Namaaz e janaza padhai.
Dafnaane ke baad aap ne qabrastan mein Huzoor sallallāhu alaihi wa sallam ko marhoom ki madad aur hifaazat ke liye istegasah ki aur waapas aaye.
Kuchh din baad Maulana ne apne bhai ko khwaab me dekha.
Unho ne us ka haal puchha. To us ne bataaya ki
‘Agar Hazrat Khwaja Sayyed Sadr-ud-deen Abul Fatah Muhammad Husaini rahmatullahi alaihi ne mere liye Huzoor Rasool-Allāh sallallāhu alaihi wa sallam se istegaasah na ki hoti to mera haal bahot bura hota.’
Aap Arabi, Faarsi, Urdu, Dakhni, aur Hindi ke maahir the.
Tasannif:
Aap ne taqreeban 195 kitaaben likhi hai.
Aap ki likhi hui mash’hoor kitaaben:
(1) Tafseer Multaqat
(2) Qaseeda Amali
(3) Adab-ul-Mureedeen
4) Me’araaj-ul-Aashiqeen
(5) Sharh Awaarif-ul-Ma’arif
(6) Sharh Fasoos-ul-Hakam
(7) Sharh Mashareq
(8) Sharh Fiq’h-e-Akbar
(9) Risaala Qushairriyah
(10) Hawashi Kashaf
(11) Quwwat-ul-Qalb
(12) Asmaar-ul-Asraar
(13) Hadaiq-ul-Uns
(14) Hazair-ul-Quds
(15) Khaatimah.
Aap ke Deccan ki taraf ke 10 mahine ke safar ke dauraan Wa’az aur naseehat ko aap ke Saahabzaade Hazrat Husain Muhammad Akbar rahmatullāhi alaihi ne ‘Jawaami-ul-Kaleem’ naami kitaab me jama kiye hain.
Aqwaal:
(1) Agar koi Saalik shohrat ke liye Ibadat, ya Muraqaba karta hai. Toh wo kabhi Soofi, ya Wali nahi ho sakta.
Agar dil me Khauf e khuda aur ikhlaas nahi hai, to sab amal dikhaawa hai.
(2) Jab tak insaan khud ko dunyaawi muamalaat mein se door nahi karta, wo kabhi sahi raah ko nahi pa sakta.
Soofi (Saalik) ko dunyaawi muamalaat se masroof nahi rehna chaahiye aur aise logo se parhez karna chaahiye.
40 saal ki umr me Aap ka nikaah Bibi Raza Khaatoon binte Sayyed Ahmad bin Sayyed Jamaal-ud-deen Maghribi ke saath hua.
Aap ke 2 saahabzaade aur 3 saahabzaadiya hain.
Saahabzaade :
(1) Sayyed Husain urfe Muhammad Akbar Husaini
(2) Sayyed Yousuf urfe Muhammad Asghar Husaini.
Saahabzaadiya :
(1) Bibi Faatima
(2) Bibi Batool
(3) Bibi Umme Deen.
Aap Hazrat Khwaja Sayyed Naasir-ud-deen Mahmood Chiraagh e Dehli rahmatullāhi alaihi ke mureed aur khalifa hain.
Aap se ‘(Chishti Nizaami) Husaini’ silsila jaari hai.
Aap ke khulfa :
(1) Hazrat Khwaja Sayyed Husain urfe Muhammad Akbar Husaini rahmatullāhi alaihi
(2) Hazrat Khwaja Sayyed Yousuf urfe Muhammad Asghar Husaini rahmatullāhi alaihi (Sajjaada nasheen)
(3) Hazrat Khwaja Muhammad Ilm-ud-deen rahmatullāhi alaihi (Patan, Gujarat),
(4) Hazrat Maulana Ala-ud-deen Gwaliori rahmatullāhi alaihi,
(5) Hazrat Sayyed Shaah Jamaal-ud-deen Maghribi Husaini rahmatullāhi alaihi,
(6) Hazrat Sayyed Sa’ad-ud-deen bin Umar urfe Baabu Shaah Chishti rahmatullāhi alaihi (Khambhat, Gujarat).
Aap ka wisaal 16 Zil Qa’ada 825 Hijri (1 November 1422 A.D.) ko 105 saal ki umr me hua.
Aap ka mazaar Gulbarga, Karnataka me hai.

- Advertisement -

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy